道指又新高，仲未汲取教訓？一如所料，市場對通脹過慮。騰訊係一間私募基金。金價差，金礦股仲差。金融才俊就唔好似金融才俊。網上遊戲好多人出術。渣甸重組。MK見工記。東莞好失禮你？FB改版面。祖雲達斯股價大跌 (Patreon)

快評幾句—道指又新高，仲未汲取教訓？

大師冇點你—一如所料，市場對通脹過慮

每日一圖— 騰訊係一間私募基金。金價差，金礦股仲差。

Good Read —金融才俊就唔好似金融才俊。網上遊戲好多人出術

FB Post Summary —渣甸重組。MK見工記。東莞好失禮你？FB改版面。祖雲達斯股價大跌

1. 照舊，今日嘅每日一圖同Good Read都好好睇，好時都好過我寫嘅文。咁我有乜存在價值？又唔係咁講嘅，站在巨人肩膊上嘛，無友不如己者，You are what you read。我總係寧願我睇人地嘅文，覺得個作者勁過我。如果我成日睇文都覺得作者仲差過我，只有兩個可能：一係我判斷能力有問題，高估自己低估人地。一係我日日睇垃圾。Or both．

2. 正如上次講，呢排我覺得講得太多太多大市，新經濟舊經濟，郵輪股JP Morgan VISA 迪士尼，FAANG Tesla Yalla ARKK，講到我自己都覺得煩。所以今日講少啲。

快評幾句—道指又新高，仲未汲取教訓？

3. 星期三晚係幾樣嘢。美國國會過咗拜登個刺激方案，派錢啦喂。不過，最新出嘅通脹數據低過預期。債息就跌返跌。幾樣嘢加埋，當然見到股市反彈—但亦好合理地係彈舊經濟股，派錢點都係有利舊經濟股多啲。

4. 而真係講到煩，根本你見到過去兩個星期都係咁輪換—但亦話唔到畀你知幾時會停，中間好多時有啲假signal，分唔到的。所以你做好你配置，新舊經濟都有，完全唔會煩，你見我驚都冇驚過，亦都完全冇減倉。拿，道指又創歷史新高啦。股災？乜股災？邊個叫你貪心只買新經濟股？（仲要唔細嘅唔買）

大師冇點你—一如所料，市場對通脹過慮

5. 但都係講多兩句，短期我認為係對通脹過慮的，未有咁快見到。派埋錢就開始有機會見啦。

6. 咁話說回頭，之前嘅債息大升，當時都有講過，未必完全因為擔心通脹（耶倫都係咁講），仲有啲技術原因 —星期三晚除咗見到通脹數字低過預期，仲有就係好多人望嘅美債拍賣（你當好似入標咁，大家入用乜價肯買），結果反應OK，債息就落返，有人買嘛。上一次債息急升，亦係因為當時拍賣反應差 — 特登講呢啲，因為有讀者問係咪啲人沽債個債息先上，沽完債係咪買股票。呢度部份答到你—拍賣反應差都會令債息抽上去，唔使有人在街狂沽。

每日一圖— 騰訊係一間私募基金。金價差，金礦股仲差。

7. 騰訊係一間私募基金—應該遲下會寫文講。實情呢個觀點唔新，但列晒出嚟仲係好震憾，騰訊投資咗落好多公司，但重點係，嗰啲公司會另外上市，亦不一定係騰訊附屬公司。更重要嘅係：嗰堆嘢股價都升好多，騰訊賺到笑，例如併拼多多同美團。不過都講過，一般嚟講投資者未必鍾意。我買騰訊係睇好佢嘅互聯網業務嘛，我要買私募基金自己識買啦。

8. 金價差，金礦股仲差—亦係遲下會寫文講，甚至有機會寫我過去一年（個Patreon 8月開）最失敗嘅投資決定。長期讀者知道我開張冇耐係叫人買金，結果當然中伏。但我唔覺得係個好大嘅錯誤，畀我揀多次都係咁揀（而有啲錯誤係可以避免）。但我最想講嘅係，當時話買黃金ETF，有人話有冇搞錯，應該買金礦股，會升得多啲。我當時就話：咁如果跌呢？而家睇到啦（順帶一提，嗰條友就係之前話叫我唔好寫港股嗰位中二病，堅係以為畀12蚊美金—係喎！not even 20或40！—就我要服侍佢一個，另外，呢件事見到，我可以好小器的）

