（必睇）如何可以避免升少少就急急腳走咗而又唔使驚爆煲。循例講返個市：股災？What 股災？ (Patreon)

（必睇）如何可以避免升少少就急急腳走咗而又唔使驚爆煲

循例講返個市：股災？What 股災？

（必睇）如何可以避免升少少就急急腳走咗而又唔使驚爆煲

1. 今日奇怪啲，呢個「必睇」都佔咗2500字。大市就只係講幾句，「當然埃汾嘅幾句即係再多1500字」。正路地星期四會回復返平時格式（唔係星期三，星期三出Good Read 每日一圖咯！）。

2. 印象中我冇乜點用過「必睇」呢隻字，大家知我用字比較克制。恒指200點唔係股災，2000點都唔係。埃汾嘅Facebook Page唔係「坐擁」15000 粉絲，而我屋企亦唔係「佔地」400尺。誇張嘅用詞係作者對自己冇信心嘅表現（甚至係作者廢嘅表現）

3. 講返，睇圖。呢度嘅Patreon讀者嚟的，當然我經佢同意先貼。點解貼？唔係為笑佢，而係好多人都面對呢類問題！正如郵輪股一樣，好多時我諗嘅嘢，而又同時有讀者講起，就好大機會寫。缺一應唔成事。（in case有人想知，佢「三單」都係差不多故事，不用重覆了）

4. 你見我第二句已經「教訓」佢，梗係冇勤力睇Patreon啦。重覆一次：賺少少走，大忌。好大件事。原因我講過，好嘅股票可以升幾倍，唔會太難（當然唔係隻隻），等於你打咁多年牌總會食到次十三么大四喜。正如事主隻江西銅都升大半個開啦，好短時間咋喎。另一問題：你總會在某啲股票損手的，一個唔該甚至輸過半，八九成都有（例如狀棍隻DDD，舊文寫過）（記得like 佢Page，我朋友嚟的）。咁條數好簡單：我贏嘅股票升一兩成就走嘅，點夠填輸嗰啲？

5. 當然以上係理論，咁你冇睇就梗係你問題（話你呀事主）。但有睇都未必做到，知易行難。所以以下教你點樣可以好啲去執行，好似女人大肚咁，「陀得穩啲」。

6. 第一樣嘢，廢但必講，唔好借錢。買得大賠得大，有100蚊應該訓90甚至100，但去到借錢訓150/200嘅，十居其九都死。雖然有例外（例如拎政府失業貸款！聽日解！），你按層樓嘅就好啲，因為息平之餘，仲唔會追你，唔使斬倉。但目測呢度唔係太多業主。

7. 正題，咁事主問，除咗止賺止蝕嗰啲，有冇準則可跟？我答佢：近乎冇。根本連咩止蝕止賺我都唔信。止蝕還好，止賺真係不知所謂。點解要止賺？難得把到個靚女／靚仔，拖兩下手就走人返屋企自己睇波？

8. 但我完全明個心態的，去到事主咁快走就太極端。但如果隻嘢升一倍呢？仲唔走？「跌返落嚟點算？」。跌返落嚟你咪會後悔自己冇走到咯。啱。當然個盲點係：再升十倍又點？我發現好多人係唔夠想像力，唔信股票可以升幾倍。但想像還想像，現實的確會有呢種問題。

9. 其中一個方法：買啲好嘅公司。呢句廢廢地，因為往往事後先知。但你問心，大約都知你嘅horizon有幾長啦？直接啲講，有啲公司，你自己都知伏啦。咁短炒一轉冇問題，但自己清醒嘛。例子？例如有時我會寫嗰啲博入恒指呀（星期五又有了！），或者11月時講Tesla入標普指數呀，甚至你走去買GameStop（先唔講結果，講動機先）。有乜共通點？都係sort of event driven嘛。你自己都唔信間公司有將來啦（Tesla嘅情況有啲特別）。

10. 極端少少，早兩日寫郵輪股，都係算係呢種：郵輪係十分周期性嘅生意。點分周唔周期性？好簡單，你見例如國泰293 之類，而家啲利潤（如有），都未突破十年廿年前，亦好合理地見到股價都係咁。但有啲公司，港交所388騰訊700，而家嘅利潤係當年N倍。呢個就係分別。當然有時事先根本唔知，以前以為TVB千秋萬代添，2006年你同人講雷曼爆煲人地以為你白痴。但問心，你應該知郵輪唔係果種長玩長有嘅股票。郵輪呢個例子當然唔係炒幾日，可能炒幾個月，半年都仲得—但唔會係幾年，對不？ 係喎！長線係講緊年計的。

