繼續港股跑贏美股，抽新股幾時爆煲？契媽股，二線科技股。仲有電影股，保險股每日一圖—如果摸頂月供日經指數會點？香港股票交投係倫敦4倍！乜都可以monetize。UBER有冇修成正果嘅一日？ (Patreon)

快評幾句—繼續港股跑贏美股，抽新股幾時爆煲？

大師冇點你—契媽股，二線科技股。仲有電影股，保險股每日一圖—如果摸頂月供日經指數會點？香港股票交投係倫敦4倍！

Good Read — 乜都可以monetize。UBER有冇修成正果嘅一日？

FB Post Summary —從缺

1. 昨日嗰篇好似比較多錯字，冇法，睇完波十分眼瞓，年紀大好覺。今日呢篇就夠晒份量

快評幾句—繼續港股跑贏美股，抽新股幾時爆煲？

2. 港股繼續係有力，恒指7日升咗2000點，跑贏晒美股了，冇北水又如何？升勢亦都幾健康，你見匯豐升得一日但又有其他接力。舊年嗰啲串到話我寫港股就唔訂嘅，唔知有乜感想（我係好小器的，呢件事我在呢度寫咗三四次）。

3. 美股你睇指數都唔係話好差（早排先新高！），但個別啲冇乜盈利嘅科技股或熱炒股跌得幾甘。都合理嘅，風險胃納收縮，就梗係唔要咁多夢想，搵返啲有生意有盈利嘅股票。之前提過啦，債息升。點解債息升？驚通脹。所以文真係最好篇篇睇，環環相扣—但可以週末一鑊過嘅。

4. 可以補多句嘅係，上次寫過個劇本跟足2009/1982年，亦都預呢排要抖氣，結果真係。所以有時呢啲嘢都有啲參考價值的。不過咁，有「專家」話對通脹擔心過慮—我都傾向同意，亦冇話去到3%通脹就世界末日要加息，乜乜通脹目標根本可以隨時改。不過市場當然驚定先，況且啲嘢亦唔平。

5. 下段會講港股，相對地呢排都易玩。不過又提返一樣：抽新股固然好玩，但我就唔太主張做孖展嘅。你玩分身一家四口現金抽就還好，孖展嘅好易出事。例如最新隻諾輝，升1.6倍，但孖展頭槌客都仲要蝕！something is wrong la．仲要呢排市況旺先咁咋喎，你話如果中途忽然間射飛彈股災跌返三四千點（10%咋喎，唔好講舊年咁30%恒指跌10000點），你啲新股會點？你仲要分到一手都係。

大師冇點你—契媽股，二線科技股。仲有電影股，保險股

6. 移卡9923呢啲真係pretty simple，跟住Cathie Wood買嘛，暫時都幾易玩，ARKF嘛，仲要同時係呢排喪升嘅二三線科技股。另一隻眾安6060都係有得再升，但呢隻冇推過，就唔計入我功勞啦。我都仲有少少廉恥的。

7. 至於啲二三線科技股就不用講啦，玩極都有，而家到微盟2013同美圖1357。咁當然微盟易玩好多，亦都成日講。美圖就大上大落，但升得仲多。

8. 同樣地，仲有堆電影股，貓眼1896提過下（恒生科指成份股呀！），華誼419就一路冇推過，亦唔計數啦。

9. 不過順手再講，見到大落後又有力嘅，就係保險股。首先係升咗太平966同太保2601（完全唔同嘅公司！）。但正路當然係買平保2318。

每日一圖—如果摸頂月供日經指數會點？香港股票交投係倫敦4倍！

10. 如果摸頂月供日經指數會點？—應該真係會寫篇文，但畀咗結論你先：即使30年前高位開始個個月供日經指數，首先絶大多數時間都仲係好過銀行（況且佢假設銀行有1厘息都應該做唔到），到而家更加係2倍於銀行。咁你話，頂，30年先咁咋喎，人生有幾多個30年。咁首先多數讀者都仲好後生，第二我地已經講緊好大鑊嘅極端情況，咁都唔係太差吧？而最後：所以咪叫你唔好揀死一個市場。「會唔會個個市場都咁？」怕且唔會卦，印咗咁多錢。

11. 香港股票交投係倫敦4倍！—要澄清返我並不特別討厭英國，但亦冇特別鍾意（雖然我在英國讀Master）。咁喜好呢啲嘢就好個人，但經常見到有人講英國有common law所以金融中心云云我就要掃下盲：實情英國咁耐都係行common law，但倫敦變成金融中心係因為八九十年代行嘅Big Bang．事實上，如果講股市，香港成交過去年都多過倫敦，而家更加係倫敦嘅4倍！但又不過兩樣嘢：首先，不代表英股唔值搏（我覺得今年會不錯），台灣成交就夠少但股市不知做得幾好，根本係兩回事。第二，「咁香港大條道理加印花稅啦？」。

Good Read — 乜都可以monetize。UBER有冇修成正果嘅一日？

12. 乜都可以monetize— Monetize嘛，變現，不過講英文好似易明啲。留意變現不代表會「有錢賺」，但至少係「有收入」。UBER（下面講）就變到現，但冇錢賺。Clubhouse暫時就「變唔到現」，但應該可以。講返篇文，交友軟件Bumble最近上市，表現不錯，CEO兼創辦人當然招積。比較特別嘅係佢係一個女人，係少見的。佢就話你知，只要你對嗰樣嘢夠熱情，又夠好，就實有方法變現—我不盡反對，但諗真啲有啲滑頭—你變唔到現嘅，即係你未夠好咯。例如寫Patreon咁。

13. UBER有冇修成正果嘅一日？—好文，講返UBER業績同燒錢情況等等。本身冇乜特別，但：呢條友寫UBER寫咗24篇！有心機嘅就由頭睇到尾啦下。

FB Post Summary —從缺

14. 牛年都仲係冇貼過任何文，但應該會有了。