投資，和哲學—由GME說起 (Patreon)

引言：讀者識貨自然有好嘢

魯迅棄醫從文，我就唔畀冧把講哲學

You don’t have to kiss All the Beauties　—點解我冇買冇沽冇炒GME？

錯失嘅股票，係唔會令你輸錢的

Measure yourself only against your previous self.

醫生，我啲網友唔係咁講喎，信邊個好？

網友至X醒，但IB爆煲未？

我食花生，一樣過得很好。

真係講哲學，聽日後日先變返冧把。或者你去睇我IG，幾時都有冧把。

引言：讀者識貨自然有好嘢

1. 留意唔係「投資哲學」，而係投資，同埋哲學。打咗5000字，破紀錄啦，但我寫文時心情係靚的。不過你睇完心情仲靚唔靚我唔敢包。但真係多謝咁多讀者，1月嘅退訂人數非常少，令我大膽啲寫嘢。係應該咁的，寫文你唔同意嘅，咪當冇睇過，或者靜俏俏退訂咯。你諗下掉轉，你唔啱聽就開口媽嘅，咁冇嘢嘅，我又唔會同你嘈（好得閒？），我咪下次唔寫，和稀泥，「拿雙方呢都係有佢理據嘅我地」「我地希望緬甸各方都保持克制」，我錢照收之嘛，但最後係你損失。

2. 由GameStop（GME）帶起，但照計以下超過一半內容都同GME冇關。GME照計，應該End Game啦？但我係想講下成個事件嘅教訓，隨想，或者一啲其他虛無啲嘅哲學心法嘢。咁有時齋講太抽象，有實證就好。

3. 篇文長，又比較鬆散，但絶對值得睇，亦唔難入口，你當聽收音機都得。我甚至考慮做一個audio，或者Clubhouse

魯迅棄醫從文，我就唔畀冧把講哲學

4. 各人睇我文嘅動機唔同，經驗身家風險取向都唔同，難聽講句就眾口難調，但在我反而冇乜問題—正因為太多唔同讀者，根本冇得就，我只能做自己覺得大家最有用，或我最拿手嘅嘢。記唔記得好早期我講過，寫呢堆嘢嗰時，我係當自己Omakase廚師（我仲唔會理你有冇嘢敏感！你唔睇港股嘅，自己掉走佢）

5. 想講係，雖然我一向唔主張畀冧把，但你又發現我都寫好多公司。當中好多原因，一來人就係矛盾，二來亦有市場取向，如果我每篇都叫你月供盈富基金，咁應該好快執笠。我亦真心鍾意分享唔同公司嘅異動呀故事呀咁。

6. 但往往發現，即使都係嗰啲公司都好，都係有啲讀者賺大錢，有啲要輸錢。你可以話因為我寫太多，咁唔同讀者跟唔同嘢就會咁。都係原因之一。但即使N年前，我啲朋友跟我推薦月供啲港股，一樣係有啲朋友好好（唔少好過我），有啲好差。證明你「個人」都係有一定影響。

7. 應該大家都聽過下，魯迅點解棄醫從文。佢自己嘅講法（BTW，medium文章有我嘅講法，五千字）話中國人思想有問題，只係救身體冇用，要救個思想咁。我就係類似咁嘅想法，當然我唔係魯迅，你唔係東亞病夫。

You don’t have to kiss All the Beauties　—點解我冇買冇沽冇炒GME？

8. 我完全冇買GME，亦都冇沽，亦冇買賣任何相關嘅衍生工具，未來幾個月都唔打算。（廢事講咁死，陣間五年後畀人搵返出嚟抽水）。呢樣我講過，但你有冇諗，點解？

9. 最簡單嘅解釋：我唔買得。但我都就快離職，相信都唔會有人理我。我亦可以話你知，即使冇任何限制，我都唔會買賣。我識嘅朋友同讀者中都唔係太多有，係有部份問我：既然你覺得實爆煲，係咪應該買個遠期put？我好似答咗佢可以。

10. 高層次少少嘅答案：我覺得最後會跌，唔會同人玩接火棒。講真我亦唔知啲讀者做乜咁好精神，有啲在美國就冇所謂，在香港嘅，唔使返工？

11. 造淡又如何？我當然傾向咁，但，正所謂the market can stay irrational longer than you can stay solvent，你睇啲對沖基金都知。提提你，我寫GME話唔好買時「只係」60蚊，而家都仲唔止。