11. 補充一：留意可以「長線」嘅股票不一定係科技股，FaceBook （network effect）Apple（品牌/生態圈）呢啲固然係，但港交所冇乜咁高科技，LVMH都冇乜咁高科技，甚至P&G之類都長玩長有。就係以前我講過嘅「護城河」，你門生意長玩長有，唔易有對手入場。

12. 補充二：買中股票但買貴一樣可以中伏，你呢排追啲科技股（即使係有盈利嘅）都知呢個問題。雖然理論上間公司有前景嘅，總會慢慢升返上嚟。「但你睇下你2000年買咗亞馬遜要坐幾耐」。而講真，你心知肚明，Tesla係咪仲可以升10倍？大過晒成堆科網龍頭加埋？

13. 好啦，真係執行策略。應該好多人聽過，但照講，初學者多。「放風箏」「斬邊留邊」「零成本法」，唔係同一回事但有啲關係。

14. 「放風箏」（其實係紙鷂，是但）有講過，另外兩樣少啲講（我以為好基本）。「放風箏」嘅，好簡單，咪有得佢慢慢飛高，特別係升市，做乜自己斬佢落嚟？

15. 但到有啲明顯調整，呢幾日嘅市況，咁點？升咗好多，高位跌返唔少，咁我應該點？再唔放又怕贏錢變輸錢好難受（我明），但放咗又驚佢升多幾倍我仲難受（我都明！）。點判斷到？

16. 答案係：根本好難。所以你可以點做？就係「斬邊留邊」「零成本法」。或者我講嘅「保留票房睇大結局」。當然大結局呢味嘢，同我自己花心鍾意集郵有關，唔使賺到盡，但最好有我份。你由我去買GBTC就知，another story．

17. 離題少少講，呢啲都符合我一貫作風。人生上投資上好多嘢，我都唔係最早嗰班人，但又唔會係最遲。一般都冇頭啖湯，但仲有啲嘢分到畀我，唔使食餅碎或餅碎都冇得食。具體啲？包括我打金融工啦，包括我買樓啦，我搞Facebook Page搞Patreon買科技股啦—我唔係最早，但至少有舔過下有啲嘢拎走到。投資係反映你性格的。玩得幾年股票一定知。

18. 講返，實務上點「斬邊留邊」「零成本法」「保留票房睇大結局」？直頭畀個實例你：我當你11月中，睇咗我篇文，飛入去買Tesla．事實真係唔少讀者有咁做。你飛入去買嘅成本應該470-490左右。為方便計數，當450蚊，唔好駁古。

19. 然後Tesla有挫上挫落，但我一路叫大家唔好沽。咁某日去到900蚊（掂過下），咁都有讀者問。我就叫佢沽一半。點解係一半？你應該計到數了。當我最初買10股，450蚊，我成本係4500。上到900蚊，堆貨值9000。我沽一半，5股X900，收返4500蚊嘅成本—封晒蝕本門先。之後掉走唔睇都得，好彩嘅佢仲有得升幾倍，唔好彩嘅變廢紙都唔關我事，當發場夢，但至少我唔使輸錢。

20. 咁你話：喂，如果再升10倍我咪賺少一半！係！但邊有得咁著數？你拎返個成本，然後仲有一半睇埋結局。萬一隻嘢升多幾倍，你係賺少咗—但至少有丫，好過升10%沽晒佢。

21. 拿，真係唔好玩嘢呀下。唔好再問如果乜乜乜又點點點。冇萬能方案的，除非你有水晶球。但以上呢種做法，我試過，其他讀者都試過，一般都係令你瞓得比較好嘅方法。算係最平衡upside downside了。總好過你走去set 咩20%止賺。傻的嗎？你自己都唔信間公司，點搵大錢？set 50%可能好啲，但原則冇變。

22. 盲點？「喂如果我隻嘢唔係升100%呢？點玩？」。一樣得，不過冇咁好玩。例如升咗五成，你一樣可以沽一半，或者大半。自己計數。亦唔一定係玩到零成本。但個重點始終係：頂！你啲人點解諗嘢咁極端咁非黑即白嘅呢？點解只存在沽晒同渣晒？沽一半唔得？四份三呢？

