Tesla買Bitcoin賺咗11億，多過咁多年賣車夾埋。但根本入唔到帳。 (Patreon)

離一離題，但講返本人買咗GTBC（趕時間可唔睇）

Tesla買Bitcoin賺咗11億，多過咁多年賣車夾埋

重溫下會計點處理一般上市公司投資：AFS，HTM，Trading

會計佬當Bitcoin係Goodwill咁處理咋！跌就蝕，升就冇得賺！

會計規則，就梗係落後於時代啦。搵多啲人買改變佢咯

離題：勞蘇基金都可以買Bitcoin喎，應該（趕時間可不睇）

TLDR：Tesla買Bitcoin，半個月帳面已賺咗11億，多過咁多年賣車夾埋。但有冇諗過，呢啲gain幾時先會入帳？可能有排都唔會。實則現有會計制度幾反智：Bitcoin跌就公司蝕錢，但Bitcoin升公司就唔會有錢賺—除非你沽咗佢。不過又冇乜所謂，反正，有邊位係因為Tesla賺錢而買佢股票的呢？

＝＝＝＝＝＝＝＝＝＝＝＝＝＝＝＝＝＝＝＝＝＝

離一離題，但講返本人買咗GTBC（趕時間可唔睇）

1. In case 有人miss咗，本人之前買咗Bitcoin，都係要同大家講返—正確嚟講係買咗GTBC，應該唔算太標題黨？總投資係4萬港紙（哈！有時咁少錢都唔好意思講「總投資」！但我幾時都話注碼重要。可能會加到10萬，但唔會去到40萬……啩），暫時獲利不錯，但唔係重點，升10倍都未夠我退休（不過夾埋其他嘢就夠）。至於有人問點解唔直接買Bitcoin，主要係怕煩，諗到啲咩Wallet乜乜已經覺煩。不排除第時會，但暫時冇打算。反而呢排上市嘅BTCC可能會買。

2. 再講一次，呢個Patreon同埋我Facebook Page都冇打算討論 Bitcoin前景呀乜乜之類，因為一講就會好煩，亦唔想同人解釋做乜「轉軚」。你知公海啲讀者水平比較低，邊似真金白銀支持我嘅你地咁高質？所以呢篇文係講Tesla，同埋會計，仲有些少關於Bitcoin（及其他so called 加密貨幣）在上市公司財報上嘅技術問題。

3. 如果心水清嘅，會發現我買GTBC嘅日子2月10日（係呀，一買咗就同讀者講，咁大件事（！））。剛好就係Tesla公佈買之後（留意唔係Elon Musk買，雖然佢係大股東，但上市公司同個大股東都係兩回事）。你話我跟佢買？就冤枉了！之前個幾月一路「想買」，亦唔企停留在「想」嘅階段，真係去做，只係因為搞緊戶口嘅東西。所以知道佢單嘢時我真係媽咗出嚟。但冇所謂，好似升多咗一兩成？我都係照買。舊文都有寫，當call option，搏升十倍一百倍，或者total loss，所以區區一兩成一萬幾千我唔會care。情況同我11月中叫大家買 Tesla一樣（呢單真係代表作），嗰時股價已升N倍，知道入標普指數再升多10%，但我好多時可以唔畏高（雖然唔係所有時間都係）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Tesla買Bitcoin賺咗11億，多過咁多年賣車夾埋

4. 好，正題。Tesla 2月宣佈買咗Bitcoin，Technically係佢地交上美國證監嘅文件有提，所以係已經買咗。總共用咗15億（美金，下同）。

5. 15億美金係咪好多？都唔算太多，否則董事會都未必批（係，都話上市公司同Elon Musk本人唔同）。如果冇睇錯，公司大約194億現金，咁減返54億負債，net cash 138億。呢15億佔11%左右。雖然之前一路話整車燒錢，但首先公司股價一路都強，集資話咁快就拎到幾十億（所以，上市幾咁重要！）。況且利率低迷亦幫咗公司好多。而同公司嘅市值7500億美金比，呢15億投資更加濕碎（雖然應該同book value，或者現金水平比）