12. 咁學讀者咁，long put 得啦掛。真爆煲就有得執，唔爆煲大不了我輸晒啲期權金。Sounds good，但for some reason，你發現我差不多係唔買賣衍生工具嘅。我對上一次買輪，應該係2007年？邏輯如下：睇市都係估估下，都唔準，放大嚟玩咪更加唔準。而肯定呢啲工具「大戶」係食水更深。所以一般我只買正股。正如我係一個好多時只買term life嘅西客（我個保險經紀好似有訂我Patreon），明知越多花臣就食你越多。

13. 但，你話，刀仔鋸大樹喎。係喎，呢個亦係我against嘅。我好似用唔同手法寫過好多次，我寧願大大注，一球身家訓落去搏15%回報，好過你買得幾皮嘢搏一倍。

14. 當然，以上只係我against，不代表你都唔應該。不方便嘅真相一：投資反映你性格，記住呢句嘢，亦因為咁點解同一班人聽同一堆故事都會有唔同投資結果，而性格有時冇分好壞，你亦根本冇法改。不方便嘅真相二：明顯因為我都係個中產，自然保守啲，更有錢嘅人佢一年10%已經好夠，最緊要唔好輸錢。但如果我剛出嚟做嘢嘅，我一年儲得皮嘢，你同我講10%回報，兩千蚊都未夠我去次日本（城）。所以本細嘅人一定想進取，理解的。

15. 行咗咁大個圈，點解我冇參與GME？倒唔係因為我要保持「中立」（係絶對唔需要的，等於我100%買股票我照樣唱好，唔通我要沽晒先可以唱好？）。而係：

16. You Can't Kiss Every Pretty Girl。或者You don’t have to kiss All the Beauties．

17. 靚女好靚仔好好股票都好，花多眼亂，金錢有限。我當你金錢無限（美股一股股咁買，真係買晒羅素2000全餐都得？我未統計），但時間呢？專注力呢？

錯失嘅股票，係唔會令你輸錢的

18. 事實上你亦唔需要眼紅人地，最好唔好睇其他人。你最好都有一舖代表作全壘打 147 度 Grand Slam 乜都好，例如我都有買過升十倍嘅股票（當然渣到尾先計）。但你冇都冇所謂，你唔使去到好叻，唔使每條魚都撈。

19. 而我想講嘅係，現實識我識得耐嘅人，應該知我係好花心嘅人。係，對所有嘢都係，曾經股票儲埋一堆。但我都明白呢個道理。

20. 於是，帶到我去去第二樣嘢：

21. 你要記住，你錯失嘅股票，係唔會令你輸錢的！！！

22. 講出嚟好簡單，大家都知，但你諗下心理上係咪咁？因為你鍾意同人比較嘛。我都會，甚至你唔搵人，人地都搵上門。何況仲有萬惡嘅Facebook/IG，仲有萬惡嘅Pantry，仲有萬惡嘅團年飯。

23. 投資耐嘅應該知道，呢個世界最慘唔係股災輸錢，2008我差不多輸晒成副身家，100萬港紙（我做咗六年嘢，教書兩年銀行兩年分析員兩年），但唔係好難受，因為大把人一齊。

24. 呢個世界最痛苦，就係人地贏錢，你冇份。信我，好痛苦。特別如果係贏錢嘅仲係一啲你睇唔起嘅人。特別如果你自己做金融又讀過下書（即係我），而贏錢嘅係個師奶（即係我老母），佢仲要恥笑你嗰時。呀林太嗰句：「專家？食屎啦！」流傳咁耐，自有原因（FYI，雖然我細個都住嘉湖，但我唔係姓林的）

Measure yourself only against your previous self.

25. 真係架，如果你見住身邊啲盲毛（自己定義）都不停贏錢，你啲乜乜 Apple騰訊就唔郁，心理好唔平衡。

26. 可以點？帶到我地去第三句金句：Measure yourself only against your previous self.

