［101文］本輪牛市最大教訓（上）：你根本避免唔到股災 (Patreon)

升市我唔係好開心喎，因為未買夠！

本輪狂牛少少調整都冇，你點趁低買？

保證好快大調整，之後仲會有股災，因為你有排都未退得休

本人過去10年沽走咗200萬股票，後悔不己

怕摸頂？舊年叫你買又唔買？

1. 上下集，講一樣嘢，Price of admission，股市入場費。呢期見兩個我成日睇嘅人Ryan Detrick同Charlie Bilello都講起（留意Charlie Bilello篇文係2020股災前的）。亦可以當係我早上一篇文嘅延續，最好睇一睇。

2. TLDR：唔好Time the market，因為你根本做唔到（做到嘅應該發咗達）。點避免調整，熊市同股災？答案係避免唔到！所以亦唔使擔心唔使費神，你必然會遇到。點應對？好簡單，接受佢，keep住繼續買。同埋專心返工。唔好諗住等低位買，或股災前走，唔work的。剛開始投資嘅仲會以為work都算，你投資有一定年期嘅，應該知道唔得—除非你買好細—咁即係避到都冇用。

升市我唔係好開心喎，因為未買夠！

3. 有人以為呢排股市日日升我好開心，我覺得還好—對我搵新讀者就好好嘅。但對我寫文（留意兩樣嘢唔多同）並唔係太好，一街都股神啦。至於大跌市當然好難搵新讀者，但對寫文就好 — 留意，見唔見到個矛盾？最應該買股票嘅時間，就人人都唔想買的。

4. 實情我最鍾意係悶悶地嘅市況。大牛市買乜都中嘅，好多人覺都唔使睇我啲嘢啦（雖然，都仲有啲人係輸錢的！）。大熊市買乜都輸嘅，真係仲聽你講嘢咩。

5. （離題講句，我搞個「勞蘇基金」都係咁，詳情睇舊文，50萬港紙入場，管理費2%/表現費20%，但未咁快起動，有興趣嘅PM我，之前PM過嘅唔使再PM了，冇特別改變，仲搞緊。想講係大牛市反而難搵人，因為個個覺得自己都係神，大熊市就更難。）

6. 係呀，升好多，但，「早知買多啲」「點解唔我買夠先開車」

7. 真喎，而家呢啲市極之易玩。你甚至唔使屈機到幾年前買Bitcoin買Tesla，呢大半年你正正常常買乜都贏，你見我日日講啲咩ASML Paypal Microsoft 微盟 騰訊，極易玩。最緊要你有買，同買得夠大，同埋唔好升少少就急急腳走—講咗N咁多次stay invested啦。

本輪狂牛少少調整都冇，你點趁低買？

8. 亦都再講一次，苦口良藥，但過去大半年，都仲要輸錢，或者冇乜點買股票嘅，真係出咗好大問題。咁嘅市況你都輸錢或冇贏錢，嚟緊點算？舊年呢個升浪已經好易坐，上一篇文咪講過，大半年都冇一個10%嘅調整。咁你都坐唔實，或者等等等調整嘅，之後會更難捱。唔該睇多幾次呢篇啦。

9. 即使你計5%調整，美股標普指數對上一次都應該係10月30日嘅事。到而家107日，已經夠打入史上頭20長—講緊差不多100年喎！（留意呢個表係2020年2月時的）

10. 美股標普指數由舊年3月23嘅2237點，升到而家差不多4000點，一個開咁滯．Nasdaq就直頭一個double，好多個股幾倍添（但，邊有得咁屈機？你又要計埋有機會輸呢）。一年唔夠咋喎！美股一年平均都係十幾巴仙回報。你可以諗下嗰啲話自己年年幾成甚至幾個開嘅網友點解仲未發達仲未做股神。

11. 問題係，之後點算呢？當然係升市莫估頂，但你估仲有幾多年升？一年？兩年？升多一倍好未？但正路地你發現，升多一倍都未夠你退休啦。（我就應該夠，請媽）

保證好快大調整，之後仲會有股災，因為你有排都未退得休

12. 而我可以肯定嘅係，唔使好耐，即係你「搵夠」之前，保證你會撞到好多次10%以上嘅大調整，甚至係20%嘅所謂「熊市」—舊年跌三份一你都見過啦！

13. 你開始發現到個問題在邊啦？即使美股升得咁多，就算你有fully invested（冇嘅更加不用討論亦冇乜人同情），都未夠唔使做喎—但肯定之後some point就會股災（任你定義），it’s a matter of when, not if．

14. 咁點好？實情係冇得搞的。想高位走人低位返？唔work的，唔信嘅你可以試下，但蹉陀咗啲歲月唔好問我拎返，賠唔到畀你。唔使睇耐，你睇舊年等等等嗰啲錯失幾多嘢？

