「你點知會升返？」。係唔知的。美股大型科企相對硬凈。中銀香港2388 逆市創新高。節目預告—Time is your friend (Patreon)

「你點知會升返？」。係唔知的。

美股大型科企相對硬凈

中銀香港2388 逆市創新高

節目預告—Time is your friend

1. 事忙，都係晏咗寫，雖然除咗有啲讀者係返工搭車睇外，我真心唔覺得會好大分別，一般我寫啲嘢都唔會短到一兩日。今日寫得比較雜亂，但值得睇。

「你點知會升返？」。係唔知的。

2. 市況就當然認真麻麻，都唔少讀者問我應該點。但我啲答案都好可能令人失望，都冇乜可以點。實情問我都冇用架！你期望乜答案呢？唔會因為你問咗我就定返升返。有一期我成日比喻股市係大自然，你就係啲原始人，或者出海打魚咁，好多嘢你控制唔到的。都未夠一個月前先個個股神上身，叫你睇舊經濟股你都未必會理我，對不？

3. 不過我估啲讀者有啲唔止係求個心靈安慰（都重要嘅），有啲直頭問係應該點，具體啲就係應唔應該cut loss？或者應唔應該低位撈或者溝貨？

4. 都係有啲難答，因為真係每個人唔同，但cut loss嘅嘢，一般我都唔係太主張，冇乜用的，到反彈時你更加後悔。反而低位諗下買嘢，十分正常，但都係只能分段。聽聞美股上星期四先歷史新高，咁而家可以有幾平？5%回調咋喎。

5. 納指係高位跌一成，今年升幅全數報銷，但，只不過係咁咋喎。舊文寫過，恒指都一年平均35%上下波幅啦。點解成日講呢啲悶嘢？因為大多數人都低估股市嘅波幅。

6. 然後我大可以再貼list of US market corrections，（例如呢個）不過都係唔貼，免得你話我煩，反正仲有機會再貼。舊讀者應該睇過，新讀者可以Google下。想講嘅係，早排我講呢啲，都好多人明。但針唔拮到肉唔知痛，道理還道理，冷數字還冷數字，到你自己嘅股票咁跌，就唔同感受啦，對不？

7. 寫過一堆2020教訓（事忙，唔搵舊文了，或者等週末義工讀者搞掂個目錄），但就算你冇睇舊文，你都知道舊年3月4 月係買入良機—但事後睇先易。而家5%你都叫救命啦，當時係一個月跌35%．個情況同啲人諗「嚟多次沙士就買樓」，實情係嚟多次好多人一樣敢買，即使你有能力。但，股票有一樣嘢好，你可以分段買，唔使買樓咁一鑊過訓落去。（BTW，但點解好少人買股票致富？因為太易沽。買樓嘅人係唔會升10%沽出街的，可以坐到幾倍甚至幾十倍）

8. 事實的確係，呢啲5%嘅調整，經常都有，甚至美股10年牛市中，20%調整都見過，2018年嗰次真係玩死好多人。「但唔包括我」。當然如果假設「股票總係會升返」，而你信嘅，咁應該大家都知唔使驚。但點解仲咁驚？應該係兩個問題：第一：個市升返啫，我啲股票唔係。第二，你點知一定會升返？

9. 第一個問題比較簡單，因為都好大程度係個人問題，你啲嘢唔夠分散嘅，就有呢個問題，與人無尤，當然升嗰時可能你跑贏好多（例如你成倉都係Tesla），咁咪食得鹹魚抵得渴。但我自己就必定有返咁上下係買返指數基金—唔好同個市爭太遠，唔好以為自己醒過個market好多。

10. 第二個問題有趣啲，可以去到好哲學嘅層面。「你點知一定會升返？」。簡單啲答，「之前都係咁」。但，羅素雞嘛，之前美股長升長有，但你點知之後都係？你點知唔會變日本？你點知你點知你點知？ 答案係，我都唔知，知就發咗達。但首先世界都係樂觀者嘅，呢個係我嘅信念。另外，印咗咁多錢，總唔會個個股市都跌掛，咁你當年全部買晒日本，或者十幾年前全部買A股—又當然係你個人問題啦，講到口乾，分散嘛，但好趕客，人人都想一注獨贏。呀仲有，舊文都寫過，即使變日本，你月供日經指數，都唔係真係咁災難性嘅。（事忙，唔搵舊文了，或者等週末義工讀者搞掂個目錄）。

11. 補多句，我接觸嘅讀者中，照計十分睇好中國嘅，唔多（又留意：你鍾唔鍾意同睇唔睇好係兩回事）。若果係咁，似乎你都係唔應該bet against America？埃汾並不特別鍾意美國，但佢好多領域都係最出色嘅，亦吸到最好嘅人材，最好嘅公司。如果企業長玩長有，股市點都跟返上去吧？

