我最期待的「股災」出現了。點算好？冇乜點。跌1%咋喎。冇人叫你成手都係新經濟股呀下，我冇叫過。中移動941咪好地地！LVMH 新高添呀！疫苗一路推，可以睇郵輪股 (Patreon)

我最期待的「股災」出現了。

點算好？冇乜點。跌1%咋喎。

冇人叫你成手都係新經濟股呀下，我冇叫過。

中移動941咪好地地！LVMH 新高添呀！

疫苗一路推，可以睇郵輪股

小版務：Ivan去考 CFP

我最期待的「股災」出現了。

1. 市旺自然多冧把，但市差咪學下其他嘢，或者調整下心態。好似唔止一次講過，你話我黑心都好，我係幾想股災的。唔係我沽清貨（再講一次，Since 2018年9月我都冇減過倉，只加不減），更唔係沽期指，而係三樣嘢：首先，啲貨往往都係跌市先買得多。第二，市況麻麻先啱我寫文：個個都股神睇Cathie Wood買乜就日日贏錢嘅，唔使睇我寫文啦（但：市況好人人賺錢可能唔介意畀一百幾十蚊，到股災就樣樣都好覺，所以係不溫不火市況最好）。第三，情況同第二點都似，勞蘇基金嘛（搵日寫篇號外講，但仲係極初步），市況極好嘅你個個股神啦，日日升幾成，使鬼信我。但同樣地，股災時叫你拎50萬出嚟都好覺。所以都係麻麻地唔太好唔太差市況我最鍾意。第二三點純係私心。

2. Anyway，可以透露嘅係勞蘇基金暫時50人左右有興趣，咁係唔多夠的，你計下數就知。當然我亦未在Facebook 講或者去問啲舊朋友舊同事之類。有興趣嘅繼續PM我（PM過嘅就唔使），唔使commit任何嘢住，50萬港紙入場，絶對會攞正牌做，實務上係搵間證券行我掛9號牌然後幫大家管個戶口。暫定管理費應該2%，表現費20%（唔知係乜有得佢，之後再解）。

3. 當然我好想長升長有，但大家都知正路地升多一個開你都未夠退休的（我就……其實差不多夠），既然係咁不如跌下畀你買下先。講返，股災了！一片哀號吧！不過又等我做冷靜先生，順手潑下冷水。喂，你睇指數，恒指跌500點唔夠，1.6%。美股而家（三點）三大指數都不過係0.5—1%。股乜災？舊文寫過啦，正正常常都有時跌20%啦。

點算好？冇乜點。跌1%咋喎。

4. 所以你問我點？冇乜點！嚇走嘅固然不智（又唔記得過去N年嘅教訓？），但而家所謂「撈底」亦有點搞笑。1%咋喎？早前都提過下預會有10%嘅調整，即係恒指/道指3000點咁咯。坐穩啦。點算好？冇乜點算，亦唔使點算。原本月供呀或者諗住有錢就買嘢嘅，照買。

5. 而又貼多次呢個圖，暫時都仲係跟得幾足的，真係唔好唔信邪。但如何分別邊啲圖應該睇邊啲冇意思就係學問兼藝術了。我傾向都係樂觀（幾時悲觀過？），而家只係因為估值太誇張，殺一殺啲炒味太勁嘅股，大公司就調整下，只係擔心通脹同債息抽上嚟，唔係咩大危機（雖然再講一次：冇任何大危機都可以跌你10-20%）。而最新嘅Jobless claiam數字比預期差，亦可能對股市有利：經濟弱，點加息？（雖然10年債息同聯儲局嘅短息唔係同一回事）

6. 最後補一句：留意恒指跌500點嘅星期四係咩日子？初七。亦係「北水重臨」。容許我煩氣講多次，最初講話「北水托住市」「冇北水買大市就受壓」，好似好有道理，但邊個話你知係咁？你睇歷史都見到唔係（然後連登仔又話：扯，唔見歷史學家財演發達？真難服侍。我未發達，不過應該富貴過好多講呢啲嘢嘅人）。記住，下次唔好當咩係理所當然，特別係股市自有佢自己嘅邏輯。最經典嘅：經濟好壞 vs 股市好壞，邊個話你知經濟好股市好？

