指數冇力但太多太多太多錢了． 美股又新高，香港二線科技股仲有力。仲有688．Big Tech見頂？但Big Tech仲賺好多錢。新興市場到底係乜？冇咗份工你係乜水？沽空機構其實做乜的呢？海底都好嘈．羅賓漢就係Facebook of Investing．之後星期一至五都會有文！再加週末一篇 (Patreon)

快評幾句—指數冇力但太多太多太多錢了

大師冇點你— 美股又新高，香港二線科技股仲有力。仲有688

每日一圖—Big Tech見頂？但Big Tech仲賺好多錢。新興市場到底係乜？

Good Read —冇咗份工你係乜水？沽空機構其實做乜的呢？海底都好嘈

FB Post Summary —羅賓漢就係Facebook of Investing

小版務—（小小重要）之後星期一至五都會有文！再加週末一篇

快評幾句—指數冇力但太多太多太多錢了

1. 我都其實冇乜好講，你見指數幾次上試30000點都不果，甚至有人覺得係永遠突破唔到。咁當然Never say never，唐英年（誤）話齋有生之年你一定見到，通脹嘛。但指數冇乜力係事實，高位升400都要冇晒返。

2. 之但係，不能只睇指數。睇圖睇唔清嘅話你知：以上一堆股票，浪潮596，松景1079，赤子城9911，南方通信1617，天鴿1980，飛魚1022。有乜共通點？第一，都係升好多。第二，都係叫做「科技股」（至少個名係）。第三，我係從冇提過嘅！所以唔係放「大師冇點你」。實情有兩間我都唔知做乜，如果咁多間你都知晒做乜你都幾勁。

3. 結論都係嗰句，點都唔係散水格局，輪流炒，而大題目都仲係啲科技股。咁你鍾意嘅咪買六合彩咁揀下，或者又係嗰句，買指數ETF都得—問題係呢堆好似冇一隻係恒生科技指數，冇一隻夠100億市值。所以真係三四線股了。

4. 咁係咪炒到呢啲嘢就水尾，開到茶蘼？唔知呢，亦都唔太care．你嘅核心持股應該點都係指數或中大型嘅公司，然後有啲閒錢玩下呢類嘢咯，唔好本末倒置。

大師冇點你— 美股又新高，香港二線科技股仲有力。仲有688

5. 美股固然三大指數都新高，根本易玩到不得了。唔係話以後都會咁易，而係話，過去一年你仲要輸錢嘅，真係檢討下，你嘅投資出咗好大問題。咁嘅市都輸錢，我怕之後市況差會幾大劑。

6. 正如我再講一次，有人話我在呢度貼啲嘢，乜乜升咗，咁又點，咩位買先得？實情呢，好多嘢力推嗰啲，咪就係不停創新高，你任何位買都贏錢，根本冇得輸，亦唔使咩隻嘢10蚊我9蚊買11蚊止賺8蚊止蝕之類嘅垃圾操作。咁幾時賣？係唔使賣的。除非你退休結婚買樓移民之類。

7. Google不用講啦，業績強勁，不過新高後已轉跌，Big Tech都仲係完全開車，咪儲下貨。至於PayPal寫過N次啦，唔係事後先出嚟認叻。廸士尼亦都係，亦有講今年都係睇返多啲舊經濟股。

8. 另一方面，博雅434雲遊484呢堆就可以威下啦，就真係有講（唔同上面啲四線股）。當中雷蛇1337更加係極少人講添，升到新高啦，有交代啦？美圖1357都升到新高，問題係挫上挫落太勁，唔易坐得穩。繼續都係呢堆二線嘢走嚟走去。

9. 呀仲有，幸好，隻中海外688玩玩下都上返18蚊樓上。好掂就肯定唔係，但至少大家唔使點輸錢的。Rule number one就係希望大家唔好輸錢嘛。不過都係嗰句，制裁冇乜影響間公司，但其他嘢升得仲多了。機會成本問題。

每日一圖—Big Tech見頂？但Big Tech仲賺好多錢。新興市場到底係乜？

10. Big Tech見頂？—幾有趣嘅觀點，拎返史上嘅一啲「高科技泡沫」去同Big Tech股價比，分別係2000年嘅科網泡沫（納指），同埋差不多100年前嘅……留聲機收音機股。拍埋個圖幾靚，Big Tech好似見頂？但，幾肯定當年咩留聲機收音機，或者2000年堆科網，冇咁大影響力，亦冇賺咁多錢（睇埋下面一段）。又，你話有時啲圖啱睇你就信，唔信就質疑，係咪輸打贏要？都可能係。但如何分辨邊啲嘢會重覆邊啲唔會，就真正高學問，唔係三言兩言解到。正如我都講過，有啲人就總係做啲柒嘅決定，因為佢地本身就係咁嘅人。

