理文化工746，8厘息有增長嘅工業股．巴郡股價新高．郵輪股逆市升．GameStop 2.0—Rocket？ (Patreon)

理文化工746，8厘息有增長嘅工業股

巴郡股價新高

郵輪股逆市升

GameStop 2.0—Rocket？

1. 有啲唔舒服一早瞓咗，結果朝早起身先寫，請諒。市況嘅，麻麻地，陰陽怪氣，日升日跌咁，美股都係。雖然對分析員或基金經理嚟講，呢啲情況先好。阿豬阿狗都股神嘅，使鬼研究分析咩。

2. 亦因為呢排寫得太多心法嘢呀，資產配置呀（聽到悶未？），叫你檢討下呀咁。今日就寫下啲個股同偏門啲嘅嘢。

理文化工746，8厘息有增長嘅工業股

3. 只能講句童年回憶返晒嚟，今日講下呢隻746理文化工。如果真係識我好耐嘅可能會聽過。不排除今個星期六寫篇深入嘅。但簡單講兩句先。

4. 一句，夠殘，而業務改善中，管理層應該係信得過嘅。實情舊年大冧市應該即時諗起呢間嘢。唯一問題？呢啲small cap，仲要工業股，已經被市場遺忘了。

5. 檔嘢好簡單，香港人管理層，但在大陸做化工的（氟化工，in case你知係乜）。廢話少講，自己睇數字。剛剛出咗業績，2020下半年同上半年比，改善一個開。亦因為啲化工產品價格上升（當然化工產品好多種，不能一概而論，佢地公司都生產好多椑，但例如呢種嘅價格不錯），今年農曆年後都反彈中。

6. 舊年下半年都3.5億，正路地，今年公司純利會上到7億以上，甚至8億，咁都近年新高了。但股價？2018年6蚊，而家3.8（舊年3蚊都冇）。計下數，而家30億市值，7億利的話真係4倍PE，即使以佢地本身，都好似相當殘。

7. 亦可以睇埋個表最後兩行，因為種種原因（環評呀，關係呀），所以你見啲產品雖則冇乜品牌可言（賣畀其他廠，唔係零售客），但毛利率一路都三成幾。當然做廠啲折舊呀 利息開支呀（有債的）重啲，但純利率最差都有雙位數，好景時去到近30%。

8. 呀仲有，有啲息派的。當然唔好當好似公用股領展咁，但如果冇記錯管理層都一般派30%息，咁你見即使舊年（2020，剛出嘅業績）都有0.24，2021年冇理由會少過呢個數，咁都0.24/3.82= 6厘樓上。實情你問我呢，既然估佢純利會上返7億，咁你睇返2017-2019年純利有7億，派息冇試過少過0.30，應該估2021年派至少0.30都幾穩陣。差不多8厘息。

9. 詳情星期六講，我絶對係識管理層的，曾經幾熟，同佢地去過英國見鬼佬添，但最近N年都冇乜聯絡，頂多啲業績會我會去刷下存在感。所以絶非打手或微信女股，冇任何利益或來往。

10. 如果睇本地波嘅知道理文足球會，會知邊個李文恩，呢檔嘢正係佢嘅，我亦係見佢。留意理文有幾檔嘢，當中有關乜係星期六先講。

11. 咁當然，只係買少少好啦。反正成交都唔多，但過癮的。第時如果真係勞蘇基金可能就會買，順手去質問管理層（即係，又搵佢去食飯，或者睇下波）

12. 風險呀？都係嗰幾味咯，你知啦，大陸嘅嘢，但管理層咁多年都冇乜領過嘢。仲有，當然係人民幣強對公司好啦，大陸經濟好對公司好。頭先講話市場已經冇乜人睇呢啲small cap工業股就事實，但至少個息應該大機會派到（但當然唔係寫包單，呢個世界冇穩穩陣陣8厘息的）。我覺得最大風險係：如果周街股神時你隻嘢唔郁，心理上係好難受的。所以買少少好了。

13. 拿，呢啲就價值投資啦，不過難聽過粗口的。分分鐘玩得幾年私有化。但重點都係盤生意OK，息又派到，管理層唔會點出古惑咯。

巴郡股價新高

14. 講開價值投資，當然要講畢菲特。同價值投資一樣，而家講畢菲特真係難聽過粗口，何況仲有契媽Cathie Wood 上位（實至名歸嘅），阿豬阿狗都講科技股，仲畢菲特？你見以前巴郡業績好大件事，給股東的信好多人講，而家已冇乜人理。

15. 我的睇法嘛？又係嗰句，而家啲人睇嘢好極端，一係講到畢菲特都不外如是只係好彩（呢個講法佔多數），一係依然堅持股神點掂。我就認為兩者冇矛盾：佢以往嘅表現真係神級，問題係世界唔同咗，難以複製，而近年嘅表現的確係麻麻地。

16. 之但係，講到尾，佢要為邊個負責？當然係佢嘅股東。好多人忘記咗巴郡係上市公司。咁一間近年好似投資成績麻麻，又差不多只買舊經濟股嘅公司，居然股價都創新高，係咪估唔到呢！咁，真係算有交代啦。（留意返：巴郡嘅投資跑輸大市，同佢股價跑輸大市，唔係同一回事）。

17. 又不過，知唔知點解巴郡股價咁強？股票唔會話你知點解升，但我認為：正係因為回購。畢菲特之前話唔回購，固然而家都打倒昨日嘅自己，但有何問題？最緊要對得住股東。

郵輪股逆市升

18. 昨晚（星期二）美股啲走勢都幾難睇，我個monitor list 都十隻有九隻跌。不過如果我冇睇錯呢，隻CCL又上返近期嘅高位了，相信仲有得玩。

19. 但有少少難搞嘅係，呢啲真係唔係可以坐幾年嘅嘢，都係周期嘢。咁幾時落車？我會反而係睇時間，唔係股價。大約你見到啲友真係出發上船，你就可以沽晒佢了。或者見到網友都講「嘩啲友都低能架仲敢坐」，就差不多。

20. 認真啲講，好可能股價係玩到夏天？見到美國話5月就有足夠疫苗畀晒所有成年人（當然，係咪個個打係另一回事，而仲有小朋友呢？）

21. 另一新聞，夠晒吸睛，講美國GDP增長可能上返10%—嘩，但唔出奇，季度嘛，同埋之前低基數。況且，清醒啲，咪講咗N次，經濟好唔等於股票好啦。但照計呢啲消息都會利好舊經濟股多過新經濟股。

GameStop 2.0—Rocket？

22. GameStop嘅鬧劇本人當時講得好清楚，我亦冇買，亦冇叫過你去買。當時又講到乜撚改變世界華爾街之戰，又話對沖基金爆煲要狂沽其他貨會系統性危機，結果唔夠一個月已經WFC。單單都講到核爆級，但只係講得幾日，絶對係而家呢個時代嘅特色。

23. 高位買嘅當然中晒伏，但又講真估唔到而家股價仲有3位數，呢排又低位彈返啲，當然你問我，完全唔好買。但最初我叫完全唔好買GameStop時你去買，都應該有錢賺，隻嘢當時好似60蚊。

24. 講真，「你想去賭我係不能阻止你的」。有隻Rocket，昨晚升咗70%。又係同樣嘅故事，夾沽空云云。我就傾向唔信的，呢啲嘢點會可以重演第二次？你見股價盤後都跌返，唔似GameStop咁喪升。叫做畀你有個知字。冇叫你買呀下。其實只係大約40% short interest．