6. 公司買嘅平均成本唔知，但有提到係1月入面買，所以你就當係1月入面嘅平均價都得。計計數，就由1月尾計起。當時Bitcoin 33,000，而家57,600。升咗75%。一個月唔夠。難怪而家講股票一年升兩成畀人恥笑，個個都股神（但做乜仲未發達？）

7. 既然升咗75%，即係15億變26億，獲利11億啦。假設冇沽過的話（冇人知，但只能咁假設）。

8. 11億美金獲利係幾多錢？係好多錢！有幾多？已經多過晒Tesla咁多年本業嘅純利！反正Tesla咁多年只有一年賺錢，正係舊年，但亦不過係7億，未及今炒幣（OK，投資）半個月嘅錢。之前更加係年年蝕錢！

9. 但，你見Tesla股價反而係冇乜起色。最初買Bitcoin時股價反應都唔正面，除咗覺得冒險，不務正業外，亦有人覺得呢啲正係Tesla技窮嘅表現。呢啲任你講，但股價的確冇乜起色，而家800蚊都冇，年頭見過差不多900蚊喎

10. 咁當然啦，一般嚟講股價應該同盈利有點關係。但啲新經濟股打破晒呢啲「廢老」定律。雖然都唔係破得晒，個講法都係話而家蝕錢，但築起咗好大嘅護城河，第時就一統江湖大把錢賺架啦。一個例仔係亞馬遜，N咁多年都燒錢蝕錢係咪？股價照升到癲。但去到呢刻，公司市值16000億美金。但舊年賺210億喎！76倍市盈率，又似乎唔係好過份？當然有冇咁多間亞馬遜就另一個課題。

11. 既然由頭到尾Tesla升都好似同賺唔賺錢冇關，咁所以，似乎Bitcoin大賺幫唔到股價，都唔出奇？

12. 況且仲有一樣嘢：上面都有講，唔多唔少投資者好怕同幾憎公司不務正業。當然有例外。但例如有啲實業公司買股票贏好多錢，投資者都係未必鍾意的。原因好簡單：股票我唔識買？我買你間乜乜零售就係信你個在你行業掂，唔係想你拎啲本業嘅錢去炒股票。你咁多錢點解唔派返畀股東？你公司錢啲投資，未必係股東鍾意嘛。況且，A股東鍾意，B都唔鍾意啦。一係你放返入本業，一係你咪回水，等我自己買股票。（雖然Tesla呢個case，我估唔少股東都贊成，但唔好忘記而家係標普500公司，買得最多嘅可能係啲被動基金）

13. 同樣道理亦適用於咩「上市公司捐錢」「上司公司做慈善」。而家講有啲過時，但傳統右翼新自由主義（甚麼列根戴卓爾佛利民楊懷康之類），會覺得上市公司根本唔應該捐錢做呢啲嘢—並唔係慈善唔啱，而係，我自己唔識做慈善咩？我投資你間公司唔係想你代我捐錢喎（仲要你就威水我就冇份）。我要捐自己唔識捐？

14. 所以同理，「我要買Bitcoin自己唔識買？」。你買Tesla都係信電動車啫，又唔係要Tesla先買到Bitcoin（但話說回頭，傳統車廠唔少亦不務正業，日本公司自己圍威喂交叉持股就固然，但德國保時捷都係炒衍生工具的，另文講）

15. 不過呢種「不務正業」有一種例外：我係股東當然唔想李嘉誠去做兩個鐘義工，因為佢啲時間太寶貴。但，如果有助公司形象又唔同。同樣地，如果Tesla嘅情況，大家都知，有名人效應嘛。佢買15億Bitcoin，好大機會令到多好多人會跟，自然就可以獲利。似乎亦係。