Good Read —金融才俊就唔好似金融才俊。網上遊戲好多人出術

9. 金融才俊就唔好似金融才俊—冇聽過Nicholas Taleb（但講真，投資嘅你，未聽過佢，都證明你知識唔夠廣，冇話不能投資，但不如月供買ETF算），都聽過「黑天鵝」。唔係佢發明，但算係發揚光大。相當好睇嘅一堆書，建議大家睇，但未必人人有時間，我都冇睇晒佢所有書。呢篇係出自其中一本，Skin in the game，Skin in the game簡單地講就係：「高官啲仔女去外國讀書，梗係唔介意搞到教育一鑊泡」。或者「毛澤東就夠真心啦，個仔都韓戰炸死埋」。亦因為咁，勞蘇基金我係自己都會投返至少100萬嘅—冇理由我叫你投50萬，我仲少過你（想知詳情可PM，之前PM咗嘅不用再PM）。但講返呢篇，話你知醫生唔似醫生樣就最好，最好一個豬肉佬咁款。點解？因為佢咁嘅款都做到醫生長做長有，真係靠實力。而有個醫生look嘅，唔一定冇料，但的確比較易蒙昆過關。同樣道理，揀Private Banker當然唔好揀靚仔靚女。呀，你估到了，我都諗起我自己，我絶對唔係才俊look．

10. 網上遊戲好多人出術 — 我們都是偽君子，上網打機好多人出術，點解？出術又好多種，最經典就係用「外掛」。諗起我之前隔離在家睇套韓劇（唔係太差，但用咗十幾個鐘，我覺得唔值），其中一集講富人特權，就用打機做比喻先。你以為努力同有才華就可以贏？但人地用外掛。之但係，有人認為，外掛都係實力嘅一種。睇你點睇。正如點解生在有錢人屋企就唔值得讚，天生靚仔或聰明就咁多人欣賞？

FB Post Summary —渣甸重組。MK見工記。東莞好失禮你？FB改版面。祖雲達斯股價大跌

痴線，大爆發（主要因為杯凍奶茶，MK見工記一post有講），好似啲舊經濟股咁，你以為我唔會點再出FB Post，忽然兩日寫咗六七篇文。咩國際咖喱館嗰啲冇乜特別我唔在呢度貼了。其實仲有篇寫咗，聽日先貼。仲有篇在電話打咗但唔小心畀其他嘢cover咗，undo不能。但我應該會由頭寫過篇。

11. 渣甸重組— 幾「典型」嘅FB Page文。新加坡上市嘅怡和洋行同怡和策略重組（正式嚟講係前者私有化後者）。另外講埋些少歷史，些少英文，同埋些少香港地名掌故史。

12. MK見工記—好短嘅Post，順手交代我做乜因為杯奶茶大爆發。而我真係去咗旺角（其實係太子）見工。時機成熟話你知，但當然唔係去做飲食了。唔做金融仲識做乜？呢次見工經歷極之特別，但暫時唔講得住。不日解封。

13. 東莞好失禮你？—亦係幾「典型」嘅FB Page文。日本野村棄租IFC，東莞銀行進駐。反差太大，加埋東莞，夠晒Juicy．有人以為係我朋友新田飛地地主寫的，但當然唔係，呢篇我認為仲係老幼鹹宜嘅。講到尾，東莞GDP等於成個烏克蘭，大過成個京都府。如果係烏克蘭銀行或京都銀行，你又覺得冇乜嘢啫。大灣區經濟規模真係好大的，成個澳洲咁大嘅經濟體，因為大灣區真係好多人。當然有冇得發圍係另一回事，有得發圍係咪到你又係再叻一回事。

14. FB改版面—半版務，兼且鳴謝各方友好，亦係我嚟緊寫《被炒記2.0》嘅前言。各樣自己嘢炒埋一碟咯。

15. 祖雲達斯股價大跌—雖然係金融角度，但都係好大程度又係足球嘢。果然好趕客，冇乜人睇。但祖雲達斯連續兩年歐聯出局，加埋疫情影響，真係會令間球會有啲地震。