ivanliresearch

美股新舊經濟齊升，港股仲係升金融股多。理文化工746。Carnival。Coupang貴過亞馬遜。美國人好有錢。中國經濟增長嘅水份。邊度搵投資點子。大摩2021十大趨勢。電動車市場好大嘅迷思。電影節初選名單 (Patreon)

Published:

2021-03-15 21:07:44

Imported:

2021-07

Content

快評幾句—美股新舊經濟齊升，港股仲係升金融股多

大師冇點你—理文化工746。Carnival

每日一圖— Coupang貴過亞馬遜。美國人好有錢。中國經濟增長嘅水份。

Good Read — 邊度搵投資點子。大摩2021十大趨勢。電動車市場好大嘅迷思。

FB Post Summary —電影節初選名單

1. 講多次，開咗個目錄，真係多謝義工讀者。本人已免佢一年年費。未係完美，但已經幾有用，之後會再搞好少少。你預佢一個星期update一次啦。理論上我寫完文都會去update，但，「我有咁好心機就一早搞咗啦」。盡做

2. 仲有乜提議可以話我知，而家居然有個差不多義工團咁嘅嘢，三丁友，真係好感動。當然讀者義務幫我幫大家，大家就唔好老奉。而有咩著數我都會畀咗佢地先了，例如有啲免費newsletter gift subscription咁

3. 另外，答晒大家的PM了，過咗幾日，之後希望快啲。

快評幾句—美股新舊經濟齊升，港股仲係升金融股多

4. 美股都真係同之前講嘅差不多，你見債息繼續都在1.6%樓上，但市場已經少理。之前又低位走晒嗰啲又唔知點算，反而你一個星期睇一次會唔會更好？

5. 另外，比較得意嘅係，你見到過去一輪都係舊經濟跑贏新經濟，偶然就一兩日新經濟反擊，但整體都係舊經濟＞新經濟，價值＞增長。不過，可能短期去到尾聲？今日（星期一）見到道指又升，納指又升，似乎啲科技股有返啲支持。

6. 至於港股嘛，繼續都係頹。騰訊700阿里巴巴9988都預咗會有啲壓力，但歷史都見到，不太礙事的，過一輪又會冇事。之前嫌貴唔肯買嘅，呢排有機會。另外，同外圍唔同，騰訊阿里受壓似係因為政治因素，就唔只係因為買舊經濟沽新經濟。

7. 不過話說回頭，你見港股仲係靠啲舊經濟股撐住。內銀就不用講（但唔知升乜），仲有就係啲大陸airline，冇叫你而家追入去呀下，即使國泰293我都覺得買唔過，寧願買美股

8. 但想講啲金融股，你見10年債息升得快，30年升得仲快，銀行最鍾意呢啲環境，中銀2388匯控5強勢預咗。當中特別想講友邦，上星期出完業績後跌過下，當時已經想叫買，但邊有咁多時間寫文。事實你睇咩業績咪又係倒後鏡，人地都話今年頭兩個月已經反彈好多。況且，股價炒將來，開返關仲得了？仲有，債息對佢地都有利。平就肯定唔係好平，但係可以長渣嘅股票。

大師冇點你—理文化工746。Carnival

9. 不用多講啦下話，呢隻真係得意之作。唔係我寫應該冇乜人認識隻嘢，甚至有人覺得係因為我寫先升上去（咁，咪變咗呢度版友塘滾塘魚？）。講真隻嘢成交不多，呢度啲讀者又富貴，人人去買真係變GameStop—但咁冇意思的，只係變咗鬥傻接火棒，要間公司真係得先掂。昨日找返上星期嘅數了，寫咗篇長文講呢間公司。我肯花時間寫間冇乜人理嘅公司，都係充滿信心嘅。最初寫嗰時3.8，而家4.43，兩個星期17%，相當不錯啦，仲要個市係跌嘅。照計可以上到5.2-5.6。甚至誇張啲 overshoot到6蚊。但5蚊樓上可以諗走了，呢啲唔係可渣過世嘅公司