16. 之但係，嚟到我地文章最重要嘅部份啦：你有冇諗過，Tesla在 Bitcoin上賺嗰11億（暫時），係有排都唔會入帳架呢？甚至係升就冇得入，跌就要入帳蝕錢。咁反智都得？就係咁反智！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

重溫下會計點處理一般上市公司投資：AFS，HTM，Trading

17. 舊Post寫過但唔算太詳細，所以重溫下上市公司如果投資其他嘢，會計上面點處理。好似後來改咗啲例，但我已經冇做大佬好耐，有錯更正，但應該唔會太大錯。並唔係你想像中咁簡單，升咗10億咪10億profit，跌咗5億咪5億loss

18. 舊Post用嘅例子係保險公司，因為佢地就係有好大舊投資組合嘅公司（你睇下平保渣住5-6%匯控，但都只佔佢成個組合好細部份）。但原理應該對其他公司都適用，例如張國榮（唔係唱歌嗰個）間建滔都好鍾意買股票，之前買因航添。

19. 一般點處理？如果冇記錯好似分三味，Trading，AFS（Available for Sale），HTM（Held to Maturity ）．而如果冇記錯，股票不能係HTM（因為冇到期日！）。咁有乜係HTM？債券咯。債券都係投資嘛，但本文不討論。

20. 首先講大原則：當你賣咗佢，當然就埋單計數，賺蝕幾多即時會同當時在帳薄上嘅carrying value比（但留意，not necessarily 係當年個成本價，睇埋落去就明）

21. 但如果唔賣呢？就最煩了。上市公司每季或每半年出一次數嘛，咁使唔使mark to market？升咗跌咗使唔使反映？答案係：睇情況。

22. 如果係HTM嘅東西，就唔使mark to market的，好似。一日唔沽嘅，升幾多跌幾多，中途都唔會見到。如果係Trading嘅呢？就全部每季／每半年mark to market一次，升咗咪有profit 跌咗咪loss，你隻嘢最初100蚊年中50蚊年尾80蚊，咁你上半年就會有50蚊虧損，下半年30蚊利潤，全年埋單蝕20—雖然你根本冇賣到。

23. AFS呢？最過癮。都係每季／每半年mark to market．「咁咪同Trading一樣？」。唔同，因為呢舊東西唔會在profit and loss/income statement （英式美式叫法，同一羨嘢）見到！同你間公司賺蝕無關。咁會去咗邊？有會計101常識嘅會知道有問題，你隻嘢係asset，mark to market冇咗20蚊，profit and loss又冇，咁點平？答案係：直接在個equity/book度扣咗！寫中國人壽篇文就講呢樣嘢，所以有時啲保險公司明明賺錢，但個book value縮咗一截！

24. Last but not least，留意如果你啲嘢價值大跌（幾大先叫大就……有啲酌情權了），咁即使冇賣都要／都可以一鑊過mark down．即使你隻嘢係HTM都可以。例如你當間公司已經破產，你隻bond 100蚊跌到5蚊，就會幫你當打靶一樣咁了。當然實務上好多公司利用呢啲嘢去big bath, kitchen sinking，乜都一鑊過write down 晒

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

會計佬當Bitcoin係Goodwill咁處理咋！跌就蝕，升就冇得賺！

25. 好啦，Tesla係點處理啲Bitcoin？Trading, AFS定HTM？答案：全部都唔係！唔使同我講你「覺得」應該點。呢個世界暫時都仲講法律，暫時你啲數都要會計師睇。Tesla上證監嘅文件寫，唔使鳩拗。不代表Tesla完全同意呢個做法，但只能咁做。下面我引嘅圖係上證監嘅文件，只係用咗FT嘅文字，清楚啲，但同原文係一樣的。

