叫咗你唔好咁快手沽快手！大市繼續冇力，二線科技股繼續喪炒．今日主菜：比悲傷更悲傷的故事，3D System （DDD）．Lyft Twitter業績預告 (Patreon)

叫咗你唔好咁快手沽快手！

大市繼續冇力，二線科技股繼續喪炒

今日主菜：比悲傷更悲傷的故事，3D System （DDD）

Lyft Twitter業績預告

小版務（不太重要，忙嘅可唔睇）—越嚟越忙！

叫咗你唔好咁快手沽快手！

1. 類似「大師冇點你」咁，Instagram都寫過（再講一次，記得follow @ivanliresearch）。之前篇快手追渣追，叫咗你唔使沽住架啦。而家應該幫你至少賺多千幾銀，夠你畀一年Patreon有突。再講一次，一般股票都係用嚟渣。咁新股當然有啲唔同，我而家少玩，以前都有，有啲公司真係自己都唔信，純係鬥傻。但而家市場效率高咗好多，咁呢隻快手，我覺得都似係可以長渣嘅—當然值200定400 真係唔係咁易答—但，你好多人咪只係中一手，咁你輸盡咪一皮嘢，驚乜？但萬一隻嘢升幾倍呢？而大家都知呢期都仲係狂炒啲科技股，爭在邊隻咁解

2. 慎防有人要畫出腸：諗法冇變，冇貨嘅唔好買，有一手嘅繼續坐。超過一手嘅？因住畀人綁架（認真：可以沽一半）。

大市繼續冇力，二線科技股繼續喪炒

3. 星期二市況同之前寫嘅一樣，指數冇力，但二線科技股各自各精彩。又，留意係冇咗北水的，但都仲有1500億成交，不能只話有北水先會升。

4. 呢堆嘢都係之前有提過下嘅（太細嘅公司唔講了），美圖1357 移卡9923 心動 2400 明源雲 9909金山 3888 微盟 2013。如果你信「契媽」Cathie Wood嘅（佢係有一手的），當然係移卡9923。貪細嘅，就會美圖最細隻。祝你好運，就應該好難買齊咁多隻的。雖然如果買齊呢抽嘢今年都贏好多。

今日主菜：比悲傷更悲傷的故事，3D System （DDD）

5. 故事主人翁係我朋友Seafood狀棍。冇錯，有個同名嘅Facebook Page，請去畀like，又，梗係唔係我啦，鬼識嗰啲嘢咩。我寫佢嘅慘事，就幫佢宣傳下個Page．

6. 狀棍同我算多年朋友，佢亦有玩股票。今日嘅主角係呢隻嘢，呢隻呢排都居然唔只一個讀者問我嘅嘢：3D System（DDD）（聽個名都知好嘢），3D打印嘛，呢排又多人講，同埋好似Cathie Wood都有買定有吹，定好似早排美國連登仔推，我都冇多留意。

7. 勁到癲啦，係咪？真係股神。呢個只係年初至今嘅圖，而家情人節都未到呀！個半月10蚊升到56蚊！如果你睇舊年低位，5蚊樓下升上嚟添，10倍股呀！一年

8. 但故事當然冇咁簡單啦，記唔記得我講同佢相識多年？呢個就係伏線啦！隻股，佢係2013年買嘅！我幫你mark埋佢買嘅位，大約2013年（佢都唔多記得，好合理，創傷後遺症，慘劇後失憶咁）年尾，近80蚊！亦即係，事隔8年，仲係坐緊艇。會唔會回家呢？唔知，但一年前肯定話冇可能，而家就唔係了。

9. 作為一個前度教書佬，我反而唔想直接畀咩結論大家，而係你思考下，呢個故事有乜教訓呢？

10. 畀少少引導你：當其時，咩3D 打印，Hit到不得了，「等於而家啲咩雲計算電動車咁」。你有眼睇，2012-13嗰兩年，炒到飛天—但然後呢？留意個市唔差的，但呢個泡沫就爆了。

11. 咁泡沫爆都唔係好出奇，但就好少可有公司咁樣跌完可以再翻身的。其中一間係亞馬遜，上一次科網狂潮時跌九成幾—然後嘅嘢唔使再講。呢間DDD都勁，高位90蚊，跌到舊年5蚊有找，何止跌九成，係九成幾。但，居然今年翻生，你由輸九成到輸一半已經爭好遠！

12. 教訓係乜？我都唔知。可能當初狀棍應該嚴守止蝕？可能吧。但當時跌得好急。最仆街仲有幾次小反彈。去到2014年後先見到真係圓寂。

13. 如果我冇記錯，狀棍應該係在低位打咗靶。「咁2014年後所有位都係低位啦」。咁而家睇返當然dup春，但又係咪錯呢？又諗下，當10蚊打靶，咁當年打靶拎到嘅錢，如果拎去買其他嘢會點？「視乎你係咪買騰訊咯」

