債息升震散科技股，資金走去舊經濟。郵輪股！亞太金融股依然大落後。失業率越高美股越勁。債市歷年表現。點解歐洲冇ClubHouse，點解gig economy都係女人搵少啲錢，點樣無痛提升生產力？Just Another SPAC (Patreon)

快評幾句—債息升震散科技股，資金走去舊經濟

大師冇點你—郵輪股！

每日一圖—亞太金融股依然大落後。失業率越高美股越勁。債市歷年表現

Good Read —點解歐洲冇ClubHouse，點解gig economy都係女人搵少啲錢，點樣無痛提升生產力？

FB Post Summary —Just Another SPAC

1. 很好，似乎我已經走出咗冇Mood嘅低潮期。點解冇Mood？真係唔知，並冇發生咩事。亦冇咩特別事就好返。當然啦，你見冇Mood都好我一樣日日交足文。收錢架嘛，唔通冇Mood就唔使寫？

2. 話埋你知，今日嘅每日一圖同Good Read都幾值得睇

快評幾句—債息升震散科技股，資金走去舊經濟

3. 都真係唔使我多講，過去一兩星期都不停講呢幾樣嘢，而家應該真係見到個趨勢。Reflation trade，債息升，科技股軟，冇盈利嘅特別插得勁，舊經濟好啲。另外債息升，而長短息差越拉越濶，點都對銀行有利，匯控低位升返咁多，唔係因為估聽日業績會派息（鬼唔知會派咩），JP Morgan一樣新高，之前提過。

4. 港股嘅，你見個走勢真係極難睇，高開400點低收300，好多啲新經濟股狂跌，如果你講細嗰啲，而家唔好追了。但返返去咩ATMXJ反而有得守，你見夜晚期指都回穩咗。

5. 另外見到成交破紀錄，3000億。但大市又唔係跌好多，見到係一個大輪換。都講過中移動941之類係悶，但真係極殘又派到息，去到某啲位就有人諗了。匯控樓上講咗啦。仲有就係一堆地產股都升得極好，當然係開始炒復蘇，遊客返嚟，經濟活動回升。

6. 美股情況差不多，你見隻迪士尼仲要創新高！但啲科企回得好急下。仲有啲航空股郵輪股喪炒。下段再講。

7. 但再講一次（講到你覺得煩為止就得），唔係叫你 all or nothing咁換晒去舊經濟。只係個配置上可能調返啲，或者有新錢而又幾隻股票想買，不如諗咗舊經濟股先。

大師冇點你—郵輪股！

8. 拿，真係冇點你啦。星期四寫星期五升嗰啲都唔計，因為你唔夠時間買，但今日仲有得升。郵輪我估仲有得玩，Airline反而未必—因為美國有國內線，都開返唔少，低位已彈唔少。

每日一圖—亞太金融股依然大落後。失業率越高美股越勁。債市歷年表現

9. 亞太金融股依然大落後—呢期比較多人留意都係金融股。一來舊經濟，二來息差改善。而你見到亞太區嘅金融股，都仲係大落後於大市。照計銀行股就最簡單。但當然可能只係呢一浸，銀行股好難可以長升長有，時代唔同了。BTW，聽日匯豐出業績，我應該會在呢度寫幾段。

10. 失業率越高美股越勁—吾友陸振球在明報貼嘅圖（咁佢都係搵其他圖啫），但幾有趣，真係見到失業高嘅年份，美股表現就好。我未深究係計年頭定年尾定平均。但，呢個咪就係我地成日講嘅「股市脫離實體經濟」咯，根本一直都係咁，只係某啲人想當然覺得個世界「應該」點點點。固然好多人知道今次係因為印錢，但你見以前未有印錢都係咁的。其中一個原因係：股票炒預期嘛，而失業率就滯後於經濟。所以失業率高時，經濟應該好快見底，股票就炒定先。

11. 債市歷年表現—都真係少講債，但理論上大家應該分散嘅（雖然在香港好多時係樓VS股，外國先有債VS股）。講下個表，Barclays指數，度債券價格表現。可以睇到唔少嘢。首先，好少可負回報，但今年暫時就係！點解？因為債息升。記住舊文解過，債息同債券價相反方向行。第二，點解多數年份都係正回報？因為過去幾十年，債息大趨勢係向下，7/80年代講緊15%，而家1.5%都冇，都話債息同債券價相反方向行。但仲有，以前啲回報好高，80-89一年平均12.4%，之後每十年都係低啲。2010-19年只係得3.7%—但留意，未扣通脹。扣埋差不多得個桔。安全係有代價的。

Good Read —點解歐洲冇ClubHouse，點解gig economy都係女人搵少啲錢，點樣無痛提升生產力？

12. 點解歐洲冇ClubHouse—亦係講歐洲冇乜StartUp嘅問題，但Social Media特別嚴重。要解釋點解美國掂唔難，但抖音（真係勁的）示範咗唔係美國公司一樣可以風行全世界，歐洲（含英國）就冇藉口了。睇我文都耐唔耐有講呢個現象。今篇講三個原因：第一，歐洲輕視Social Media，亦冇成功先例（埃汾按：雞與蛋）。第二，投資文化，歐洲人都係比較難接受間公司長期蝕錢（埃汾按：同上）。第三最有趣：liquidity quality。令到開頭班用家極之迷上你嘅東西，例如ClubHouse早期主攻矽谷創業者，呢班人肯試新嘢又有錢有影響力。點解歐洲唔得？因為地域，仲有語言。

13. 點解gig economy都係女人搵少啲錢—Gender Pay gap就不用講，大家都知，亦有好多原因。但比較有趣嘅係，啲零工經濟gig economy，照計免除咗好多「歧視」，你總不能因為個步兵係女人而畀平啲，大台派單亦應該唔睇性別。但點解仲係女人收入少過男人？答案係：因為「機會成本」唔同，或者話reservation wage．女人肯接啲低價嘅工作，底線較低。不過又留意返，gig economy嘅gender pay gap，低過傳統工作好多—問題係，只代表齊齊都拎最低工資（甚至冇）。

14. 點樣無痛提升生產力？—有啲廢，但都可以一睇。講點解有啲人做嘢咁痛苦？因為覺得悶。「拿如果你份工係有趣嘅你咪唔辛苦」。問題係，鬼唔知咩，絶大多數人都覺得工作冇意義，悶。咁教你點做？「咁你打少啲機睇少啲鹹片」（佢真係咁寫！）「因為同呢啲嘢畀就乜工作都悶」。仲教你習慣下沉悶，「你悶開就發現工作都好過癮」。嘩大佬，搞到咁，好辛苦啫！不過文入面仲有其他比較有建性嘅嘢。例如教你點樣令工作more well defined

FB Post Summary —Just Another SPAC

15. 卒之有文出！但真係主要因為Patreon！因為唔想次次都話從缺。

16. Just Another SPAC—久休復出之作。美股啲SPAC真係妖象橫飛，之前有隻叫LMFAO，呢隻就直頭叫Just Another Acquisition Corp．同場加映我對SPAC嘅種種質疑（所以只會揀某啲），再同場加映講 《點解咁好笑》《笑星救地球》《周日床上的顧西蒙》等等。老嘢先識。