日升日跌，新經濟舊經濟，美股港股，好難玩，但當係學習吧．郵輪股，理文化工．債價跌得幾甘下。以前債息升利好科技股，而家唔係。黃國英論股災。Ray Dalio論泡沫。 (Patreon)

分析員或基金經理應該鍾意呢啲市況，見到真章嘛。而如果你啲組合冇側死某啲行業，又或者側死一個市場，就應該冇乜嘢。如果你個組合係太集中嘅，之後諗下點搞啦。順帶一提，冇話一定要沽咁啲嘢，例如滿手美股唔想沽嘅，咪未來嘅新錢買港股咯。提多句：呢啲市彈嚟彈去，你10%就止蝕嗰啲，好易震走冇仇報快評幾句—日升日跌，新經濟舊經濟，美股港股，好難玩，但當係學習吧

大師冇點你—郵輪股，理文化工

每日一圖— 債價跌得幾甘下。以前債息升利好科技股，而家唔係。

Good Read —黃國英論股災。Ray Dalio論泡沫。

FB Post Summary —郵輪股，理文化工

1. 多謝讀者問侯，實情完全冇事，有事就唔會天未光起身寫Patreon再去請O靚食壽司啦。而我卒之亦都清晒部份之前我未睇嘅email，覆晒所有PM，以及處理晒所有勞蘇基金嘅查詢

2. 新讀者可能唔知係乜，得閒寫篇勞蘇基金FAQ，暫時睇住FB Post先。而家大約100人，距離我目標400人仲係相當遠，未必搞得成，但亦冇乜嘢，唔係咩我由細到大嘅夢想，或靠佢開飯。咁啱有人提議，我咪試下。

3. 仲有，真係多謝讀者做義工，幫大家整個目錄：即係遲下會有個地方或者有個Post，記低晒我在呢度出過嘅文，標題，日期，同埋link。我自己在電腦搵反而唔難，所以佢係幫咗大家。如果佢同意嘅，搞掂後我會話畀大家知佢係邊個，致敬吧。真係義工，無償的，我應該請佢食餐飯。

快評幾句—日升日跌，新經濟舊經濟，美股港股，好難玩，但當係學習吧

4. 同早幾日寫差不多，市況好難捉模，陰陽怪氣。就係標題嗰幾句。你見星期一晚美股好勁咩，星期二晚又幾難睇。你見星期二港股好核突咩，星期三又大升。仲有，如果你順時間睇，仲神奇。星期一晚美股好勁，星期二日頭香港就難睇，到星期二晚美股差，星期三日頭香港又大升，之後星期三晚美股又差。完全唔知想點。

5. 而你睇板塊更加係奇奇怪怪，主要都係玩返啲舊經濟股，香港升700點，主要係啲內銀同資源股。美股JP Morgan又新高，但納指跌得幾勁，但又寧寧舍舍Bitcoin之類又唔跟堆科技股跌。

6. 但如果真係分析員或基金經理應該幾鍾意呢啲市況，見到真章嘛。而如果你啲組合冇側死某啲行業，又或者側死一個市場，就應該冇乜嘢。如果你個組合係太集中嘅，之後諗下點搞啦。順帶一提，冇話一定要沽咁啲嘢，例如滿手美股唔想沽嘅，咁你咪未來嘅新錢買港股咯。

7. 呀，最後提多句：呢啲市彈嚟彈去，你10%就止蝕嗰啲，應該好易震走冇仇報。不過止蝕雖然overrated，但「止賺」先係真係吹脹。

大師冇點你—郵輪股，理文化工

8. 真係得意之作，特別係Carnival。新讀者未必知，但2月19號叫買，當時23蚊唔夠，而家差不多30蚊，半個月唔夠。而真係唔少讀者贏錢，例如以下呢位，我又會拎佢上FB 做生招牌了。冇法，月中開始冇得撈，靠晒Patreon了，要啲新讀者訂閱費夠填冇咗嘅人工。至於幾時沽得？睇昨晚嘅文吧。

