一年前嘅今日道指跌3000點。螞蟻估值得返（or 仲有？）2000億美金。中海外688連升10日上返21蚊。福士一度升三成，今年跑贏Tesla 60%。 (Patreon)

一年前嘅今日道指跌3000點

螞蟻估值得返（or 仲有？）2000億美金

中海外688連升10日上返21蚊

福士一度升三成，今年跑贏Tesla 60%

1. 失業第三天，忙過返工是真的。幸好昨日（星期二）港股美股都比較靜，所以今日寫啲冇咁hard core嘅嘢，唔講新經濟舊經濟，唔推股票，唔講以前講過嘅公司，唔講心法（結果最後幾樣都有，不過真係同平時唔多同）。

2. 又，新讀者留意，有義工讀者整咗個文章結集，亦即係目錄。十分有用。齊晒我在Patreon嘅文了。差不多200篇。

一年前嘅今日道指跌3000點

3. 星期二港股美股都靜，但一年前嘅今日你做緊乜？應該唔記得。但多得智能電話或Facebook，你可以睇返。舊文都有寫（唔使搵，陣間有），221跌到323，舊年呢個時間，正係跌到最甘（當然事後先知）嗰浸。照計應該唔會舊年未睇股票嘅今年先睇？但人嘅記憶好短，所以提過大家，寫trade log，或者任何紀錄低你想法嘅嘢，係好嘅。

4. 提返你，一年前今日，道指跌3000點，13%。標指納指都差不多。股災？呢啲就股災啦！所以我唔明啲人而家做乜可以跌2-3%就話股災。真係記憶咁短？

5. 黑格爾話齋，人類由歷史得到嘅教訓，就係人類唔會由歷史得到教訓。固然有啲嘢會變，但人心唔係好會變。類似呢啲boom and bust，繼續會上演。當然冇包生仔，都話羅素雞，明明之前次次主人叫佢都有好嘢食，點知有一日會畀人劏咗？但，有冇更好嘅選擇？

6. 講呢啲為乜？為咗你可以睇返，過去一年，你學到乜—呢個比你賺到乜更加重要。當然，你輸錢嘅，就證明你學唔到乜了，繼續努力。（但贏錢亦唔好咁得戚，可能只係好彩，亦真係應份的）

7. 咁到底個教訓係乜？舊年年尾定今年年頭我寫過一大堆文講，自己去搵吧，搵「2020回顧+教訓」已經得。或者睇返CNBC呢篇文（唔肯定係咪免費）

8. 言猶在耳，你見到VIX又跌到低位。理論上唔係好事，由80跌落嚟而家20，梗係兵荒馬亂入市好。但低處未算低，你見過去一年大體都係VIX跌，股票升。VIX可以跌到幾多？幾年前單位數都係咁啦

9. 最後醒多個圖畀你，今年嘅牛市（唔係仲有人覺得係熊市反彈下話？），升幅真係冠絶以往。但反正之前跌得甘，加埋低息。咁你睇史上呢，多數啲反彈都維持到兩年嘅。

螞蟻估值得返（or 仲有？）2000億美金

10. 關於阿里巴巴，好多新聞。政治當然有一定重要（特別大陸股票），但，首先唔好過度演繹。另外，得罪講句，你估你又真係專家？

11. 固然你可以理解做共產黨抄家，不利市場，不利創業家。好大程度係事實。但係咪咁多年都應該避晒中國股票？某程度上都錯唔晒，你見過去N咁多年，絶大多數情況都係美股跑贏，累計埋上去就好係嘢。但，歷嚟會只買美股嘅讀者，又真係唔係咁多。

12. 當然實際影響難計，但總冇可能因為共產黨搞阿里巴巴，間公司就變咗一文不值。最新話可能迫佢剝離啲媒體業務（主要係南華早報），但講真，南華早報在阿里巴巴市值入面，完全唔值錢，完全可以不理。你當然可以亦可以演繹做，好似迷暈咗先慢慢玩佢咁。都可能係，馬雲冇咗個媒體發聲，之後先慢慢搞佢。咁呢啲就你自己衡量，但就是論事，媒體業務，不值幾多錢。你睇騰訊冇海外發聲平台咪又係咁玩，亦不見得馬雲啲生意要靠呢啲媒體嘢先保得住 —係保得住就唔會而家咁啦