26. 呢度寫得好清楚了，正如我上面講，根本唔係Trading，唔係AFS亦唔係HTM？因為根本買bitcoin唔當係investment！再講一次，你唔同意係你嘅事，可能Tesla都唔同意，但法律暫時係咁。

27. 寫到明係乜啦？係indefinite-lived intangible asset。無限生命嘅無形資產。即係乜？你當好似無限期嘅專利咁。或者係無限期嘅Goodwill（再講一次，好撚憎將Goodwill譯做商譽，我知係官方咁譯，但官方就唔鬧得？因為好多唔識嘅人都當真係「品牌」，錯晒。FB舊文寫過好多，自己搵。但簡單嚟講， Goodwill就只係你溢價買嘢返嚟嘅一個腫瘤，搵舊數塞住個balance sheet，而最後都要全數將佢打靶消失）

28. 係喎，就係咁咋，唔當係投資，甚至唔當係貨幣，雖然個名叫「加密貨幣」。留意美債就當cash and cash equivalent，唔會好似intangible asset咁要做impairment test。「雖然明明阿根廷披索仲波動過Bitcoin」

29. 咁講埋啦，當咗係intangible asset，要點處理？就好玩咯。同其他intangible asset一樣，要每季做一個impairment test。如果係Goodwill嘅，咪可能計下，喂，你間公司買完返嚟走晒樣喎，仲邊值嗰時嘅錢？write down 啦。類似咁。留意，似乎係唔容許有write up嘅。你間公司買返嚟勁過預期？「除咗恭喜我唔知講乜好」。原因？可能同會計原則都係寧可保守有關。

30. 咁Bitcoin點impairment test？反而簡單喎，日夜都有報價嘛！易搞！甚至易搞過上市公司！（你諗下如果咁啱季尾時隻嘢停咗牌然後出單好大嘅負面新聞咁點計數？）

31. 講實際啲點做啦，33000成本嘛（大約），就用成本入帳。寫到明，如果期內嘅報價（lowest price quoted）低過呢個價，就當輸錢咯，impairment loss. Fair enough right？雖然冇講呢個lowest price quoted係指乜，平均價？定收市？intra day？有啲走箋（但不能太離譜，例如touch wood趺到20000甚至2000就唔到你拗）。況且，Exchange，邊個先？（但同上，不能太離譜）

32. 咁跌咗要輸錢，好合理丫。真正過癮嘅係，升又點算？答案係：升又唔係咁計喎！唔好以為升咗就有gain！係冇的！話知你升到30萬都好！都唔會有得gain！相信亦同唔會有goodwill gain嘅原因類似。好反智？都幾架。幾時去會計師公會示威？講真的

33. 更頂癮嘅係，例如跌咗落20000蚊，咁你嘅成本就會落咗去20000蚊，有impairment loss．之後返返去33000嘅「舊成本」又點？答案一樣都係唔會有gain

34. 所以都冇嘩眾取寵！是真的，跌就會蝕錢！升就唔會賺錢。唔呃你。

35. 當然，可能聰明嘅你諗到Tesla book gain嘅方法：賣咗佢（唔使賣晒）。冇錯，你賣咗就一定有profit 計落去。但15億照計都好難一下賣出去，當然可以慢慢沽，食唔食得起就係另一個issue．而可能Tesla沽貨嘅消息傳出去都會打沉Bitcoin個價（留意係消息，唔係佢賣出去嗰下—如果市場深度食得落的話）？但留意，公司冇任何義務要話你知佢沽咗，只需要每季報告，理論上可能佢而家沽晒，你都要下一個季報先知。反正亦唔係佔公司資產好多，沽晒都唔使公告。

會計規則，就梗係落後於時代啦。搵多啲人買改變佢咯

36. 不過又唔使咁灰，正如我上面講過，乜你買Tesla係因為間公司賺錢咩？間公司從來都冇乜點賺錢。可見呢幾年都唔會見到可以賺一百幾十億掛？又有乜關係？反正公司盤數一向都夠亂，都寫過，賣車嘅「本業」甚至一路都蝕錢，往年你見到啲「盈利」係嚟自carbon credit

