物管股 VISA NIKE。長實1113，招商局房託1503，美圖1357。 ESG當然都係投行大賺。里數計劃值錢過航空公司？唔好買NFT唔好買SPAC。43歲集中力就見頂李嘉誠好有眼光，咁你呢？電影節最終版。讀者請食飯雲端版 (Patreon)

快評幾句— 物管股 VISA NIKE

大師冇點你—長實1113，招商局房託1503，美圖1357

每日一圖— ESG當然都係投行大賺。里數計劃值錢過航空公司？

Good Read — 唔好買NFT唔好買SPAC。43歲集中力就見頂

FB Post Summary — 李嘉誠好有眼光，咁你呢？電影節最終版。讀者請食飯雲端版

快評幾句— 物管股 VISA NIKE

都真係唔係咁易捉，你見債息繼續都高企，仲係1.7%水平，但都算同之前估計差唔多，市場慢慢習慣。變咗係納指反而跑贏返道指。甚麼YALA WISH之類都反彈，唔係之前咁一面倒債升就狂沽高估值科技股。

當然道指差另一原因亦都係因為金融股受壓，一方面聯儲局一個對銀行嘅寬鬆措施冇續期，有啲意外，而加上之前啲銀行股升咁多，跌返落嚟好合理。

另一方面，亦見到VISA畀司法部查，股價亦都大跌。我個人就覺得呢啲係機會，之前一路話貴嘅可以諗下（但未必係即時買入去，不過真係答你唔到咩位買，神仙咩，個個都想跌落嚟先買然後自己買完即升，真相多數係掉轉）。固然係「壞消息」，但冇「壞消息」股價點會有機會畀你買？

同樣情況，NIKE亦都係受壓，就因為之前業績麻麻地，但我唔見有好大問題（會再細睇）。幾季之前都試過係咁，有一次業績唔得股價即散，後來咪又係好地地。有人問舊經濟股買乜，呢間都係比較正路嘅選擇。

港股我都想講少少，你見啲物管股呢期幾勁，實情星期一都在Facebook講過下，因為入咗港股通。況且又夠殘，又可以諗諗。

大師冇點你—長實1113，招商局房託1503，美圖1357

首先當然係講長實1113，固然高開，你根本追唔到咁滯（幾時都係咁架啦），但至少你見我判斷個計劃對股價相當利好係正確嘅。應該之後FB會再寫多啲，但留意下：只要股東會批咗佢堆嘢，就算最後寄信畀你收唔晒，佢都可以在市場上係咁回購，不受之前咩每年2%影響—即係話，只要股東批咗佢，佢就必定會增持到上45%，爭在係在邊度買

另外，呢啲都係陳年嘢，都唔係幾好意思拎出嚟講。但先講隻招商房託1503，丫，真係郁喎，玩下玩下玩到新高。而只係寫過一次咁大把，但居然都有讀者買而賺咗錢。半年升兩成幾……還好啦。

最後，美圖1357，right for the wrong reason，最初寫完全唔係因為而家嘅嘢，仲要寫完就跌咗輪，所以都唔好意思出嚟話中，亦費事貼返文。不過至少我都有再跟進，後來你見Facebook 我有講，美圖走去買Bitcoin嘛，最近重加碼。不過講真我就唔信間公司嘅，而家唔好買了。概乜鬼念股？你睇好Bitcoin咪自己買咯，使乜買1357

每日一圖— ESG當然都係投行大賺。里數計劃值錢過航空公司？

ESG當然都係投行大賺— 一直我都對ESG呢味嘢好有保留（但當然，出嚟行走江湖一定要識係乜），可能個「本意」係好，但必定係造就好多rent seeking，亦造就好多人從中搵食。你可以想像下，啲乜乜ESG評分，由乜人去訂。啲ESG報告，由咩人去寫。全部都係油水。最新花款？當然係ESG ETF，買一堆聲稱ESG好好嘅嘢（點定義？）。但戲肉當然係：管理費就貴過普通ETF了。根本就搞笑，你見啲咩ESG ETF，照樣係買返騰訊 茅台 Facebook．但就可以收貴啲，良心嘛，你唔係唔支持 ESG下話？

里數計劃值錢過航空公司？—即使近期航空股反彈咁多，都仲係咁。又，呢個題目我地寫過！新讀者可以睇。唔止，根本有啲係公司市值仲細過個里數計劃嘅估值，換言之即係航空業務係當負價值嘅。例如我公司市值20億，但里數計劃估值都25億，咪即係啲航空業務係值 負5億。但可以再講深入少少，呢啲里數計劃嘅「估值」點嚟？都真係估，可能係公司公佈里數計劃有幾錢賺，分析員再估間嘢值幾錢。可能係公司用呢啲計劃做抵押品去借錢，咁人地好似賭神咁，拎張瑞士銀行本票，人地信佢幾多億咪幾多億。但個原理有啲似你加按咁，銀行梗係幫你盡量估高啲，到你真係賣出街，係咪仲咁嘅錢？同樣地，你見啲里數計劃從來唔會分出嚟拆上市，係咁值錢做乜唔做？歸根究底，不能就咁A+B=C，你啲里數計劃係因為航空業務先值錢嘛，你航空業務執咗啲里數計劃仲邊有價值？個原埋有啲似你話餐廳酒水利錢高—但我不能間餐廳只係賣酒水嘛。

Good Read — 唔好買NFT唔好買SPAC。43歲集中力就見頂

唔好買NFT唔好買SPAC-又係Reformed Broker嘅文，但真係寫得好。原意係畀啲美國後生仔睇，但其他人都啱睇。好簡單，呢啲咁嘅東西，佢形容係財富轉移，根本唔係「投資」，係有錢人昆你錢嘅各種手法。咁好快美國會派錢，1400美金，佢有叫後生仔唔好買呢啲嘢，拎去做其他嘢。例如教你買套西裝，或者投資在自己身上，甚至煮下嘢，睇場演唱會。

43歲集中力就見頂—畀埋圖你，話埋你知你各種能力或心情，在幾多歲會見頂。So sad．7歲以後，學新語言嘅能力已下降（港媽drink drink water是對的！），22歲後已唔係好記得人嘅名。女人嘅，39歲人工就見頂，男人就48。睇咗都灰灰地，但，都係睇下。

FB Post Summary — 李嘉誠好有眼光，咁你呢？電影節最終版。讀者請食飯雲端版

李嘉誠好有眼光，咁你呢？—算係比較有公共性，主要講李嘉誠長實單嘢。但我真係幾厭煩啲友不停吹奏佢點巴閉。冇錯，係巴閉，但，關大家乜事？而最大問題係，近年股價跑輸晒喎。不過至少都見到股價低迷佢會做啲嘢，但長實長和呢堆嘢，對佢越嚟越唔重要了，你睇Zoom佢有冇放入上市公司益你？又，嗰單刁嘅評論，上次篇文有寫。當然以呢度嘅讀者優先。

電影節最終版—冇乜公共性，就係我今屆電影節嘅最終選片，鍾意可以去捕捉我。同場加映其他電影節嘅故事。

讀者請食飯雲端版—都係冇乜公共性，但有讀者示範咗，真係可以越洋請食飯。越洋用外賣平台幫我畀埋錢再送上我屋企咪得，然後開Zoom齊齊食嘢。科技真係改變好多嘢嘅，唔好話乜，十年前，我估就算有人肯課金睇我寫文，都好難做得到海外讀者。但而家呢度都為數唔少（雖然我冇正式統計），可能有10%？