15. 唯一做法，就只係你有閒錢就放入去。然後慢慢坐。唔一定係要月供咁悶，但即係有閒錢就買晒入去，都冇乜死錯人。

16. 因為只要你買得股票有返咁上下時間，呢輪升浪就會令你明白同後悔一樣嘢：買得唔夠多！但人性就係咁架啦。你只能令到自己在股災後再下一次升浪渣得夠多。而啲貨幾時儲返嚟？就梗係股災時，或者市況好悶時儲返嚟啦—正路地你又後悔2008年買得唔夠多添。或者又後悔2020年3月買得唔夠多。但邊可能咁屈機丫，你見2020年3月我都畀人媽到七彩啦，都真係有動搖哟！但幸好坐得夠穩，完全冇減過倉！打後倉位（3月到而家）咪超過一個double！低位升超過150%呀！（當然仲有新錢，包括我啲人工，包括你地啲月費年費）！

本人過去10年沽走咗200萬股票，後悔不己

17. 唔止一次提過我2008年輸咗成百萬，亦即係我當時全副身家。唔打算在呢度再細講，但講過最大嘅教訓就係唔好借錢。另外，有讀者問我之後點調整心態點再建立倉位—好簡單：專心返工。

18. 反而係2008年之後嘅事比較值得講，打後一路都有閒錢就買，月供就更加係必然動作。唔少「貨底」就係嗰時儲返嚟，所以2020年頭已經有一定持倉，3月亦冇震走—但都仲係覺得可做得更好—所謂更好唔係講我2020年3月應該買多啲（哪有錢？一早100% invested，而一路唔主張你借錢買股票），而係講2008-2020中途發生嘅事。12年喎！都做錯咗啲決定，唉。

19. 呢12做得唔太成功嘅係：中途都有減過倉。全無保留話你知，首先係2012年結婚，2013年買樓。結婚都幾十萬（嗰時澳紙貴，another story），買樓首期又好似40萬。更大鑊係2014年搞移民台灣，150萬（要600萬台幣嘛）。最近期係2018年我離開星展後，裸辭嘛，又去旅行，又冇工開，都要啲生活費，將嗰度嘅股票清咗倉（公司十分嚴），都幾十萬。包括好似200蚊嘅Tesla—未拆股之前嘅200蚊喎！

20. 真係媽的，不要再提了。每次都證明係錯誤。特別係2018年嗰次—根本當時我可以加按自己層樓算（2014年就唔得了，雖然已買咗樓，但買咗冇耐之嘛，邊加按到150萬出嚟？）

21. 你可以粗略計下，以上嘅數，都差不多200萬啦？你就計我一半買盈富基金一半買標普指數ETF都好，而家值幾錢？（當然我層樓升咗啦下）

22. 所以呢，我就真係唔係十分成功。只係以上幾次，如果我全部都冇沽走股票，用其他方法（例如問我老母借，或者借銀行錢之類），照計已經已經唔使做（雖然呢刻我都差不多唔使做）。

23. 以上故事無非話你知，到狂牛來臨（例如呢大半年），你一定要手上夠貨。而貨點嚟？必定係以前熊市或悶市時儲返嚟的。你呢大半年先追入去嘅，又係嗰句，畀你搏到幾倍又如何？個本太細了。

24. 呢篇講完少少虛啲嘅嘢，講咗個人經驗，講咗心法。下篇畀啲數字畀啲實證你。已寫完，只係因為篇幅關係我拆做兩篇

怕摸頂？舊年叫你買又唔買？

25. 但容許我臨尾加多句：升咗咁多，而家先追，梗係驚啦。但有乜辦法？舊年叫你買又唔買？又玩「等回調先？」，過去大半年嘅經歷仲唔夠慘痛？錯失咗幾多嘢？況且，到真係跌10%甚至20%，更加包你唔敢買。

26. 所以嚟問我而家買唔買得嘅，答案係：幾時都買得，星期一開市咪買得（BTW，港股美股星期一都放假）。潛台詞係：舊年叫你買又唔買？但實際啲講：never late than never。我都係一路加倉上去，咁已經說明晒啦？

27. 最後畀個圖你，左邊係標普指數平均嘅1/3/6/12個月回報。右邊係創新高後你先買落去嘅，你見到都唔係爭好遠，摸頂冇你想像中咁可怕。

28. 不過我補充一句：個圖冇話你知多幾年嘅回報，亦冇講估值。實情而家呢啲估值買落去呢，回報梗係冇之前咁好架啦—「舊年叫你買又唔買？」。

29. 下集在此