10. 嘉年華郵輪 Carnival一樣，都寫過幾次。反而想分享，隻嘢股價都幾chok，未致於一日升跌10%，但往往都有5%，成日睇住反而易嚇走或自己”止賺”，

11. 寫嗰時22.7，而家52週新高，見過30蚊。原來都一個月唔到，升三成幾。講真，好過買啲發夢股嚇得發惡夢。同上，唔係可以渣一世嘅嘢，到啲友開始真係上船就沽啦。

每日一圖— Coupang貴過亞馬遜。美國人好有錢。中國經濟增長嘅水份。

12. Coupang貴過亞馬遜—之前寫過呢隻嘢，「唔知有冇人買咗」。今日（星期一）升的。但嗰時我都話未認真睇，只係睇係韓國電商嘢。但，記住啦，故事人人識講，估值都好重要。當然蝕錢，唔緊要。但即使計price to sales，隻嘢都貴過亞馬遜，really？而隻嘢在韓國嘅market share，遠不及亞馬遜在美國。當然你可以拗話正係咁先有增長。留意，講緊招股價咋喎，之後再升咗幾成！另外，因為佢在美國上市，就貴過晒在韓國本土嗰啲估值了。

13. 美國人好有錢—之前貼過類似嘅，但講收入，美國人過去一年嘅收入升咗好多，因為派錢。今次呢張仲有趣，留意係講net worth，身家。仲要係as a percentage of income．你見到個升幅都係史無前列嘅，一來派錢，二來樓升，三來股票又升。似乎幾好。但可以玩幾耐？

14. 中國經濟增長嘅水份—中國經濟數據有問題就人人皆知，問題係，好多無知嘅人就只係一句「挑，假嘅！」就乜都唔睇，咁只會令你水平更低。好啦，假，都要有個譜。點假？咩年份會最假？幾時會差到作都作唔到？會唔會有時係報細數唔係吹大？全部係好有趣嘅課題。例如呢個研究，樓上嘅係官方目標同公佈GDP數字，差不多年年達標，大家都知相當流。但樓下有趣啲，佢計nominal growth，然後由預算赤字去睇返官方「真正」預測嘅數。咁你見到，有年都係達唔到標的—但亦掉轉，有啲年份係超標。所以並不定係一面倒作大，亦有作細。N年前寫文都寫過，中國經濟數字似係係smoothed，經濟好嗰時傾向作細，差嗰時傾向作大。

Good Read — 邊度搵投資點子。大摩2021十大趨勢。電動車市場好大嘅迷思。

15. 邊度搵投資點子—留意又係substack newsletter平台嘅嘢，我覺得還好，Patreon有乜依郁我就搬過去。講返篇文，話你知啲投資名家係點發掘idea的。但未必好有用，一來好多都係幾廿年前了，世界唔同咗。二來，idea好易有，但不代表係好idea，或者會賺到錢。當然諗多啲嘢知多啲嘢總係好。

16. 大摩2021十大趨勢—大摩嘅免費嘢。「咁你知道好極有限」。但我覺得寫得不錯，佢講2021年嘅十大趨勢，都係啲比較宏觀嘅嘢，但至少寫得明確，唔係風水佬星座書咁含糊：「今年中美關係會緊張」（點緊張先叫緊張？），「今年股市回報仍然會好」（點先好？30%？定係跌10% 但債券跌20%所以股票算好？）之類。值得睇的，但當然了，睇完不等於你會買中嘢，冇咁簡單的。

17. 電動車市場好大嘅迷思—一隻Tesla，令到幾多人都可以呃飯食？但凡你講乜傳統嘢，都會有人同你講「Tesla夠升幾百倍」—但隻隻都Tesla？等於啲友講，電動車好有前途。首先，十幾年前人人都咁講，電動車好有前途，同啲公司會升係兩回事。二來，我就當真係好有潛力，但人就得咁多，車買得幾多架？你話Tesla一統江湖將來十億個客所以值10000蚊，Fine．但其他公司呢？冇可能間間公司都成功的，但間間都咁貴，明顯每間都吹到自己會成功，而買嘅又以為間間都成功，係冇可能的。