［101文］本輪牛市最大教訓（下）：Volatility is your friend (Patreon)

股票長遠係升的，但點解？

估下恒指／標指／納指一年平均高低波幅有幾多？

你必然會遇到股災，但Time is your friend, volatility is your friend

照下鏡咪知Time the market work唔work咯

Price of admission—正係你接受咗風險先有高啲回報

美股10年牛市，當中都無數咁多次有人震走。何況熊市？

美股10年牛市入面，8次10%嘅調整，2次20%所謂「熊市」

樂觀者長勝，Don’t Fight the Fed．股票長線係升嘅，stay invested

美股每4年就一次熊市，點避？相反，每次都係買入機會

1. 上集在此，最好睇咗先

2. TLDR：股票長遠係升嘅。股市係好大波幅嘅。你必然會遇到好多次調整股災同熊市，但Time is your friend, volatility is your friend。Don’t fight the Fed，stay invested．樂觀者必勝。

股票長遠係升的，但點解？

3. 廢話少講，第一樣嘢，都真係要講信念：但，股票長遠係升的。當然唔係每一隻股票，「但好公司會係咁」「咁我事前點知咩係好公司？」好問題，咁所以修正少少：股票指數長遠係升的。反正佢自然會揀啲最大嘅公司入去，而一般都係好公司升越做越大（但港股就出現咗啲問題，之前唔少一啲一開始就好大但盈利增長冇乜嘅大陸銀行股）

4. 點解股票會升？呢個問題都幾難答（我夠知「供求」，但等於廢話，點解會有咁嘅「供求」丫），但都係Benjamin Graham嗰句：In the short run, the market is a voting machine but in the long run, it is a weighing machine。路遙知馬力，而股票長遠點解升，易解過短線。

5. 講得簡單啲，因為企業盈利，企業越做越大，仲有係通脹。蘋果而家賺幾錢，10年20年前賺幾錢？當然有啲公司而家仲衰過當年，但，你咪睇指數，睇最大最成功嘅公司（唔掂嘅自然淘汰）。同樣道理，自己睇下而家恒指／標指成份股賺緊幾錢，10年20年前幾錢（順帶一提，呢個亦係樓升嘅原因，人工高咗，租金高咗）

6. 當然你會話，哦，日本，買著日本我點算？或者香港都夠死，2007年又30000點，而家又30000點。「你點保證今日買美股唔會變日本咁？」答案：冇得保證的。但你乜都唔買我就近乎可以保證你輸死，印錢嘛。你要保證去買美債，1.2%，我保證你輸死。亦因為咁，咪叫你分散投資咯。咁印咁多錢，總唔會全世界個個股市都變日本嘛？況且，你分段買嘅，就算買日本股都一早回咗家啦（有機會寫呢個課題，都講咗好耐）

估下恒指／標指／納指一年平均高低波幅有幾多？

7. 事實係，扯，美股咁易玩，10年牛市，都仲有唔少人輸錢啦。你諗真啲，係市場問題寝你自己嘅策略問題？

8. 咁除咗第一個信念：「股票長線係升嘅」之外，第二個定律，聽落更廢，但好重要：就係股市係有波幅嘅—而波幅畀你想像中大。

9. 玩個遊戲：畀你估下，過去咁多年，標普指數一年波幅平均係幾多？恒指呢？再講白啲，即係如果過去每一年我拎標指／恒指 最高位同最低位比，就係每年嘅%波幅。咁夾埋咁多年，呢個數平均幾多？

10. 視乎你睇幾長，但即使係金融海嘯後，2009年美股10年牛市到而家，標指一年平均波幅都有30%，恒指納指就超過35%—當然唔係年年高位跌35%，可以係由頭升到尾。詳情你可以睇返我有attach嘅Excel

11. 但呢個小遊戲話你知，股票嘅波幅比好多人估計都大。順帶一提，如果你見人地啲2021恒指目標價，話預期波幅係咩 29000-33000嘅，我係老細必然挑戰佢：做乜個波幅同歷史平均爭咁遠？亦唔好恥笑人地話估上下區間係30000-40000點廢，「成萬點你講晒啦」—就係成10000點先係正常！甚至已經比正常為低，因為10000點先33%。