12. 日本股市迷失N年，除咗當年估值太過份（邊個話估值唔重要？），亦真係因為啲企業失咗競爭力，好多嘢都畀美國中國韓國搶咗去—再講一次，呢個同你或我嘅個人喜好無關。你可以好鍾意日本貨，但現實係日本公司可以有幾賺錢？日本酒店都用海爾TCL電器啦，市場是好殘酷的。

美股大型科企相對硬凈

14. 美股方面，走勢係幾難睇嘅，你見到啲新經濟股固然差，但舊經濟股都跌唔少。元兇依然係啲債息，亦係好好嘅教訓，我記得我應該早兩個月一直講：當然唔等於你會避得開，但至少你唔好以為「估值冇關係」「有人買就會升」。講到尾都係值搏率，而呢幾個月我都覺得唔多值搏。

15. 不過，總有相對性。我留意到，星期四晚科技股都跌得好甘，但反而啲大科企開始見底反彈。我估如果市定落嚟，都會係呢堆嘢跑出。呢堆咁嘅嘢，生意依然好堅挺，業績又冇走樣，但已經靜咗好耐。應該又會有人留意返。

中銀香港2388 逆市創新高

16. 咁另外，都費事又玩「大師冇點你」。但的確，理文化工746之類做得好好。不過現實，好多讀者唔會買，買你都買唔到多，直接啲講就係唔會點幫到你減低損失。只係示範下都總有啲其他公司可以睇。雖然我寫呢隻嘢好大程度係私心：唔係講我同管理層friend（好耐冇聯絡），而係我算係熟呢間公司—更重要係冇乜人熟，comparative advantage

17. 但正經少少，講多兩隻嘢（其實主要係一隻）。咁你見中銀航空2588租賃都升到52週新高，之前寫過的。但同上面講理文化工一樣，係有讀者買，但買得幾多？我都唔會叫你買得多啦。況且我覺得而家已唔值搏

18. 比較有趣嘅係中銀香港2388（BTW，呢隻嘢同2588嘅關係……係冇乜關係，兩間嘅大股東都係中國銀行3988，係咁多）。香港冇人不識。呢隻就可以買得多，我都知有啲冇咁年輕嘅讀者，甚至係上市渣到而家（2002年左右之嘛，冇你想像咁耐）。固然後生嘅讀者未必鍾意間公司（不過我估呢度啲讀者分得好開？「我見個個都用富途」「仲要好多人買中資股」），但正如頭先所講，你鍾唔鍾意同間公司掂唔掂係兩回事，（不幸地間公司掂唔掂同股價又有時唔係同一回事）。如果真係以為人人杯葛拎晒啲存款間銀行唔掂嘅，咁你就真係同現實相當脫節了。唔好畀你嘅喜好影響你嘅判斷，or even worse，唔好畀你啲網友影響你判斷。

19. 講咗咁多，中銀香港2388都升到52週新高。但你見極少會有人講，係去到昨日大跌市佢仲要逆市新高先有人講。冇法，成堆巨無霸科企熱炒，連中資銀行（包括佢老母中國銀行3988）都冇乜人理，何況細細間嘅中銀香港？但真係陰啲陰啲，你見2月頭先22蚊左右咋，而家30蚊都嚟緊。

20. 升乜？你應該估到，正係債息。再加上炒舊經濟股，炒經濟復蘇，銀行壞帳少返，幾合理。

21. 個重點並唔係叫你而家飛入去，而係早早你就應該唔好側重晒某啲嘢。咁你啲倉位會冇咁難睇。煩氣講多次，固然好多時風險大回報大，但實驗見到，大多數人都係升市嗰時就心雄，但跌少少就叫救命的。你滿倉新經濟嗰啲叫晒救命—咪證明你根本受唔到咁嘅風險咯。

22. 呀仲有，如果堅持唔買中銀香港嘅，都冇乜問題，我又唔係同佢有親。其實恒生11都係咁嘅故事。不過恒生波動冇咁大，仲悶，但同一個道理。況且兩隻嘢都有啲息派—又可以回帶講，舊年愚人節匯豐彈弓手宣佈咗派息都唔派，又搞到唔少人好大件事，因為話退休靠嗰啲股息喎。我在Facebook寫當然都畀人媽，但根本係疚由自取：唔係講匯控股價得唔得嘅問題，而係你退休人士冇收入，所有被動收入只靠晒一間（近年做得相當麻麻）嘅銀行派息？你唔覺得有問題？例如當時你有一半係買咗中銀同恒生，情況已經好唔同，至少有啲息收下。

節目預告—Time is your friend

24. 搵日寫，或者週末寫。「又話寫理文化工？」「咁可以寫兩篇嘅」「不過睇我近排嘅繁忙程度應該機會不大」。但，睇咗呢個表，應該可以說服你睇少啲股票機。投資係一樣好奇怪嘅東西，唔一定你成日留意就會好啲。舊年2月3月你放兩個月假去咗南美旅行唔上網，包保對你啲投資決定好有幫助。