37. 況且，投資者自己識計數嘛。一個唔該啲Bitcoin升幾百倍幾萬倍，大過Tesla嘅市值幾倍幾十倍咁，投資者先理得你「會計上」個數啦。正如N年前啲會計處理，其實冇咁多mark to market，變咗有啲老牌公司 大半世紀前買落嘅物業或者股票都用緊當年嘅cost．所以N年前就可以發掘呢啲禾杆冚珍珠嘅Hidden Gem，看似垃圾原來啲物業／股票好值錢。但後來乜都mark to market就冇呢支歌仔唱了.

38. 最後一講，似乎啲會計處理的確有啲問題，唔多公道，唔係我自己買咗GBTC先咁講。你唔當係貨幣，OK。你甚至唔當係股票債券等等投資，都合理。但照計應該當佢好似係啲藝術品投資咁處理掛？不過藝術品點處理我都唔係好肯定，有先例（香港有啲公司幾鍾意做），但未得閒細睇。不過，Bitcoin既然周圍有報價，又相對易買賣，點都係近似傳統股票債券，多過乜乜名畫。

39. 咁但就係咁架啦，會計規則呢啲，當然係跟唔上時代咁快的。我估會好多人push for change．咁但，似乎係要更多上市公司去買先迫到改變。咁即係更加應該買多啲？至少Tesla好有動機去叫多啲其他公司一齊買。唔使多，最緊要有。

離題：勞蘇基金都可以買Bitcoin喎，應該（趕時間可不睇）

40. BTW，奇想。遲下詳解勞蘇基金，但簡單講，50萬港紙入場，2%管理費20%表現費（唔係特別平的）（但留意唔係我袋晒，可能得一半落我袋）。但好可能會類似中原博立Larry洪龍荃同紅猴簡志健咁搞（利申：同Larry有part過但佢應唔記得我，紅猴就唔識的）。都話一定攞正招牌做，唔會大家講個信字。

41. 留意下佢地隻嘢啲terms（留意，我個fee收得貴過佢地，但講真對你嚟講一年只係爭2500蚊，況且佢要80萬入場）：係可以買香港，中國同美國上市嘅股票同ETF。呀？理論上可能連隻GBTC都買得。唔係話佢地會買，而係理論上第時個勞蘇基金都可以買？當然GBTC係咪叫「股票」就問下律師。但例如黃國英個基金都有買的（不過佢個mandate好似濶好多，唔止中美港，日本股都買得，可能我都會傾）

42. BTW：佢地亦有講佢地檔嘢唔會沽空—不過，買反向ETF似乎係容許的。我檔勞蘇基金都應該係唔會有沽空，但似乎亦係可以買反向ETF。

43. 照舊，十劃未有一撇，好大可能好似旅行團咁，夠人先成團，所以唔好話「等我開張」先叫你。因為唔夠人可能唔開張，雞同蛋。目標籌夠1億港紙，即係50萬X 200人，暫時大約50人有興趣，但有興趣不等於就一定科水，所以未有耐齊飛（但當然我會一路做其他嘢，亦都未全力宣傳，都未在Facebook講）．當然如果有人一次過包起1億就更好，好似小巴咁即時開車。

44. 所以一樣，有興趣嘅PM我留個名。之前留過嘅唔使再留。細細聲講：真係唔夠50萬嘅都有計傾嘅，但當然唔好爭太遠。講真50萬點都唔算少錢，set呢個OK高嘅門檻係有原因嘅

45. Lastly，「勞蘇基金」只係一個……稱呼。第時隻嘢一定唔會係叫「勞蘇基金」，否則一定畀迪士尼告到甩褲。如果我連咁嘅常識都冇，你都唔好科水畀我。