恭喜發財．傳說中的冇北水恒指要跌？3萬點啦老細．牛年美股一般都幾牛．冧把兩個—Pinterest，平安好醫生1833 (Patreon)

恭喜發財（都重要的，睇下）

傳說中的冇北水恒指要跌？3萬點啦老細

牛年美股一般都幾牛

冧把兩個—Pinterest，平安好醫生1833

恭喜發財（都重要的，睇下）

1. 恭喜發財，梗係發財啦。唔好睇少呢句嘢，你買股票梗係望發財。「乜有人唔係架咩？」，係喎，之前有啲話要參與革命打倒華爾街喎，你有得我輸啦，幾千蚊睇清楚（？）啲權貴嘅真面目—咁，華爾街咪就係搵呢啲人錢咯。你送錢我洗唔通我唔要？

2. 當然你明知搵笨，但走去同人接火棒鬥傻呢，雖然我唔主張，但至少你嘅思路都清晰啲。同樣地，如果你話咁快就其他股票身上搵返幾千幾萬蚊，咁你咪當你「睇清楚（？）啲權貴嘅真面目」嗰幾千係一個消費。但消費唔係投資，消費係你畀錢人。

3. 澄清返，錢當然好重要，但生命仲有其他嘢。個問題係你應該在適當嘅地方搵適當嘅嘢，歡場就無真愛，返工唔好搞同事，投資就梗係講錢。唔好感情用事，唔好鬥氣。求財，唔係求氣。

4. 8年 sort of 投行分析員，加上後來叫做做過幾年Research Head，畀到我最寶貴嘅教訓反而係：金融工作真係冇人care你感受，市場亦唔會理你感受。即使嗰咁多年間都發生唔少事，但我工作做嘅只係十分冷靜兼冷血咁分析（而當然，好多嘢唔係分析到的）。

5. 無論如何，祝大家今年賺多啲—呢句嘢有冇問題？係冇的。反而如果你新年打牌，廢老同你地四個講「大家贏多啲」，就有問題了。畫出腸啦：儘管好多人以為股票係 zero sum game（冇法，佢地水平太低），你贏我輸，但實際上唔係。華爾街呀 Deep State 呀 邊個都好，冇人阻到你10蚊買騰訊渣到而家—太高難度？咁冇人阻到你幾年前買QQQ 坐到而家。

6. 你要記住，冇人有義務去幫你實現你夢想（張如城咩）。相反，更多人可以利用你夢想搵佢自己嘅錢。例如「特許經營」，7-11之類，簡直係世上最邪惡但又最聰明嘅模式—利用啲人想做老細嘅心態。

7. 講遠咗，好多時一寫呢啲又有人反感。咁FB Page我當然話X之你感受，但呢度啲讀者畀錢嘛，真係有人睇完就unsub的。但都冇計。你要我日日講啲你啱聽嘅嘢冇話唔得，但你唔係一個月畀80蚊搵我做 誇誇群下話？

8. 再提大家一次，本人Patreon係唔放假的，所有嘢依舊出。年初一照出，年初二三只會得一篇，因為星期六日。初四之後當然都正常運作—美股係唔會care你過農曆年的。

傳說中的冇北水恒指要跌？3萬點啦老細

9. Talking about 美股唔care你過農曆年，咁又留意另一樣嘢：北水。真係MythBuster，雖然投資嘅嘢絶對唔係科學，但有時某啲講法係可以驗證嘅。例如傳說中嘅北水托住港股（呢部份比較深），或者衍生出嚟嘅—「年假冇北水個會跌會冇力」，甚至更大鑊嘅「咁我都係沽咗佢睇定先遲下買返」。

10. 喂，恒指年廿九抽500點上返3萬喎，你話呢？係咪冇北水唔識升？

11. 仲有，明報嘅報導很好，明確做埋畀你知，明明北水缺席港股係升多跌少喎！你嗰種錯誤嘅觀念點嚟？同「經濟差股市會跌」一樣，呢啲唔知邊個講出嚟嘅道理，你冇質疑過？最重要係，呢啲講法係可以驗證的，咁驗證埋你都唔理，誰之過？

12. 亦都話埋畀你知，點解我要科水訂咁多嘢。講真，明報又有人話廢，信報又廢，經濟又費，Economist 又貴得滯，FT又睇唔明，份份嘢都有人話垃圾架啦（包括你睇緊嘅呢個Patreon），你啲網友永遠本人最醒嘛。

