冇北水都2200億成交喎。港股一個字：大落後。大陸影視股：華誼419阿里影業1060。美國債息彈到1.3%，當然有利銀行股，但大市麻麻地。加印花稅，港交所388仲有冇運行？ (Patreon)

冇北水都2200億成交喎

港股一個字：大落後

美國債息彈到1.3%，當然有利銀行股，但大市麻麻地

大陸影視股：華誼419阿里影業1060

加印花稅，港交所388仲有冇運行？

冇北水都2200億成交喎

1. 年初五Ivan 唔使返工（仲未離職的，但公司唔知做乜放假），但港股美股當然市已開。特別想講嘅唔止係北水放假恒指都升到近600點（好大程度靠隻匯豐5），而係冇北水都仲有2200億成交—你可以諗下之前覺得只係北水托住嘅有幾錯，人講你又信？

港股一個字：大落後

2. 港股方面相當強，6日又升返1600點。繼續都係啲二三線科技股。玩到去閱文772恒騰136之類，都係邊隻落後玩邊隻。另一方面你又見到啲龍頭冇乜力，幾隻大型科企都要倒跌。反而阿里巴巴9988仲有力—似乎都係因為落後。

3. 實情我估呢排都係睇「落後」。科技股炒到去啲冇乜提過嘅名，可能抖下先？一係又再睇返龍頭，但同時你見到係啲舊經濟股接力。Instagram 已經貼過太古19九倉1997之類，不再重覆。亦同早前講過今年睇返多啲舊經濟股吻合—但又煩氣提多次：唔係叫你沽晒新經濟佢。我唔明做乜你要咁樣將啲嘢大執位，好易左一巴右一巴的。

4. 呀仲有，科技股你見特登有一隻我冇講。正係平安好醫生1833。年三十晚先提，其實冇乜機會買（之後一路都放假），不過我估仲有得升。另外隻眾安6060都係因為Cathie Wood 堆嘢而抽咗上去，不過當時冇講到，幾乎忘記咗呢間公司。咁同時間另一隻年三十晚嘅利是股，Pinterest，就有交代啦。不過現價相當貴了。

美國債息彈到1.3%，當然有利銀行股，但大市麻麻地

5. 另一方面，雖然你見唔少成日提嘅美股依然都創新高，但成個市況都仲係冇乜力，一路都跑輸新興市場。貼呢堆固然仲係新高，但有啲跌嘅都幾急下（例如之前講嘅「美版併多多」WISH），Tesla亦跌穿800蚊。你見標普指數同Nasdaq都要倒跌，反而道指多舊經濟股仲有得升（JP摩根JPM波音BA卡特彼勒CAT雪佛龍CVX等等）

6. 原因嘛？都係提過，債息。美國10年債息剛剛突破1.3%，過去半年低位不停咁升，當然唔會一日即時好覺，但去到某個位就會越嚟越多人擔心。有數得計，指數同股價就不停咁升，啲咩市盈率市帳率（如有）就越嚟越貴（尤幸啲業績普遍都勝預期，否則就會忽然更貴）。同時間債息又係咁升，即係美股無論計 absolute 同 relative都冇之前咁值搏—當然唔係叫你而家沽晒佢，而係你見到點解開始啲人買啲估值冇咁神經嘅舊經濟股（仲要有疫苗有經濟復蘇甚至國際旅遊開返，半年一年前炒定差不多）。而另一教訓當然係：舊年真係極之抵買，就當你三四五六月時仲驚，去到九月十月債息0.6% 0.7% 應該好放心買。

7. 咁債息抽咗上去，同時間亦解釋到點解銀行股JP Morgan創新高，連帶埋匯控5都翻生，就唔只係因為派息了。昨日提過了。

大陸影視股：華誼419阿里影業1060

8. 分享多一堆嘢，大陸啲影視相關股，Instagram有貼，之前冇提過的所以唔會講「大師又中」。但值得諗嘅係：其實有機會預先估到的。要分清楚，有啲「早知XXX」係真係做唔到的，無謂幻想。但有啲係有可能估到的。例如大陸農曆年票房勁，應該唔太難估到？理論上真係早早可以過年前買定咩華誼419阿里影業1060貓眼1896之類。可惜真係完全冇諗到，人總有局限。但記住，真係realistic 嘅先好去諗返轉頭，目的係等你下次做得好啲

加印花稅，港交所388仲有冇運行？

9. 好似唔係好多人講，但呢期吹話加股票印花稅嘅聲音都幾多。我就斷估行嘅機會都唔細，留意會唔會打擊港交所388股價，亦睇港交所背後有幾有牙力。

10. 咁就大家都知，種種原因，又派錢又保就業之類，政府財赤幾勁（又唔係好大件事嘅）。節流就機會不大，就諗下點開源，賣地又唔多做嘅情況下，正路當然係加稅。咁但加稅有好多種，每種都總會面臨各種人反對，加上政府弱勢，但都仲可以在入面搵一個好啲（我指對政府嚟講易搞啲）嘅方法。

11. 印花稅係一種非常「好」嘅稅，好在硬掘，基本上你冇得走，徵稅或監察成本亦都極低（亦所以點解香港都幾倚重）。利得稅又話驚影響營商環境呀，薪俸稅又話搞著中產呀咁，況且大公司有錢人總可以搵好多方法走。其他稅又太細，咩資產增值稅亦有排搞，況且亦會好多人反對。所以印花稅真係拎嚟開刀最好。冇人會同情買股票買樓嘅人嘛。

12. 當中物業印花稅就應該唔會點加，但樓市麻麻地又封晒關，唔會有幾多新稅收到。所以當然係諗股票印花稅。

13. 好多人買股票都冇留意，可能因為買得太細，冇留意入面嘅費用。實情有一大抽嘢，唔同嘅人袋：包括去咗你間券商嘅佣金（如有），直去咗港交所嘅交易費用（仲有結算費用之類，都係佢收埋，388做埋結算所嘛），證監嘅錢（你當好似旅行社執笠基金咁），同埋最重要嘅：印花稅。

14. 0.1%嘅印花稅，好係嘢，你諗下一日幾千億成交喎。留意絶大多數其他地方嘅股票都冇印花稅（但人地收其他嘢啦，有資本增值稅，或者利得稅薪俸稅重啲，仲有收銷售稅），亦都因為咁，解釋到點解美股成交咁大，多過香港好多好多，因為你香港每下交易都係稅。仲解釋埋點解香港唔興玩高頻交易High frequency trading，原因同上。然後亦因為冇高頻交易，就冇Robinhood 之類真正零佣，因為冇得賣走你盤收payment for order flow．舊文提過，全部嘢都緊緊相扣。

15. 咁掉返轉頭，邊個最反對印花稅？除咗高頻交易公司，以及基金經理，最反對嘅當然係港交所啦。你冇晒印花稅，成交多返幾倍，佢唔賺到笑？但呢個亦係trade off，有冇印花稅都好，點解港交所咁好搵？以前咪提過咯，獨市嘛。

16. 所以講到尾都係政治，理論上港交所都係半間國企，個壟斷地位係政府畀嘅，又係咪可以有能力反對呢？

17. 咁當然啦，加印花稅，對成交梗係負面。但會唔會又「搞死香港」「外資切尼」「金融中心不再」之類？怕且又唔會。高頻交易之類，不嬲都冇架啦。咁你要買呢啲股票，唔在香港，可以在邊？美股仲要趕晒你走，所以港交所當然多謝了。

18. 可能會在Facebook寫篇詳細版。