匯控倫敦急升，搞乜？真係2020翻版？新興市場股市跑贏美股。誰是最強科企CEO？Reddit係社交平台奇葩。外賣平台自食其果？加網上銷售稅無助實體舖？政策三角取捨 (Patreon)

快評幾句—匯控倫敦急升，搞乜？

大師冇點你—真係2020翻版？

每日一圖—新興市場股市跑贏美股。誰是最強科企CEO？Reddit係社交平台奇葩

Good Read — 外賣平台自食其果？加網上銷售稅無助實體舖？政策三角取捨

FB Post Summary —從缺

留意週末出咗個專題，講返「風險是你的朋友」「點避免股災？避唔到的」。上下集，自覺寫得不錯。

另外，新一年我嘅惡習仲未戒到，但應該聽日會去覆返晒大家在舊文嘅留言了，PM亦都會覆，記得之後去睇。

快評幾句—匯控倫敦急升，搞乜？

香港美國都冇市，「但日本同英國有」，Ivan是唔休息的。日經指數就突破30000點（得閒寫下），但更有趣係英國。匯控股價再升，已經比香港高4%。但比較神奇係有人扯上2月9號個通告，講「審議會否就2020 年度派發任何股息」，就估「下星期開會可能會派返息」，實在有點表錯情了。首先，個會係業績前嘅董事會，年年都開。一般嚟講亦都會講埋「討論派息」。而匯控自己，舊年前年個通告更加係講埋「業績及派息」，只係因為舊年彈弓手，所以可能今年用個唔同講法。而個通告2月9號啦喎，今日先知？最重要係：市場早早就預期會派返息啦—「派一個仙都係派」。

咁到底升乜？我比較相信係因為近期美國長債債息升，會有利銀行息差。早幾日講過了。

大師冇點你—真係2020翻版？

我覺得今年嘅走勢係會似2020年的—不過冇咁誇張，即係相信好信會有個大調整—雖然講咗幾個月，但掉轉，亦有人覺得5%已經大調整—而我指嘅大調整係10%以上。

舊年呢個時間我在越南，好記得舊年已經有「美國連登股」，就係Tesla，Plug Power（PLUG），同Virgin Galactic（SPCE）等等。然後都未有機會寫，就2月23日開始大瀉了。

望望日曆，差不多一週年，不如星期六寫下。但當然歷史唔係簡單咁重覆，舊年有百年一遇嘅疫情喎，今年明明係炒復蘇？「但你點知仲未炒完？」。今年同舊年比，當然銀紙印多咗好多，但股票亦貴咗好多了

我相信最大嘅風險都係通脹，甚至係經濟復蘇（暫時冇乜力）—並唔係通脹或經濟復蘇本身對股票不利，但而家咁嘅估值，好大程度都係多得債息低迷—如果忽然抽升呢？

但再講一次！唔好清倉呀！甚至減倉都唔好！如果我錯呢？況且，可能升多30%先跌10%呢？就當你早早沽走避咗，但又幾時再買？

每日一圖—新興市場股市跑贏美股。誰是最強科企CEO？Reddit係社交平台奇葩

新興市場股市跑贏美股—都寫過下，今年你見港股同好多其他市場都跑贏美股。如果計及埋貨幣就更加明顯。

誰是最強科企CEO？—一般都係講Elon Musk定係Jeff Bezos，而見到Elon Musk贏好多。Jeff Bezos甚至不及Bill Gates，或者馬化騰。留意我地係講CEO，唔係講發明家，亦唔係講創辦人（雖然好多時係同一個人）。所以好現實，唔使討論對人類有乜大影響，或者發明啲嘢有幾勁。一個字：股價。上司公司CEO唯一責任就係將股東利益最大化。

Reddit係社交平台奇葩—奇在邊？奇在推出15年，在Google上面嘅熱度都係未跌的。

Good Read — 外賣平台自食其果？加網上銷售稅無助實體舖？政策三角取捨

呢三篇都幾好睇，但有啲長，都係high level嘢，有時間睇下。因為都幾長，我都係快睇，希望冇理解錯。又，三篇都應該係substack平台嘅嘢，以前都介紹過呢個newsletter platform，好多鬼媒記者都自立門戶了。

外賣平台自食其果？—一如好多共享經濟東西，外賣平台近年都幾多爭議，大家開始睇到帶嚟嘅問題。有趣係疫情前講到就執笠咁，疫情下好似變咗大贏家甚至形象好返。作者認為呢啲只係主觀印象，本質冇變過：殺死中小企，外賣仔被剝削，但消費者一般嚟講唔會理，只關心啲嘢食熱唔熱同埋運送費幾錢。作者有寫對小餐廳嚟講外賣平台係魔鬼交易，慢慢坐大咗你餐廳就冇定企。不過作者結論又似乎樂觀，認為餐廳已經睇到真相，唔會再中計云云，認為係外賣平台唔改變就等死咁喎。睇過？相當好睇嘅文。

加網上銷售稅無助實體舖？—又係針對新經濟嘅爭議，有舊經濟（Tesco）公司認為不公平競爭，應該要針對網上零售商加稅云云，否則實體店會死（早前實體店有政府優惠，但就快結束）。作者認為未必可行，最後只會害到中小企，同埋扼殺整個電商行業。—而電商行業興起並唔止係因為唔使交咁多稅。

政策三角取捨—講金融監管，表面上會係 競爭 vs 金融系統穩定嘅取捨。但實際上監管機構差不多永遠都係要穩定，唔要競爭，所以一般都係有利既得利益者。而做金融機構嘅都知，根本越嚟越多監管，往往係有利大公司（有資源搞）。然後作者筆鋒一轉，就講而家到啲科企踩埋入金融業呢，就帶畀監管機構更多難搞嘅取捨了。例如係競爭vs 私隱嘅取捨。或者私隱 vs 穩定嘅取捨。講到尾都係因為數據。有冇諗起邊間公司？正係螞蟻嘅問題。

FB Post Summary —從缺

是的，牛年都冇寫過一篇Facebook文，生產力繼續低下。不過週末專題幾多人讚。