債息只係回少少。但之後再升影響已冇咁大。美股又炒返新經濟股，點捉？止咗蝕又點算？港股靠非大陸股頂住，但科技股已有支持。講開理文順手講東岳189 (Patreon)

債息只係回少少。但之後再升影響已冇咁大。

美股又炒返新經濟股，點捉？止咗蝕又點算？

港股靠非大陸股頂住，但科技股已有支持。

講開理文順手講東岳189

1. 都唔算咩版務，但你見我咁晏（或曰「咁早」）出文，就知唔係好嘢。亦冇我睇波無關，未神心到四點起身（或唔瞓）睇多蒙特，係四點先得閒寫先順手睇。都係忙啲俗務嘢，之後會好啲。

2. 同埋見到我忽然在Facebook Page出咗好多Post，都係心情有啲煩躁，冇乜特別。啲文幾好睇的。

3. 結果再多一個讀者可以幫手做義工，十分好。而個目錄基本上已搞掂，呢兩日會開放畀大家。畀啲掌聲義工讀者吧。

4. 最後，上週末篇理文化工746仲係未閒寫，但肯定係會寫的，因為已經背後搞咗好多嘢。

5. 呢排好似成日都寫大市，新經濟舊經濟，都真係有啲悶。理解嘅，大家都擔心，或者想低位撈。但希望到個市定返啲，悶返啲，可以寫返啲「抽離」少少嘅嘢。

債息只係回少少。但之後再升影響已冇咁大。

6. 你見美債債息又回落返，即時又全部炒返新經濟股（下面會講）。但，望下個圖，債息只係回少少，納指又升返4%，同債息未抽上之前嘅高位相比，相對估值唔見得平咗幾多。（即係話：同納指大跌前高位比，而家大約跌咗6%，但債息依然升咗一截，earnings yield gap冇平到幾多咯）

7. 短期呢，似乎就脫離咗險境架啦。但正路地你應該會問：債息會唔會再上？會唔會之後又納指大瀉？

8. 答案係：有啲難答。問題一，睇你講短期定長期，短期可能會回落，特別係如果之後出嘅通脹唔太勁。但長期少少，又印錢又派錢，美國今年經濟增長可能可能去到6%，好難想像債息會落返去。

9. 問題二好答啲，唔使太擔心，呢啲東西似「狼來了」，早一個月個個股神上身，當然殺個措手不及。下次債息再升，可能都會見科技股急跌，但應該冇今次咁誇張。

美股又炒返新經濟股，點捉？止咗蝕又點算？

10. 美股方面，照計都唔使我多講，又再返返去幾開心嘅mode（實情如果信CNN Greed and Feat Index，都冇乜點驚過）。你見又變返新經濟跑贏舊經濟。點捉？苦口婆心講，都係兩邊買啦。如果你過去一個月有搞到心緒不寧嘅，咪證明你唔係可以賺到盡嘅人咯。

11. 咁你見到了，成堆咩Yalla Wish 之類嘅momentum 股都彈返晒，大公司PayPal Nvidia ASML都彈返7-8%。

12. 但當然最誇張係Tesla，一彈又跌兩成。但之前高位跌咗三成幾四成喎。你可以問下自己，可以點Set 止蝕？一set必定走咗啦。然後又到560蚊可以買返咁神仙？近乎不可能的。與其搞呢啲嘢，不如之前講咁，賺嘅沽咁啲，整到零成本（當然唔係每隻都得，要升得多升得），剩返嘅有得佢，係咪簡單好多？

港股靠非大陸股頂住，但科技股已有支持。

13. 恒指喎，冇乜好講。走勢極差，單日又再轉跌，信咩國家隊入市又係死得，好心啦，咁大個人，你仲望呢啲嘢打掛，十分被動，亦學唔到任何嘢。哦，國家隊入市所以朝早就升，之後下午又點？又唔入市了？定咁快冇子彈？就算有國家隊，都只係輕輕幫一把，否則就唔會有股災，A股港股冇理由仲未返到當年高位。

14. 但你見同美股差不多，港股都係殺啲高估值股。當然亦因為A股跌得勁（A股本身就多啲高估值嘅嘢）。所以你見支持恒指嘅，差不多全部係啲舊經濟，仲要係非大陸嘅嘢。

15. 你睇友邦1299 匯控5 中銀香港2388繼續都係炒債息升，同埋經濟重啟（友邦仲可以炒埋通關大陸人嚟返買保險）。但吽咗好耐嘅港鐵66都一半年新高，仲有之前有朋友話完全大落後嘅長實1113長和1都連升多日。你見真係唔同時間升啲唔同嘅嘢，夠平自然有得升—而今次已經算易捉，睇到新經濟轉去舊經濟的。

16. 不過呢，既然美股啲科技股都反彈，照計香港今日（星期三）都會吧。見星期二啲科技股走勢都唔係太差。但在你又覺得一切照舊之時，不妨諗下今次你受咗乜嘢教訓。

講開理文順手講東岳189

17. 講開理文，都會想講埋隻東岳（189），唔係叫你買呀下！純係示範下啲基本嘢。之前講呢啲又畀人鬧，但投資唔睇估值唔睇基本因素，咪就係呢排摸頂然後叫救命嘅人咯—一兩隻唔緊要，成個倉都係咁就有問題了。

18. 東岳剛剛出咗業績，好似麻麻，但我亦冇睇街邊預期幾多（仲有冇分析員跟？）。曾幾何時喪炒嘅一隻股票，而家已相當少人講。東岳做嘅亦係化工，當然化工有好多種，而東岳同理文係比較相似嘅，部份產品甚至重疊。咩石油化工嗰啲就完全另一回事。我未細睇，但東岳十分詳細地拆開晒各種產品貢獻幾多收入—理文都有，但冇咁詳細。

19. 想講嘅係，東岳一年先賺9億左右（留意報表人民幣，我幫你轉咗港紙），但107億市值。理文一年賺5億，但34億市值，見到啲估值都爭幾遠下，東岳山值係理文3倍，但純利唔夠double。當然唔係完全有可比性。例如你睇早一年，東岳賺21億，理文先7億，就可能「合理」啲。3倍盈利3倍市值，但，今日嘅市值，照計唔應該睇2019年嘅純利？炒將來嘛，at worst你咪用 舊年下半年估未來一兩年。

20. 又或者，用book value 睇，東岳而家103億book，市值都差不多。理文就44億book，市值34億，點睇都係平啲。而又講開又講，正路地睇盈利好過睇帳面值嘅，賺唔到錢嘅淨資產（亦即係帳面值），有鬼用咩。

21. 不過都係要講，兩間公司真係唔多同。廠都係大陸，但大陸人管理層同香港人管理層都係唔同，或者你可以話東岳比較識sell 自己。加上又好似有間附屬公司上A股。仲有，東岳做唔少出口，理文就冇。而東岳有做製冷劑（即係雪種），理文冇。

22. Anyway，純學術討論，冇叫你買東岳。係買都買理文。固然未必太多人買，但買些少考下眼光甚至學下睇財務報表都好的，個報表唔算難睇，易過好多公司。