11. 但Big Tech仲賺好多錢—咁回應返上面，你可以見到四大科企（唔知點解冇計微軟），過去十年純利升咗差不多10倍。又點會真係冇基本因素支持？同2000年炒概念 或者你去買GameStop根本唔係同一回事。

12. 新興市場到底係乜？—舊文有講咩係「新興市場」，冇睇嘅，咁簡單啲估下，MSCI新興市場入面有乜國家？比重又佔幾多？都會幾出人意表，好多神化嘢。固然係中國佔好多，但都同中國嘅GDP或公司市值不成正比，原因好多，舊文有寫，而十幾年前中國佔得少過台灣，十分搞笑。仲有，南韓同台灣都係兩大新興市場，但咁大嘅經濟體系都仲新興市場？舊文有講點解。同外匯管制有啲關係。

Good Read —冇咗份工你係乜水？沽空機構其實做乜的呢？海底都好嘈

13. 冇咗份工你係乜水？—幾應景，啱我睇。美國而家有7百萬人係「長期失業」（定義係半年），除咗錢外，仲有各種心理影響。即使個個講咩「唔好畀你工作定義你自己」，即使份工你並冇咩passion都好，畀人炒過就知，唔止係錢，仲係你自己嘅價值。呢篇文有討論下。

14. 沽空機構其實做乜的呢？—我不盡同意，但唔好只係圍爐睇自己同意嘅嘢。講到話禁沽空，除咗有恥笑大陸嘅「淨係畀買唔畀沽」（當時啲人係咁講，好搞笑，而家又係同一班人話沽空不道德應該禁），去到金融業界，似乎都係護航嘅人多（試下香港禁沽空睇下你啲網友又咩反應？），認為沽空都係要有嘅。我都係咁諗，其中一個支持沽空有理嘅講法，係價格發現，修正市場，你隻嘢overvalued我咪帶返佢落地面。不過呢篇文挑戰呢個講法。

15. 海底都好嘈—世上再無靜土（冇打錯字），去到海底都仲係好嘈，嘈過以前好多。連啲海洋生物都生存唔到。問題當然係各種嘅人類活動。

FB Post Summary —羅賓漢就係Facebook of Investing

16. 羅賓漢就係Facebook of Investing—實情貼返呢度嘅文，但慎防有人冇睇。週末寫嗰篇 免費嘅最貴：羅賓漢咪就係投資界Facebook，有血有淚，背後我睇左幾十篇文先寫出嚟。唔好以為嗰5000字好多，實情寫都唔使兩個鐘，但我之前睇其他嘢就好耐了。Anyway都係個核心信念：資本主義社會，冇免費午餐。你唔畀佣嘅，咁一定有其他方法賺返錢。咁但似乎大家都選擇咗寧願唔畀佣畀人賣data，就真係冇人迫你用羅賓漢唔用其他公司嘛，對不？「況且收咗你佣亦可以同時賣你data」

小版務—（小小重要）之後星期一至五都會有文！再加週末一篇

17. 大家都知，以前呢度係星期一冇文，我休息，有時整突發號外係另一回事。後來發現好似唔多啱，星期一有市，好多時有嘢想寫。而星期六日冇市，其實只出一篇深度文應該夠？之前安排當然亦因為我要返工，想搵一日平日夜晚休息，但隨住我好快離職，應該冇咁嘅必要了。

18. 所以，即日起，少少調動。星期一至五你都會有文。星期一三五就係好似今日呢篇咁，有每日一圖有Good Read有FB Post Summary嘅東西。星期二四就係普通講市。咁當然星期一三五都仲有「快評兩句」同「大師冇點你」講市況，應該適合。

19. 另外，週末（星期六同日）就只會出一篇文，都仲係保留以前嘅星期六專題咁，但可能星期六出，亦可能星期日，睇情況。

20. Sum up：講咁多其實你收到嘅嘢冇變過，只係星期日嗰篇調咗去星期一。而個週末專題會係星期六或星期日是但一日出。冇搵你笨。