你必然會遇到股災，但Time is your friend, volatility is your friend

12. 遊戲玩完，記住第三同第四定律：既然你唔係500萬本 然後想一年搏一個開1000萬退休，既然most likely你嘅股票都仲有幾年玩，咁可以話你知，你係必然會遇到調整/熊市/股災。It’s a matter of when, not if

13. “You get recessions, you have stock market declines. If you don’t understand that’s going to happen, then you’re not ready, you won’t do well in the markets.” – Peter Lynch

14. 但亦都記住，Time is your friend, volatility is your friend

15. 點樣避開股災避開風險？答案係根本冇得避，點解你覺得有得避？你咁去諗係唔make sense的。因為風險同回報係同一樣嘢，你冇乜可能只要回報而唔冒風險。美國10年國債講緊1.2%左右，所有呢個回報以上嘅嘅都有風險。

照下鏡咪知Time the market work唔work咯

16. 再重覆一次，你想time the market？唔使話我知，自己撫心自問你嘅往績如何。我當你真係2020年2月清晒倉咁勁，「咁幾時買返」？你真係做到3月23呢買返？況且，仲要係買得多喎！

17. 再貼一次呢個圖，1980年1月至2020年3月，美股大約10000個交易日。1萬變70萬，咁呢個都唔係重點。重點係：冇咗最好5日（out of 10000日！），你回報得返70萬嘅6成。咁你可以諗下你time 嚟time 去，miss咗嘅機會有幾多（有人問：如果我係miss咗最差嘅5日呢？得閒我會計下）

18. “One of the most helpful things that anybody can learn is to give up trying to catch the last eighth—or the first. These two are the most expensive eighths in the world.” –Jesse Livermore

Price of admission—正係你接受咗風險先有高啲回報

19. 唔少人睇到股票嘅回報好好，咁就算唔計你揀股，買美股指數都夠晒好。但有冇諗過嚟自乜？股票講到尾都係等於夾錢做生意。你個股價不代乎就係 每股盈利X 市盈率，而正路地盈利一路上，市盈率就會飛上飛落—但兩者都係不確定嘅！

20. 你買股票嘅超額回報，就係嚟自你肯承受風險嘛。否則你就係收緊1.2%嘅美國長債債息啦。風險有好多種，包括你間公司盈利會起落，甚至成間爆咗煲，而就算盈利一路好好，股價都可以忽然上上落落。

21. 呢個，就係 price of admission：你係靠接受呢啲波動，先去拎到個高啲嘅回報。咁你企圖唔受個風險又拎到個回報呢？係極難嘅。

美股10年牛市，當中都無數咁多次有人震走。何況熊市？

22. 我地再回顧一下，美股自2009年開始（姑且計到2020年3月股災前），十年牛市，合埋眼都贏錢啦下話，點解唔係？咁你未開始投資冇得講，但你問下嗰時開始買嘅，係咪個個都贏幾倍（成副身家計喎）？

23. 多數都唔係，因為總有無數咁多次，你會畀人震走！即使係呢個最易玩嘅10年牛市，當中都有好多次5%嘅大調整，甚至10% 20%都有—而我係講緊10年牛市入面喎，已經唔計2008金融海嘯同2020年肺炎股災。都會咁喎！股票就係無啦啦跌的！

24. 更重要嘅係，而家嘅人，坐貨能力係越低過以前的。點解？因為太多新聞。以前你睇報紙先知股災，而家你唔炒股票都知，媒體24小時報導，彈notification 畀你，社交網不停有人講—以前你放咗幾個星期假就可能完全唔知咩事，而家去到邊你都會知。你睇下，如果2020年放咗幾個月或者暈低咗，幾咁美好呢？但你2月3月日日睇住，好難唔嚇到震走（我就冇！）

