ivanliresearch

Er……我買咗比特幣。今次二線科技股有力大市又有力！叫咗你唔好沽快手！越嚟越多十二碼。暫時仲係2009年翻版。SnapChat叫你踢走啲人。2020s投資九字真言。港交所請條洋腸 (Patreon)

Published:

2021-02-10 19:50:59

Imported:

2021-07

Content

快評幾句—Er……我買咗比特幣

大師冇點你— 今次二線科技股有力大市又有力！叫咗你唔好沽快手！

每日一圖—越嚟越多十二碼。暫時仲係2009年翻版。

Good Read —SnapChat叫你踢走啲人。2020s投資九字真言。

FB Post Summary —港交所請條洋腸

版務 — 年三十初一二三四五照舊有文

快評幾句—Er……我買咗比特幣

1. Er…….都諗過寫唔寫，但咁大件事（！）都係寫兩句通知讀者。絶對高透明度，冇任何保留。順便講埋，我買ETF啫，GBTC，美股買得。我當然知同「實物」唔同，不用討論。但我諗我唔算標題黨掛。

2. 放心，之後應該唔會成日寫，而FB Page Instagram 應該唔會點講，唔係唔見得光，係怕煩—的確，討論加密貨幣就永遠變得很煩，支持嘅反對嘅全部泥漿摔角，我最怕呢啲嘢，亦建議大家唔好做。同人討論好多時都浪費時間，特別係網上啲唔畀錢嘅友。

3. 實情好多讀者都叫過我講加密貨幣，但我一直都冇。而我亦完全唔打算討論任何咩基本因素呀，技術呀，用途呀之類嘅東西，完全冇興趣，亦唔識。但我話畀你聽我買咗，就係最好嘅表態。

4. 當然你仲應該要問：幾時買的？同埋，買咗幾多？或者你可以問埋：點解買？

5. 幾時買？好簡單，咪昨晚（星期三）！買完已即時（而家）同大家講。呀，正Tesla買之後。時間上係，但冇任何因果關係，之前（我講呢幾個星期）想買，一路有啲技術細節卡住，昨晚先搞掂，然後忽然升咗上去。

6. 買咗幾多？重要的，你一定要問。答案：港紙四皮嘢。咁你自己衡量對我嚟講係算多定少啦。但真係，我話你知我買咗四皮，同買咗四百萬港紙，你得到嘅訊息應該好唔好。我嘅注碼已話你知我點諗啦。

7. 點解買？下面Good Read有詳解。但正如吾友（佢都呢排買）話齋，當係一個call option。真係的，諗嘢唔好咁簡單（雖然又唔好故作複雜）。「埃汾買得即係睇升啦」，唔係喎，我係睇跌的！「咁你仲買？」「但如果我錯呢？」

8. 真的，正係咁，FOMO，Fear of Missing Out．眾所周知我一路都睇淡呢啲加密貨幣（當然我冇沽空，亦冇叫你咁做）。做乜忽然轉軚？咁首先明顯我去到呢刻都係錯得很啦。二來，唔好同錢鬥氣，我嘅 ego算得乜，你嘅ego亦一文不值。以前寫畢菲特都寫過。你咪恥笑打倒昨日之我咯，但總好過我死唔認錯要面子死頂。

9. 好簡單，四皮嘢，call option嘛，我係預輸晒的。咁事實亦係：輸晒四皮嘢對我嘅生活唔會有任何影響（輸四十萬就唔係咁講法，see the difference？）（咁你自己調教返啦，可能對你嚟講四萬蚊好大數目，又或者對你嚟講四十萬都唔係錢）—但萬一升十倍呢？咪講過咯，人地贏錢，你冇份，好慘痛。當然呢個亦可能係因為我花心（任何嘢都係），鍾意集郵，幾時都話投資反映性格。

10. 補充？冇乜補充，真係唔會寫任何關於加密貨幣per se嘅嘢，煩，我又唔係專家。正路我係唔會沽嘅，咪話咗輸晒四皮嘢我都冇影響咯。第時最多會在呢度「大師冇點你」提下。公海就唔會提—無謂畀人抽水丫，亦唔使教精啲唔畀錢嘅人。

