聯儲局最新表態，梗係睇銀行股．長江基建1038又加派息．美國今年貢獻全球經濟增長可能多過中國？美國消費者信心．Excel不死。Finance as culture． 薪有限但做無限。最美一幕還未閉幕。 (Patreon)

快評幾句—聯儲局最新表態，梗係睇銀行股

大師冇點你—長江基建1038又加派息

每日一圖— 美國今年貢獻全球經濟增長可能多過中國？美國消費者信心

Good Read — Excel不死。Finance as culture

FB Post Summary — 薪有限但做無限。最美一幕還未閉幕。

快評幾句—聯儲局最新表態，梗係睇銀行股

1. 道指又新高，第一次守在33000點以上，普遍仲係舊經濟股略為勁啲，但已經冇之前咁大分嘢（亦係早幾日講過嘅）。不過市場焦點，當然係聯儲局。大家都知唔會加息，但咁啱今次聯儲局亦會出埋佢嘅經濟預測。份嘢在呢度。

2. 詳情你今日睇各種即時新聞會睇到，我可能今晚（星期三）先長寫。自己睇圖嘅，就樓上呢個。不詳解，但教你點睇：最重要係睇上次（12月）估嘅數同今次估嘅數嘅分別。

3. 懶睇嘅，簡單sum up：同上次相比，今次預期呢兩年經濟增長更強，失業率跌得更快，通脹會升得勁啲，超過2%，但只係暫時。但，加息時間表冇乜大變（雖然有個別委員覺得要早啲）

4. 另外嘅？買債繼續，2023年低前應該唔知息，亦唔擔心近期嘅美債債息急彈。

5. 你點演繹？最簡單啲人演繹，就係唔加息，繼續打牌，股市長升長有。但，經過過去一兩個月，應該知道股市一般對長息（美債債息）敏感，而唔係聯儲局直接控制到嘅短息（除非係非常時期，例如舊年3月咁，企業流動性不足，銀行塞血管，投資者驚，咁短息落返就幫到市場）。所以我唔會特別太興奮，你睇啲10年債息甚至30年債息照升

6. 但，就梗係銀行股有so了，應該仲有得升。短息一路壓低，2023年底前都唔加，但長息升上去，聯儲局唔驚，照計對銀行股幾有利。

大師冇點你—長江基建1038又加派息

7. Sort of大師冇點你，雖然Patreon只係寫過一次，開Patreon之前寫得仲多。你亦可以睇經濟日報嘅評論，都OK。

8. 長江基建出業績，純利跌三成，但派息唔減，反而仲有得加（加一個仙都係加！而佢真係加一個仙！）。其實中期業績時都估到，當時都係盈利大跌但維持住中期息唔變。

9. 重點係，公司已經連續24年加派息，而公司亦都十分自豪呢樣嘢，寫埋出嚟（極少有香港公司會咁做）。根本公司只係上市24年，即係上市咁多年，每年都加，加少少都係加。講過了，你睇高息股不能只睇咩幾多厘息，忽然間今年多下年冇嘅又係搵笨。個可預見性同埋可持續性（咩中文？）先緊要。而香港真係冇幾多間公司做到廿幾年年年加派息。

10. 呢啲公司悶到七彩，但拎嚟收息嘅，總好過你信咩匯豐。長江基建就真係可以長期持有，講緊十年八年之類。

每日一圖— 美國今年貢獻全球經濟增長可能多過中國？美國消費者信心

11. 美國今年貢獻全球經濟增長可能多過中國？—WSJ嘅圖，紅色係中國，藍色係美國。留意雖然係講百份比，但唔係中國美國本身嘅增長，係佢地在全球增長（例如2021年去到近6%）嘅百份點中，貢獻咗幾多。所以你見到之前N年中國都只係1%左右，中國雖大，但仲有其他國家嘛。過癮嘅係，2021年，好可能見到美國嘅貢獻會首次多過中國，應該係2005年以嚟第一次。兩國本身嘅經濟增速可能差不多，但美國規模依然大過中國一截，所以有咁嘅情況（至於過去N年，美國當然都係大過中國，但中國增速快啲）。當然得個知字，不代表美股就會跑贏A股，但亦不代表不會跑贏，係冇乜直接關係的。仲有好多嘢睇到的，例如2005年發生乜事？點解中國經濟開始起飛？正係入世貿後幾年，亦見到美國經濟增長放慢。所以你見唔少人認為美國當初放虎歸山，全球化最大贏係中國，美國流失晒職位之類。亦都造就埋特朗普上台。

12. 美國消費者信心—亦係有趣嘅圖，睇你點演繹。咁當然全部都係疫情爆發後跌到谷底，然後極速回升，同股市一樣。但唔同群組都有唔同情況。先講年紀，你見老嘢係比較悲觀嘅，有啲奇怪，明明呢班友應該最有錢，呢個結果都令我有啲意外。但睇教育程度呢，一如大家所料，越高教育水平嘅當然越樂觀。職位流失集中在服務業低人工嘅工作嘛，況且教育水平高嘅多資產。不過，仲得意係，最初疫情爆時，最驚亦係呢班人，之後見冇事就快速回升。

Good Read — Excel不死。Finance as culture

13. Excel不死—好過癮嘅文，但你諗下，你用咗Excel幾耐？我就1995年開始，但Excel 1985年出世，應該老過好多讀者。咁多年，功能唔算變得好大（你睇下1985年嘅電話電腦同而家爭幾遠？），但Excel依然係……好重要，近乎不可能取代嘅一個軟件，極具影響力。篇文長，但好過癮，例如講個個用Excel嘅，已經係Programmer．真的，某啲科技人或者唔同意，但只要你個Excel會用function（即係你唔係當記事簿或電話薄），就當然已經係Programmer了。你會用IF呀嗰啲已經係編程101。

14. Finance as culture—寫中文「金融作為文化」怪怪咁。主要講美國，但我覺得全世界都係，「金融化」。「金融化」好多定義，但簡單講，「金融」呢味嘢，並唔係一路咁重要嘅東西。讀者當然唔會有咁老，但你睇歷史應該知，五六十年前，做金融並唔係特別富貴巴閉嘅行業。因乜有咗改變就好長嘅故事（去金本位化，新自由主義blah blah blah）。但唔止講金融業變得重要，而係在文化上都影響晒其他行業，其他人。即使而家好似「科股人」先係宇宙中心，但都不改「金融化」呢種文化。邊個唔上市？亦都見到「投資」「財務自由」等等深入民心。

FB Post Summary — 薪有限但做無限。最美一幕還未閉幕。

15. 薪有限但做無限—主要係廣告，打鑼打鼓講嘉年華郵輪Carnival．但有其他insight的，例如叫你唔好成日睇股票機。

16. 最美一幕還未閉幕—冇乜特別，講自己嘢。朋友。識咗好耐嘅三個朋友。加上又回帶講少少我嘅職場歷程。