冇人叫你成手都係新經濟股呀下，我冇叫過。

7. 但話說回頭，雖然講話指數表現唔差，但大佬，「我唔係買盈富基同SPY嘛」。的確，你睇啲喪炒股一成兩成咁跌呀！中美都係，主要係啲冇乜錢賺嘅二三線科企，但亦包括部份消費股新能源股。

8. 咁但，又畀個教訓你啦：本人好似從來冇叫你成個倉都渣呢啲嘢的，呢排差不多日日講應該換返多啲舊經濟股。固然冇乜股票升，但咪話個指數先跌1%，咁當然係有唔少嘢冇乜跌甚至小升啦。咁針當然冇兩頭利，喪炒股日日升一兩成你咪唔會跟得足，但如果呢刻你已經叫救命嘅—咪證明你根本受唔到咁嘅風險咯。

中移動941咪好地地！LVMH 新高添呀！

9. 呢，例如隻中移動941，呢排幾勁。年初六我去某人屋企拜年（留意我由中午影相影到日落，你可以想像下我會返工日子我中午留到黃昏，該人都有啲份量）。佢老哥呢期就買埋唔少中移動。咁佢有佢道理喎，成6厘股息，而又似乎係唔會派唔到的。增長冇乜，但真係冇乜下跌空間。當然個問題係：此人已經60歲。另外：此人十分富貴（嗰個單位應該值成億港紙，你冇睇錯）。咁佢梗係保守啲啦。故事教訓係：好難one size fit all，唔同人有唔同風險胃納，我日日寫文總不可能fit到所有人。所以最好都係join個VIP搵我食飯面談。呢，昨日先有某個真—KOL請我食飯（講緊20萬Page Like嗰啲，本人10倍）（＊）

10. 仲有乜係升嘅？有，之前有一輪成日提，但呢排少咗講。奢侈品股，例如Prada，Kering（Gucci母公司）。LVMH，或者愛瑪士仲要創歷史新高添呀。平唔平（我講股價，唔係包包）？梗係貴！所以唔係叫你而家飛入去。而係又再示範你睇：點解應該分散下，唔好全部都新經濟股（仲係炒味最勁嗰啲）。又好煩咁講多次：我知，梗係會分薄回報—但如果呢排咁市況你都嚇親嘅，根本就唔適合咁高風險。況且記住：跌33%嘅嘢，要升返50%。

疫苗一路推，可以睇郵輪股

11. 有機會寫長少少，但，之前有讀者問估重啟遊遊 經濟復蘇 人人打疫苗，買乜？我就貼郵輪股！Carinval。我知仲未開，仲未打晒疫苗—但股價炒預期，到開返就肯定遲了。而家個方向點都係向好方面發展，都係會不停推啲人去打針。

12. 咁講多少少，睇返公司最近業績（1月嘅事）。爆大鑊後，公司籌咗190億美金，手頭上都仲有95億美金。夠唔夠？公司舊年大約蝕100億左右，相信今年生存唔會係問題。

13. 會唔會冇人再搭？咁你見到了，公司話2021年下半年嘅booking，同歷史差不多。而2022年上半年，更加係高過2019年。

14. 見到了，傳說中嘅報復式消費呀。之前啲咩試航啲友都爭住去報名．似乎唔係個別例子，另一間嘅2023年180日環遊世界之旅，早兩個星期，一出即日就賣晒。

小版務：Ivan去考 CFP

15. （＊）然後on an unrelated note，本人打算去考個CFP（Certified Financial Planner）。你估我唔到呢！有乜用？是廢的。我係咪傳行賣 product？怕且都唔會。直接在呢度賣畀讀者？更加唔會。唔好忘記我嘅原則，呢度只收會費，冇其他古惑嘢。有廣告我會寫明係廣告（暫時冇，FB Page就有），絶對唔搞植入，更加唔會幫人唱好或唱衰。咁考嚟做乜？冇！身痕！得閒。同埋最重要係：費事有人覺得我冇資格！我覺得係廢的。但有啲人覺得有用嘛。咁等你求個安心。反正唔貴，亦冇乜難度。即係你地就睇開我啲文知我有料到啫，但好多人唔知嘛。咁點樣幾秒鐘令佢覺得我唔係唔識？就靠呢啲門面嘢。