11. 呀，我朋友聲稱我呢啲係幾皮嘢坐沉船，都可能係。買咗加密貨幣嘅自己小心了。係呀，我一買就插水了。但再講一次，四皮嘢輸晒，對我生活冇乜大影響。同我舊年叫大家拎少少錢買金（結果跌）嘅想法差不多。

大師冇點你— 今次二線科技股有力大市又有力！叫咗你唔好沽快手！

12. 圖睇唔清楚嘅打埋字：心動2400 明源雲909 金山3888 網易9999 移卡9923，除咗明源雲外全部都新高。繼續都係呢堆嘢，實在唔難玩，都有讀者贏唔少。但記住，唔係永遠都咁易玩的。唔好呢排贏錢就股神上身。係大自然係個天畀你嘅：當然你有stay invested都應記一功。

13. 但難得地，騰訊都有力，唔再係以前咁大股冇力。留意騰訊差不多10000億美金市值了，當然只係一個數字。另外我覺得阿里巴巴9988仲係絶對買得過，馬雲都現身海南島咯。

14. 當然，記住啦，一早都叫你第一日唔好沽移卡。呢兩日升多三成，三千四千蚊，真係夠你畀幾年Patreon了。冇呃你啦。有人問做乜第一日升咁多都唔走。你話呢？一皮嘢，做乜急急腳走？

每日一圖—越嚟越多十二碼。暫時仲係2009年翻版。

15. 越嚟越多十二碼—個圖講英超，但整體都係。而家足球比賽係多咗好多十二碼嘅（賭波嘅有機會？冇啦，一早重新price咗）。原因？大家都估到嘅，VAR，以前好多時快閃一下球證未必睇到，甚至有啲酌情，但慢鏡放大就好難扮睇唔到。仲有，因為而家執法嚴咗好多（但我覺得同第一點重覆咗），以前仲有咩波打手或者冇改變方向，而家稍為掂到都吹。第三，話文化都唔同咗，以前好多時會畀人鬧插水，「男人老狗唔應該搏十二碼」，但而家由教練到球迷到講波佬嘅睇法都唔同咗。又，我自己估嘅：識射十二碼嘅球員，識守十二碼嘅龍，仲有識玩十二碼嘅數據蛋頭學者，會更加值錢。

16. 暫時仲係2009年翻版—好似之前貼過類似嘅圖，你話史無前例？歷史唔係簡單重覆，但又Often Rhymes．拍埋去睇下，09年嘅美股標普指數圖，同而家差不多一樣。不過留意返個圖去到1月尾，咁即係……短期有啲壓力？定點？

Good Read —SnapChat叫你踢走啲人。2020s投資九字真言。

17. SnapChat叫你踢走啲人—幾有趣，一般社交網站媒體，都想你同越多人互動越好。SnapChat而家掉轉，主動幫你檢查，踢走啲唔啦更嘅人。點解倒自己米？錯了，正係less is more．至少佢定位上係想做到「只係好朋友玩」，唔係Facebook Twitter咁阿豬阿狗都贈兩句。未必一定成功，但至少諗到方法做到同人地唔同。

18. 2020s投資九字真言—Reformed Broker嘅文。呢兩年嘅投資九字直言就係：「都低能！但如果我錯呢？」（真係九個字！），原文係That sounds stupid, I’m buying some just in case. 就係FOMO，Fear of missing out，亦解釋咗我點解買GBTC，甚至解釋到點解而家買—我都係覺得係唔work的，但，「如果我錯呢」？之前推Tesla都有啲類似。但再煩氣提你一次：控制你嘅注碼。我大大個搶拎幾皮嘢買，同你冇其他投資全部瞓身，係兩回事。

FB Post Summary —港交所請條洋腸

19. 港交所請條洋腸—講港交所嘅新CEO，係個全無大陸味，中文都唔識嘅外資鬼佬。表面好出奇，實際好合理。反正必定都係要靠中國（唔通去佢老家阿根廷定克羅地亞搵公司上市？），而呢位仁兄應該會好似港大校長馬斐森咁畀人玩到謝，開會分分鐘講中文架空佢，或者中文講三十句譯一句畀佢聽。請佢純粹係做個Figure Head，正如證監都唔會請個大陸佬咁。咁鬼佬亦都唔係笨，有錢陪你做場戲何樂而不為，港交所好出得起錢，仲可以省鏡CV．