13. 至於螞蟻，係比較有趣嘅。當時都有讀者問過，如果螞蟻變零，阿里巴巴仲值幾錢。呢個假設我係唔同意嘅（陣間會講），但亦計過下，螞蟻咪大約8份1市值左右咯。即係高位跌12%，咁而家當然唔止。實情舊年螞蟻撻Q時，已經反映晒啦。仲而家先等你左計右計，開心大發現可能會變零？

14. 咁你見到了，昨日傳嘅東西，啲投資者而家估值，都仲估到大約2000億美金。固然同舊年上市撻Q前拎嘅3000億美金估值爭一截，如果計埋估原本上市後會升到4000億，就得返一半咁滯。但，就真係唔係冇晒。半杯水咁咯。

15. 所以講咁大壇嘢，都係應該乜都反映晒的。當然，堅持成個商業帝國會玩完嘅，就另作別論。但又講真：你敢唔敢沽空？你覺得會玩完喎，不如開個盤口？咩叫玩完？100蚊？50蚊？0？畀你見到好多人嘅虛偽同廢，把口就會話爆煲，但叫佢買根本唔敢。我唔同，我信股票升，就買晒落去。

中海外688連升10日上返21蚊

16. 都唔算完全係大師冇點你。但就分享下，隻中國海外郁下郁下就上返21蚊，連升10日了。半年新高嚟的，買咗嘅全部甩晒身啦，「我個Patreon都係半年之嘛」。

17. 新讀者未必知，但呢隻嘢係11月尾嗰時推。嗰時捲入美國制裁，當時18蚊。咁你話而家21蚊，四個月升一成多啲，還好啦，至少冇輸錢。問題係，當時真係唔少讀者買咗，而隻嘢之後一路跌，15蚊都見過，都好多讀者問，搞到我都想潛水。18蚊跌到15蚊，差不多輸兩成了，都好似有人選擇「止蝕」，咁就真係dup心口了。之後升到21蚊呀。（唔好計你15蚊買升到21蚊執四成啦，神仙咩）。

18. 當然你會問，咁啱呢隻升得返上嚟啫，但你點知隻隻都會？的確唔係隻隻會。所以最好揀嗰時都揀啲比較似樣嘅公司。做起嚟當然唔係咁簡單，但大約都有個譜，至少間公司唔好太垃圾，亦唔好太貴。咁如果一路有錢賺有增長，啲估值又唔係太過份嘅，最後都會升返上嚟嘅，應該。

福士一度升三成，今年跑贏Tesla 60%

19. 歐洲股都講埋！同上面中海外嘅故事有少少關係。話說福士汽車（冇錯係Volkswagen），德國上市，星期二股價曾經一度急升三成。收市都升10%。原因？都冇乜特別。出嚟講到雄心壯志咁。又起廠又話挑戰Tesla

20. 更有趣係，今年福士股價升咗65%！亦唔止一間係咁，唔少舊車廠都係。而Tesla？遠遠落後，仲未計有唔少人高位追咗入去。當然你會話，扯，之前Tesla升幾百倍你唔講？只係拎今年？係丫。但你係咪升幾百倍前買丫？過去幾個月，你買福士賺錢，一定易過 Tesla

21. 呢個返返去最重要嘅嘢，之所以我怕同啲科技能車能講股票，因為fan boy就好麻煩的。永遠只係講前景有幾好，技術有幾勁，其他廠點追唔到（really？）．但你忽然咗埃汾成日講嘅嗰句嘢（資深讀者知道邊句對白了）：估值呢？哦，唔使睇的？真係唔使？唔明喎。我當你全世界所有人都一人一架Tesla，極限啦。咁你總有條數嘛。900蚊好抵買？9000蚊呢？90000蚊呢？總有個極限的。咁既然你都同意呢樣嘢，點解話唔使睇估值？只係未必話到知係9000蚊搵笨定90000蚊搵笨啫，但總有一個咁嘅位。問心，有幾多人開Tesla？但有幾多人用Facebook？蘋果呢？係咪得Tesla識做車？

22. 並唔係要唱淡Tesla，但如果你只係講乜鬼「前景」，你解釋唔到點解今年福士跑贏咁多。所以，估值都係相當重要的，雖然往往唔係咁易量化。