市況不絶望，繼續殺高估值。中銀香港2388 新高（仲有 Visa JP Morgan 迪士尼）。Nasdaq調整史上第七快。企業回購返晒嚟。罪惡股跑出。Jack of Two Trades。我諗我應該收聲。半數數碼訂閱者係喪屍。美圖買Bitcoin (Patreon)

快評幾句—市況不絶望，繼續殺高估值

大師冇點你—中銀香港2388 新高（仲有 Visa JP Morgan 迪士尼）

每日一圖— Nasdaq調整史上第七快。企業回購返晒嚟。罪惡股跑出

Good Read —Jack of Two Trades。我諗我應該收聲。半數數碼訂閱者係喪屍

FB Post Summary —美圖買Bitcoin

1. 有讀者問做乜星期六日冇文，很好，證明係有人睇的。史上第一次甩咗稿，但應該呢兩日會有。主要啲俗務纏身（包括預備見工，wow），同埋原本寫理文化工746，結果越搞越大，寫唔切。但講真亦因為呢篇遲兩日出唔會死，唔係啲大家趕住救命嘅嘢—我唯一擔心係星期一佢忽然升10%—我甚至發夢見到（可想而知我幾咁上心）—但諗真啲都唔怕，因為真係睇到上5蚊甚至6蚊。

2. 另外，感謝讀者義務幫手整目錄，應該星期日會有。再講一次，佢係為大家，我自己keep在電腦反而好易搵。有邊啲讀者好得閒的話都可以我話知的，極多嘢想搵人幫手，但暫時畀唔到咩錢，太少又好怪，所以義務性質，頂多請你食餐飯。

3. 又，今日嘅每日一圖同Good Read依然好睇

快評幾句—市況不絶望，繼續殺高估值

4. 市況繼續都係難捉，但唔係好絶望。況且你睇返舊年，咪就係最絶望嗰時事後見到係最佳買入時間咯，永遠係咁的。當然個過程好難捱，但投資就係咁，你估真係日日上連登就發達咩。

5. 星期五美股個市況相當靚仔，星期一暫時（香港時間十一點半）都仲幾靚仔。留意上星期納指埋單要跌2%（但星期五單日低位勁彈），但上星期道指標指仲有得升—所以both good news and bad news：股災？股乜災？愛股VISA JP Morgan 迪士尼 剛剛都仲創歷史新高，真係唔係Cherry pick 的，你見我講嚟講去都有廿幾隻核心成日講。就只係殺晒啲所謂新經濟股（其實唔少係搵笨）。咁做乜bad news？成個市根本都未好恐慌，唔係舊年三月嗰啲情況。

6. 香港就相當核突了，星期一恒指高開200倒跌差不多600，A股都高位回咗10%。但主要跌啲高估值嘅嘢。經濟有段嘢幾有趣，講有堆藍籌高位回咗20%，技術熊市云云。本身20%唔代表乜，有趣在你估下係邊幾隻？答案係：小米1810，藥明生物2269，吉利175，美團3690，舜宇2382，蒙牛2319，安踏2020同港交所388。有乜共通點？全部都係高估值嘅嘢，並唔一定係新經濟股。

7. 最後分享一樣嘢，在星期一晚蘋果直播都有講。輸錢本係常事，點避免？係避免唔到的。除非你唔買，或者買好細—但亦代表冇得贏。有機會講多啲，但心態上我個比喻好似你打波咁（籃球乒乓都得）—你係要個結果，要贏場波，但你冇可能做到零封對手。重點係你拎嘅分多過失嘅分。投資都係，輸錢差不多不能避免，但你拉勻贏錢就得。咁可能係你十次有六次贏，又或者你十次得四次贏，但贏嘅大大舊，輸嘅輸得少咁咯。

大師冇點你—中銀香港2388 新高（仲有 Visa JP Morgan 迪士尼）

8. 你見到好明顯的，恒指雖然話跌600點，但港股居然仲有一大抽嘢係升的（亦證明跌嗰啲幾咁慘烈），就唔同舊年3月嗰種乜都狂跌，但亦證明個市場唔係好驚，只係殺晒啲成倉科技股（仲要係小型科技股）嘅人。