25. 記住，volatility is the price of admission，就係你嘅朋友。你冇可能避開佢，相反應該擁抱佢，其他時間專注你工作（一路都想講大家仲要提高自己嘅收入，雖然廢，但又係好多人輕視咗）。唔好忘記佢仲畀到機會你低位買（當然你冇可能低位訓到身家落去，但例如你月供咁，總會低位執到啲貨，同埋唔好畀人震走）

26. 調整呀股災呀熊市呀，根本避免唔到，總會有一日有個好大嘅打擊。即使你避到，2020年2月清倉，但之後幾時買返？損失幾多？咪話一路都冇乜調整咯。除非你細細注咁買，但你買幾皮嘢嘅，我畀你搏到100倍又點？都未夠你退休。而有幾多個賺到100倍？10倍都少啦。同埋咁嘅玩法，同你賭錢贏一舊錢一樣，你好快會輸返轉頭，除非你即時夠錢上岸自此唔炒。

美股10年牛市入面，8次10%嘅調整，2次20%所謂「熊市」

27. 再畀啲實數你，美股嘅10年牛市（2009-2019），標指低位升350%（納指更不用講），當中真係年年都升，只有一年（2018年）係咁意跌4%。複合回報講緊一年15%（留意，都只係一年15%，一年想幾成回報嘅，你覺得現唔現實？）

28. 但即使咁簡單嘅10年牛市，入面都有25次5%嘅調整（等於而家恒指跌1500點）。當中仲有8次超過10%（等於而家跌3000點，你仲唔嚇死？），有兩次2次20%嘅所謂熊市  （我知我係講標指，但好多人都對標指幾多點冇乜印象，所以用同等波幅放落恒指做例）

29. 而當中，邊次唔係講到好大件事？歐債危機歐元區又話解體又話歐元崩潰，中國2015又話支爆，英國脫歐又世界末日，侵侵上台又世界末日（之後拜登上台又話世界末日！），香港就更加又國安法又外資切尼又制裁又港紙爆煲又乜，AND？

30. 咁而去到2008同2020 更加人類災難，講到資本主義已死咁滯。AND？

樂觀者長勝，Don’t Fight the Fed．股票長線係升嘅，stay invested

31. 我知，羅素雞，過去咁多次都冇事唔代表之後都冇。你點保證？我保證唔到。但你見印咗咁多錢，加埋人類股票歷史咁耐，都真係樂觀者長勝，Don’t Fight the Fed．股票長線係升嘅，volatility is your friend, time is your friend , stay invested

32. 我就真係唔係好信美股港股 未來3-5年可以由而家呢啲位再升一個開（其實一年升15% ，5年已經可以一個開）。我比較相信唔會好耐會有一個幾深嘅調整（雖然我都好似講咗幾個月）—但再講一次，唔係叫你而家沽晒佢！（我發現唔講呢句就會有人做）

美股每4年就一次熊市，點避？相反，每次都係買入機會

33. 睇下呢個表，比之前只係講指數「波幅」（高低位）更有趣，因為佢只係講Drawdown，高位跌幾多。你發現即使係美股10年牛市入面，都有7年有超過10%嘅drawdown，有3劑甚至去到近20%！10年牛市都係咁，更加唔好講上落市或牛市

34. 換個角度睇，由1928年到而家，5%嘅調整，93%嘅年份都會有，差不多1年實有1次—根本平常過唔平常。10%嘅回調都63%嘅年份有，1.6年就一次，唔使係咩大事或大衰退。20%嘅熊市？都4年一次—但經濟點會4年就衰退一次？咁你可以計下到直到你退休之前，會有幾多次熊市，你點避？甚至係舊年嗰種30%嘅大股災，都唔使10年就有一次的。

35. 但你發現，差不多每次熊市，都係買入機嘅會。當然，要你兵荒馬亂甚至往往自己份工都危危乎再買入去，係好難的。但一路都係嗰句：我唔使低位撈到，甚至唔使高位沽走。我只係做到長期都stay invested，低位唔打靶高位唔take profit，已經夠晒。