14. 但現實係，佢老哥應該係幾皮嘢輸剩幾千（跌九成幾喎），所以正路係拎去食咗佢。

15. 我懷疑個教訓係：如果跌一半，例如幾皮嘢輸到變皮幾嘢，都仲應該止蝕？但如果真係幾皮嘢輸到得幾千，就醫返都嘥藥費，反正套現你都只會拎去賭波，不如搏奇蹟—例如今次DDD就奇蹟。好似啲人普通病就睇醫生，但真係絶症就去搵氣功神醫了。

16. 仲有一個好大嘅教訓：大家記住，狀棍就買幾皮嘢玩下啫，輸晒最多去少次日本，或者買樓少兩格階磚。你地就唔好學啦。人地幾皮嘢同你幾皮嘢唔同呀！

17. 呀記住，唔好咁茅，有機會我再講呢個課題，但唔好用一個全知賢嘅角度去睇件事。你而家知道隻嘢會升返上55蚊咁梗係話唔好打靶啦！「應該舊年借孖展訓身家買添」。但邊有得咁樣事後睇返呢。用啲正常人嘅觀點啦，你買完隻嘢，幾皮嘢變到幾千銀，輸九成幾，你會點？

18. Bonus：隻嘢由2015年之後根本年年蝕錢，股價點會唔跌？講乜都假，全無盈利嘅，都係會不敵地心吸力。而留意2015蝕舖勁甘嘅，我都冇深究，可能係大幅撥備啦。但正係2014年股價已經大插，幾時都話股票炒預期。

Lyft Twitter業績預告

19. 兩間公司都星期二出業績，你睇到呢份嘢時應該出咗。所以只係快手講個preview。

20. Lyft，有冇人唔知係乜？「美國版UBER」，其實就係UBER嘅對手。問題係公司冇玩送外賣之類嘅嘢，似乎蝕章（但UBEREAT應該係蝕錢的）。因為肺炎封城冇遊客之類，收入一定大跌，街估收入562億，按年跌45%，同上一季（48％）差不多．每股虧損預1.21。看點睇公司燒錢燒成點。但又不過，股價過去幾個月升咗超過一個開。都話股價炒預期咯，有疫苗嘛。

21. Twitter，由頭到尾在香港都搞唔起，社運後就多啲人用（國際線喎），美國大選嗰期更多（最出名嘅用家係侵侵），有人估侵侵淡出後對公司都幾大影響，睇過？但當然今次業績未反映呢啲。預收入11.9億，按年升18%，每股盈利0.16（係喎公司有錢賺的）。公司嘅廣告收入當然有改善（第三季收入升14%），但唔好話同Facebook 比，即使同Snapchat或Pinterest比都落後。最新搞作好似想搞訂閱制，搶Patreon生意？N年前我覺得公司會畀人買，但而家反壟斷法咁惡就難啲了。

22. 星期三仲有UBER，有時間就寫，冇時間自己睇大數：預收入36億，按年跌12%，會好過上一季嘅跌18%。每股虧損0.55。留意UBEREAT係蝕錢的。

小版務（不太重要，忙嘅可唔睇）—越嚟越忙！

23. 近期有少少忙，好多想寫嘅嘢都寫唔到，第一個犧牲嘅當然係Facebook Page，免費嘛，唔使對啲友咁好

24. （順手講基本經濟嘢，in case 有人未聽過：你諗真啲，其實商務位成本，會多過經濟艙幾多？多份餐？坐少幾個客？頭等呢？想講一樣嘢：要整到經濟艙舒服啲，成本唔使加好多的，例如整靚份餐你估使幾錢？但點解唔整？答案係：特登整到經濟船咁惡頂—唔惡頂嘅話，買得起商務艙嘅人就唔會坐商務！）

25. 咁另外，可能會唔寫明報嘅專欄，或者唔寫經濟一周專欄（雖然只係寫咗兩期！），因為係一個仙都冇的（你以為有？）。咁我以前深烤要靠名氣，但而家有你地，真係唔使呢啲嘢。

26. 又或，好現實地，呢排同讀者食飯都用咗我唔少時間。食親都兩三個鐘啦。所以我就真係堅持要20蚊或40蚊嘅先食，唔係話咩我啲時間好值錢，但一星期食幾餐都幾係嘢的。唔會加價，因為有啲畀左年費，我忽然加價唔多公道。但可能再輪耐啲（希望開返晚市堂食就好啲），再加上我之後唔返工未必日日出城，所以未join 20蚊或40蚊會員嘅可以快join。

27. 拿，咁又3000字，計埋啲號外，我一個星期至少啤2萬字畀你，一個月冇10萬都有8萬字，真係完全收得唔貴。得閒叫多啲朋友訂，下個月就起身冇糧出了，應該會全職寫文。