白銀星明一：PAAS，WPM，HL (Patreon)

（Update：好似又話唔炒銀啦喎，自行睇路，但講真要睇住班網友炒乜都有點反智，不過好多讀者鍾意，冇計）

1. 其實原本星期一係冇文的，休息嘛。不過都成日總係星期一就有啲突發嘢，正如放假就會病咁。

2. 而其實寫呢啲原本我係拒絶的，唔太鍾意畀冧把嘛（定你以為呢度係日日畀冧把？）

3. 不過如果就咁免費貼去Instagram 你又唔順氣，覺得免費都有得睇做乜要訂（都好似有道理） （但Instagram @ivanliresearch 還是要科勞，唔係講笑，唔係為我搵食，我都唔靠ig，真係為你好）

4. 再加上月頭，畀啲見面禮啲新讀者。而上個月又好似冇乜人unsubscribe，十分好。最後加上昨日發泄完一輪 Gamestop令我煩悶，而家心情好返好多。

5. 好啦，以上講咁多，都係講今日主題，其實幾句講完。白銀。

6. 大家都可能知美國連登仔轉戰白銀，而我覺得總比買啲垃圾股票make sense．不過提返大家，白銀係冇得點夾倉的，唔好玩啦，明明寫過亨特兄弟，唔記得啦？人地買到全世界三份一白銀都夾唔到倉，交易所會改規則。美國連登仔何德何能？

7. 但冇所謂，眾志成城，鬥傻。係喎，就只係鬥傻架咋。幾時都係嗰句，投資同投機當然唔同，正如正經結婚同炮友都唔同。咁我唔係道德上身話乜，只係你唔好炮友當咗認真，或者認真當係炮友就得。呢啲東西唔會令你生活點明顯改善的，當然你想執幾皮幾千就可以嘅（執完最好上VIP請我食飯）

8. 「冇拿？冇基本因素架？」。冇架，你要睇基本因素睇平時啲嘢得啦。呢個純粹畀你過癮，反正個個都咁興奮。我就無謂阻住你去冒險，你當我好似老豆咁，叫你玩還玩記得用套咁啦。

9. 但始終正經講，白銀黃金甚至bitcoin，同現實世界關係不大，就真係貨幣供應嘅鏡子。亦係宗教狂熱，夠人買就得。唔似啲破產公司，你Gamestop甚麼夾到上幾千蚊嘅，實有人敢沽空。

10. 咁你見，銀價勁升啦，雖然再講一次，咁大個市場，應該冇乜可能夾得到。當然掉轉，亦冇乜人好大誘因高位沽落嚟

11. 咁香港呢啲咩 中國白銀同 金貓銀貓，炒到癲啦。唔好追。

12. 反而你睇美股呢啲銀礦商，升幅唔算好過份。

13. 就係咁，講完。自己小心。如果我可以買嘛（工作關係不能）？我都會買些少的。但些少咋。我100萬拎5萬去買，同你90萬拎90萬買，兩回事

14. 贏咗？我就梗係出Post搵啲新讀者，咁在你層面，你贏咗當然係你眼光好。輸咗？亦當然係你問題。冇人拎支搶迫你賭嘛。