13. 事實上亦係好多報紙嘅嘢都重覆（咁同一個世界嘛，Fact is fact），或者唔少很廢嘅內容—但Let’s say，我十蚊買份報紙（我是老嘢，但我同時訂埋電子版的），一日有一個故事我覺得正，已經好夠啦—而最妙嘅係，我會幫大家睇晒嘛！當然就要你信我了，但你唔信我就唔會科12蚊美金啦

牛年美股一般都幾牛

14. Talking about 牛年，不如睇下牛年嘅美股回報？（點解唔講港股？因為你呢幾日一定會見到有人整）

15. 首先，過去5個牛年，美股升咗4次。5次平均升幅14%，中位數係18%。好似幾好。但記住，「股票一般都係升架啦」，同埋「美股過去N年都係升多跌少」

16. 咁所以，排十二生肖年份美股回報，可能仲過癮，因為係排名。咁見到原來牛年呢，都排第三喎，就真係似乎不錯。最差嘅係蛇年，但拉勻都有少少升。

17. 有乜啟示？冇！你唔係以為有科學根據下話？不過統計L可以研究下到底個difference 係咪significant （我估唔係，sample size太細）。同埋，至少好過你睇麥玲玲

18. 另外留意，鬼佬當然唔會得閒到由年初一開始計到年三十，更加唔好研究立春定初一先係牛年呢啲咁深嘅問題—不過至少佢係用2月至下一年1月計，還好。唔好咁多要求。

19. 另一教訓：人地幫你做埋嘅嘢，就唔好自己浪費時間去自己run一次「研究」啦，特別係用Bloomberg可能幾分鐘，你自己在屋企搞成粒鐘—請善用你嘅時間。有啲嘢你明知有人（可能係傳媒，可能係我）會做，你自己唔使做啦。但你點知有人會做？咁你平時睇得多咪知咯！

冧把兩個—Pinterest，平安好醫生

20. 並唔係「利是股」，今年報紙雜誌啲「利是股」我全部都唔寫，我幾乎想寫「訂我Patreon」

21. 以上同大家講咗唔少大市或哲理嘅嘢，都係方便大家拜年吹水（真的，埃汾團年，三姑六婆都用咗唔少時間講Bitcoin講Tesla講富途），咁只係得啲宏觀嘢齋啲，醒兩個冧把畀你。

22. 首先係Pinterest（PINS），之前寫過下，但冇推過，寫親只係因為業績，最多搏大公司（Facebook Google）廣告收入勁佢都唔會差。咁早排Pinterest出咗業績亦係咁

23. 不過今次係睇中另一樣嘢：收購。就係話冇耐前微軟想買，不過而家應該告吹咗，可能因為太貴？嘩，隻嘢低位升咗9倍咁滯！但，反正微軟自己都貴，印公仔紙發新股咪得咯！但應該真係告吹咗了

24. 咁仲提嚟做乜？首先，微軟唔買其他人可以買。另外，亦可以睇其他收購目標。舊年12月寫過DropBox有機會畀人買，炒咗一下，無以為繼，但至少唔使點輸錢。今年照計都係呢個一線科企買二三線嘅主題，可能星期六講下。但首先留意，買人嘅同被買嘅未必要有好大仙甩治，但至少會唔會太唔啦更—我想像唔到微軟走去買ASML啦。同埋，都不能去到太大，Twitter Snap呢啲真係唔似會賣—市值唔算極大，但用戶多影響力大，創辦人唔想輕易走，反壟斷亦都難批。

25. 至於平安好醫生1833，再之前有一輪勁炒（舊年第二季），但而家靜咗好一排了。但忽然年三十先炒起。升乜？「契媽」Cathie Wood ETF增持喎。

26. 咁化學？係呀。但首先，都話隻嘢以前都炒過一輪。第二，升完之後都仲未破頂，今時今日仲有未破頂嘅科企應該都幾多人會追。第三，係幾化學的，不過升市莫估頂嘛（況且未破頂），又係老土嗰句，控制你嘅注碼咯，唔好成副身家甚至借錢買落去咪得。買少少仲好過日夜覺得爆煲最後過去一年乜都冇。