23. 唔沽晒，咪有得睇結局咯。你沽剩四份一都好，至少隻嘢真係升幾倍，你都有份。而我發現咁樣對你心理會好啲，好過你沽晒一個仙都唔關你事。

24. 渣晒你又驚變廢紙，沽晒又驚佢變神仙，咪一半半咯。至少隻嘢升十倍時你可以同人講「最衰我買得唔夠多！如果唔係……？」「不過好彩我都未沽晒，而家都仲可以……」。你諗下，係好過你沽晒然後「頂，Tesla？200蚊我買過啦！拆股之前呀！」（冇錯，我嘅真人真事。咁首先我都會犯錯，二來我係因為轉工之類，所以做分析員其實係好煩的），又或者你渣到一手都係然後隻嘢爆煲「唉嗰時有得走又冇走」—你走咗一半都仲可以講「好彩都走咗一半」。

25. 係幾無聊的，但人心理就係咁。本大師實情對各種bias或者behavioral finance都好有興趣（稱不上「好有研究」）。記住，呢啲係人性，加埋你自己性格，好多時改唔到的，你只能認識佢，減低佢嘅破壞。

循例講返個市：股災？What 股災？

26. 大市就只快手講幾句。但你由我可以只講幾句就知，「太陽照常升起」。好驚咩？冇驚過。但掉轉，飛入去撈底？你咪又望下啲指數跌幾多咁大把。恒指仲要有幾百點升，30000點都未穿。股災？舊年一個月跌三成就股災，咁快失憶？至於跌10%（3000點！道指恒指都係）都不過係nothing．

27. 當然你只係渣啲喪炒股，就叫救命啦。但呢個肯定係你問題，不重覆煩氣了。我想講嘅係，股乜災？唔指睇點數，睇埋啲個股。港股嘅，升300點丫。可能冇你啲嘢份（想實有份？買啲盈富基金2800！我都有唔少！）。

28. 但，新地16銀娛27金沙1928港鐵66中石化386全部52周新高喎！仲有一大堆地產股，澳門股，航空股，都係炒疫苗重開旅遊之類。我知讀者多數好少買呢啲，冇相干，亦唔係叫你而家買。我亦唔係夾硬搵啲升嘅股票（升300點大把嘢升）。我係想講：呢堆嘢，全部都唔係咩防守股喎（港鐵勉強算係）。你都未見到啲資金泊晒去公用股領展，股乜災？頂多只係新經濟股股災，仲要主要係冇盈利堆喪炒股（科指都不過跌1%），咁食得鹹魚抵得渴啦。講真，日日上連登抄契媽功課就發達？世界上有咁簡單嘅嘢？下次記住配置好啲啦，唔好側埋一邊。

29. 當然港股仲要一手一手咁買，對於冇乜錢嘅初哥，係一個問題。但美股你冇藉口啦掛。讀者同我講股災乜都跌，但原諒我就係包拗扭嘅樂觀派。股災？What 股災？你買WISH咪股災（冇錯，我推的，事已出）。但，JP Morgan 迪士尼仲破頂喎！呢兩隻唔係防守股下話？！只係由新經濟轉舊經濟咋。

30. 美股就真係差過港股（BTW，再講一次，舊年幾多人當買美股必定無敵？Patreon我寫港股畀人叫我唔好寫仲兇我話唔訂添。今年呢？邊個跑贏？）。但即使納指都只係跌1-2%。我有數據在手但懶查，你可以睇下1%嘅調整，根本成日出現，no event．Facebook VISA Netflix （都係我平時寫開嘅公司，唔係特登搵啲升嘅講）之類仲有得升喎，股乜災？舊年2/3月嗰啲就股災啦。

31. 呢啲咁嘅嘢，全部唔係咩好意外。當然唔係會發到達或避到，但我意思係：通脹預期升溫（本身唔係壞事）債息大升（就比較煩）拖累股市大調整，講咗好一排啦，唔止我講，亦唔係風水佬咁講足三年先中，好快見到。想講嘅係：呢啲調整你應該習慣，當係練習—到你遇到舊年嗰啲一個月跌三成你先會容易啲對付（但都冇得寫包單，不過都係嗰句，我過去幾年，一股都冇沽過，連斬邊留邊都冇。舊年一個月跌三成我都冇驚，何況而家？）