市況依然十分難捉。理文化工。FAAMG。債息高但高息股冇跑輸。韓國股市成交多過香港。如何閱讀。捐贈基金係咪玩死大學 (Patreon)

快評幾句—市況依然十分難捉

大師冇點你—理文化工。FAAMG

每日一圖— 債息高但高息股冇跑輸。韓國股市成交多過香港

Good Read —如何閱讀。捐贈基金係咪玩死大學

FB Post Summary —從缺

1. 值得講下，義工讀者幫我整嘅目錄應該好快有，搞掂再通知大家，咁睇返舊文就易好多。

快評幾句—市況依然十分難捉

2. What can I say？如果以指數計，香港美國都唔係跌得多。但即使只係講指數，啲上上落落都極難捉。香港就固然之前梅花間竹一日升一日跌，但星期五卒之斷纜—不過都好誇張，一度都倒升。而主要都係靠啲內銀股，但啲大科企都開支有支持。另外，恒指成個星期埋單係有得升嘅！股災？乜嘢股災？又講一次，係你啲組合問題咯。留意成交都2400億。

3. 去到星期五晚美股仲神化。先係出非農數據遠超預期—但咪話股市同實體經濟可以冇乜關，甚至相反。經濟好嘛，債息即時大升，一度升破1.6厘。道指高開少少後即時轉跌，Nasdaq仲勁，一度跌3%，收市倒升2%。你點捉？真係覺得自己神仙？

4. 教訓？你邊捉得到咁多丫。簡單啲，買完好公司就早啲瞓好過。

5. 不過郵輪股，特別係Carnival就真係唔知做乜，我覺得未玩完的。當然呢啲唔係長渣嘅嘢，真係跌返去我推時嘅水平（23蚊左右）可以真係止蝕嘅。

大師冇點你—理文化工。FAAMG

6. 理文化工固然不用講，連續三日逆上市升，交到功課啦。我估可以升到6蚊？一路會睇住。另外星期六會詳細講，而你見我Facebook Page 又推，instagram 又推（未科勞嘅記得科，FB/IG 都係：ivanliresearch），仲要報紙雜誌我都寫—但我每次都重作一篇的，呢啲咪誠意（同埋，打字快）。你編輯冇可能鬧我一文多投，因為我次次都由頭寫過。

7. 但仲有要講多樣。理文你真係唔會買得多，我都唔建議你買好多。但，堆大型科技股，FAAMG（或者叫FANGMAN，隨你），星期四晚已經有啲偷步反彈，星期五晚更加勇。應該仲有得升。始終呢堆嘢唔似啲喪炒股咁離地，大科企全部盈利幾好，生意又長玩長有，渣呢啲股票先係王道。情人同結婚嘅分別咯。當然仲要有舊經濟股，亦唔好全部美股

每日一圖—債息高但高息股冇跑輸。韓國股市成交多過香港

8. 債息同「股息貴族」走勢背馳咗—又係一個圖有三樣嘢。黑色係「股息貴族相對於標普指數嘅表現」，股息貴族跑贏咪100以上，跑輸就100以下。啡色咪10年美國債息，留意係reverse scale．以往債息低就股息貴族跑贏，債息高就股息貴族跑輸，好合理。但呢兩年就背馳咗，十分奇怪。應該因為之前一年債息低，但科技股太勁，所以股息貴族跑輸。相信有機會股息貴族跑出返？所謂「股息貴族」係指25年都冇減過派息嘅公司（唔容易），甚至有ETF可以買。

9. 韓國股市成交多過香港—之前啲文都講過，韓國股市係一個炒得好癲嘅場。原因不明，但好可能因為韓國人唔買其他地方嘅股票乜滯，又好賭。你睇啲成交額好多時可以多過香港—但韓國股市嘅市值，係香港三份一咋。當然亦同香港有印花稅有關。

Good Read —如何閱讀。捐贈基金係咪玩死大學

10. 如何閱讀—原題The Art of Reading More Effectively and Efficiently，幾好嘅文，主要係講睇書。寫得夠淺白。首先話你知閱讀點解重要，然後講閱讀嘅三個目的，同埋四個層次。最後教你點可以睇到多啲書。

11. 捐贈基金係咪玩死大學—有啲長嘅文。但應該知道美國出色嘅大學絶大多數都係私校。但何來咁多錢？主要係啲有錢校友捐贈，甚至死咗留錢畀學校。但啲錢點滾？因為太大舊，就真係要搵出面嘅人管理。好多大學都有Endowment fund，耶魯基金更係極之出名。但慢慢地，而家好似變咗畀出面嘅各種表現費管理費，仲多過大學拎到嘅錢。

12. FB Post Summary —從缺

13. 只有一個短Post講星期五晚嘅非農就業數據同債息。In case 有人想知我做乜咁忙，答案係：我都唔知。但同工作冇乜關，即係到三月中我正式起身都唔會更得閒。我估係因為1) 呢排多同讀者食飯（一日食兩餐我就用咗六七個鐘），2) 戲院重開睇戲 3) 睇波 4) 多咗啲傳媒寫稿或節目。暫時仲OK的。