9. 升呢堆嘢有乜共通點？差不多全部都係金融股，特別係中銀香港2388，之前提過，又52週新高了。記住啦，如果再有新錢嘅，戥返勻你個組合，唔好側埋一邊。

每日一圖— Nasdaq調整史上第七快。企業回購返晒嚟。罪惡股跑出

10. Nasdaq調整史上第七快—呢轉嘅調整，真係只係集中在科技股，但跌得好急。納指由高位跌10%，只係用咗13日。史上第七快。留意史上最快嘅兩次，都係舊年。之後嘅四次就係千禧年科網泡沫。當然之後都係升返，我對納指都有信心，但個別股票就未必。所以有時買指數咪唔使煩（而納指已經好高波幅）

11. 企業回購返晒嚟—2020年前唔少公司嘅股價都由回購撐起，我覺得並無不妥，特別係利息咁低，大把公司發債嚟回購。但2020年就冇晒呢啲嘢，首先公司自己都唔得掂，留多個錢在身，另外有啲拎咗國家救濟，或者要炒人嘅，都唔太方便。然後今年呢排啲回購就返晒嚟—開頭諗可能有啲奇：唔係話債息升咩？冇錯，但首先，唔少企業舊年一早發定債啦。第二，而家股價落咗嚟嘛。第三，疫情叫做過咗最危險嘅時間，最壞情況冇出現，咁啲錢咪鬆動啲。但小心一樣嘢：民主黨有唔少相當左翼嘅人，係相當反對回購嘅。

12. 罪惡股跑出—所謂嘅Sindex，罪惡股。當然你諗起黃賭毒，黃就好少上市（澳洲好似有），賭大把，毒……大麻咯？但呢度唔係講黃賭毒，記住罪惡唔同犯法（sin versus crime，道德同法律），罪惡股多數指：酒，煙，賭。呢排跑贏晒。好簡單啫，呢啲都係舊經濟股，而低估值。仲有賭股更加受惠於炒重啟經濟。

Good Read —Jack of Two Trades。我諗我應該收聲。半數數碼訂閱者係喪屍

13. Jack of Two Trades— 講Jack Dorsey，同時做兩間上市公司嘅CEO（Twitter 同 Square），歷史上都相當少見，亦好多人不滿．而Square 股價跑贏Twitter好多，於是篇文研究，點解佢在兩間公司嘅成績爭咁遠？應該好多人會話，根本兩間公司業務就唔同。咁又係咪即係，根本CEO無關重要？BTW，早排先學識Jack of all trades, master of none呢句成語，學海無呀下

14. 我諗我應該收聲—研究同實驗證明，絶大多數對話，都唔係在雙方想完結時完結。實情就係做個實驗，任啲人傾計傾幾耐，然後問返佢地。結果得2%嘅對話係雙方都想停低時停低。固然有少數好健談嘅人想傾耐啲，但70%嘅人都係想早早完—只係怕覺得唔禮貌。所以下次都係主動收聲好。

15. 半數數碼訂閱者係喪屍—「呢類文我好少share」．唔止講Patreon，係指Digital Subscription as a whole。有一半嘅人，都係訂咗然後唔睇嘅喪屍。何謂「訂咗唔睇」？係指一個月都唔會去一次。嗯。「咁照計嗰啲人都唔會睇到呢段嘢」。

FB Post Summary —美圖買Bitcoin

16. 美圖買Bitcoin—留意係美圖1357，唔係美團3690。間公司好似上市後都冇賺過錢，但蔡文胜自己就變咗加密貨幣專家，話自己有10000個Bitcoin。唔止，而家仲拎埋公司錢去買。咁公司32億人仔net cash，幾千萬美金買下Bitcoin 濕濕碎啦。另外有講埋會計上應該點入帳，舊文講Tesla都有講