9. 昨晚仲有寫理文化工，星期六先詳寫，但見到都有讀者買咗。當然唔只係升少少啦，我推親嘅嘢好少叫你一兩成走。4蚊點都預睇到上6蚊吧，可能今年內？到8月中期業績再望下，當然你可以睇實啲 哥士的同哥羅芳價（大陸嘅價啦）

每日一圖— 債價跌得幾甘下。以前債息升利好科技股，而家唔係。

10. 呢期大話題都仲係債息升（即係債價跌，息口同債價相反方向）而科技股跌，兩個圖都係呢個主題。

11. 債價跌得幾甘下—呢個圖幾好，只講債息升都好似唔全面，特別係以前3或4厘而家1.5厘。咁睇債價亦得，圖係ishare其中一隻美債ETF，紫色線代表由高位嘅調整幅度。今次都調咗近20%，好誇張下，過去近二十年都只係有兩次有咁勁。所以股市點會冇反應？我甚至覺得反應唔算大（但集中在啲科技股）

12. 以前債息升利好科技股，而家唔係—呢類圖因為比較三樣嘢，比較Advanced 一啲，有時唔小心你會理解錯，我希望我冇錯。啲數字係 10年美債債息，同埋「標普500相對於納指表現」嘅關係。唔知講乜？咁我用文字解下，你見多數時間都係負數，即係債息升嗰時，多數係納指跑贏標指，新經濟跑贏舊經濟—但，今次唔同，今次係比較少見地正相關，仲要個相關系數史上冇見過咁高。即係話今次債息升，科技股嚴重跑輸，以前從冇見過咁。點解今次唔同？我估都係估值，太誇張了。

Good Read —黃國英論股災。Ray Dalio論泡沫。

13. 黃國英論股災— 你見我都耐唔耐會講黃國英（我報紙雜誌專欄提得更多），的確覺得佢係勁人，寫嘢亦好。例如昨日呢段，同我寫嘅差不多（但我冇抄佢）。遲下會再寫，但雖然美股近十幾年長升最有，但你估下，咁多日子之中，美股有幾多%嘅日子係升？答案係大約53%。但你拉長到一個月，一年，升嘅機會就大好多。詳情之後再講，但個精髓係：短炒Day Trade 捉升跌，根本只係畀買大細好少少，買完即刻升，比你想像中少，有四成幾機會你買完隻嘢都跌。日日睇反而自尋煩惱。亦正如黃國英講，根本連5%調整都冇，做乜個個叫晒救命？你見我上蘋果節目，見啲友啲倉全部都係啲所謂「增長股」，實情係喪炒股。咁梗係叫救命啦。哦，買得大賠得大，但你見嗰啲友發達未上岸未？

14. Ray Dalio論泡沫—Ray Dalio仲有趣，幾年前未有咩Cathie Wood David Portnoy美國連登仔 Elon Muks等等呼風喚雨之前，Ray Dalio都算係相當有影響力，對沖基金之王嘛。佢本書（Principles）同啲片都幾多人睇，但呢一兩年就冇乜江湖地位了，因為佢隻基金表現認真差，「可見識講同識炒真係兩回事」。但呢篇文都仲係幾好睇，用不同指標去同你解美股有冇泡沫，甚至問咩係泡沫。我傾向同意佢答案：只有少部份嘅喪炒股係泡沫，成個市就唔係。值得睇。

FB Post Summary —郵輪股，理文化工

15. 冇打錯，但同「大師冇點你」係一樣的。實情呢兩個課題我在Facebook Page又貼多次，將來都可能會，冇得撈冇糧出，要搵Patreon新訂戶嘛。但當然一定係Patreon講咗先啦。另外，我唔會懶到就咁copy and paste，你見我係由頭寫過，可能角度有少少唔同，你得閒嘅可以睇多次。仲有，當然啲文仲會有啲其他嘢啦，如果齋係賣廣告嘅我就唔會呢度貼多次。

16. 理文化工—除咗講公司，同埋李公子外，亦都講埋點解我被炒「告急」咗三個月都未起身，順手講埋啲「通知期」

17. 郵輪股—同場加映講我在英國讀Master嘅東西