27. 真係的，呢個係人生快樂泉源。當然最好你嘅yourself同previous self唔好太差，否則就「弱智兒童歡樂無窮」，「今日柒少咗」「有進步」。咁但，都好似係唯一方法。

28. 你要記住，真係人比人，比死人。我敢講我夠資格講兩句。多得大家，我Patreon 1300讀者，公開資訊啦。咁收幾錢又明碼實價，你100蚊我落袋85。你計到呢度有幾錢。你有幾多人只賣文可以有呢個收入？

29. 但，我一樣都係畀人X到開花，由我1997年（廢老mode）開始網上寫嘢，每一日都畀人話我唔識寫一舊舊，寫嘢又錯晒，咁X樣都有資格收錢？真係阿豬阿狗都做KOL。而家一樣係！以前我以為到我寫得好啲（咁，有人訂就寫得好架啦，我係流行音樂嘛，唔係莫華倫），就會冇呢啲批評。係錯的！正如啲人可以話，扯，1300人巴乜閉？沈旭暉幾千人啦（好似唔止），蕭若元幾萬人啦！拿，人地都未出聲。我肯定我去到蕭若元（which 我冇能力）咁嘅水平，都仲會有人話：拿，張栢芝（no offense ）唱到咁X樣都幾分鐘收成百萬啦，你仲要拍片？

30. 冇的，You can never win，所以記住，Measure yourself only against your previous self。當然你唔好太差，但真係太差，都冇計架！

醫生，我啲網友唔係咁講喎，信邊個好？

31. 一寫寫到好長，應該仲有好多嘢想寫，但可能留返第二部，覺得好睇嘅留言或PM我（最好Whatsapp或FB Message），咪整第二部。

32. 但我仲想講多一個point：就係，你應該信邊個？

33. 呢個都唔止係投資嘅問題，甚至係現代人每日遇到嘅問題，更多嘅資訊，似乎令你更加矛盾。無謂係金融，政治，科學，都係咁。年紀大啲嘅，會唔會有啲懷念以前個世界好簡單？以前醫生叫你打針就打針架啦，而家個個都Google，或者上Baby Kingdom，甚至大返醫生轉頭。相信一啲真專業嘅讀者都遇到呢啲問題。何況，專家都可以互相打交，喂，呢個專家話打疫苗會自閉B喎，嗰個又話冇事，即係點？顧小培又PhD，薜達又PhD，周兆祥都PhD喎。係咪睇邊間學校勁啲？

34. 醫學都如此，咁你去到金融，或者政治呢啲「非科學」，就更加大鑊，因為好多嘢都未必有完全對錯（傳說中的「加息不利股市」「股市同實體經濟脫節」）。好多係matter of opinion，或者睇你點定義，或者根本一路變緊，或者到幾廿年後先知道（try「最低工資不利就業」）

35. 我想講，Believability，係大家呢個年代面對最大嘅課題（我覺得自己忽然利世民/李兆富上身）

36. 如果係你嘅專業，例如你係日本人，你開餐廳，咁面對「日本人唔食三文魚刺身」，你自然知道係定唔係。但如果完全唔係你識嘅嘢，面對唔同意見，我信邊個？點決定？我三十年前已經同同學討論呢個問題，結論都係冇，但總可以有啲方向。

37. 一般人選擇嘅係：令佢comfortable 嘅方向，即係圍爐，俗稱打飛機。撫心自問，唔好低估朋輩影響／壓力，Fuck that 獨立思考，如果有讀過心理學有睇過實驗嘅都知道，我搵幾條友做媒恥笑你畀壓力你，答錯就電X你，包保你明明見到係鹿都覺得自己係咪睇錯，其實係咪馬？

38. 真係唔好高估自己，好多人，包括我都係咁。你心中已經有咗個決定，但都去問人，想搵人支持嘛。呢啲根本係人之常情，亦都未必有得改，你只能夠提防，你要知道自己有呢種問題。

39. 咁你話，唯有聽專家講。聽落幾好，問題係，誰是專家？自然科學都仲好啲，但你見而家好多人都唔信醫生。正如朋友做律師，都好多人拎TVB去大佢。咁去到金融政治之類，喂，邊個先係專家？係咪有PhD先係？係咪大學教授就係？係咪有好多錢嘅就係？定著套西裝靚仔啲就係？我都唔知。

40. 又或者，信個一路冇點你嘅人？但，羅素雞嘛，每日都準時餵你食嘢，點解最後一日劏咗你？

41. 又或者，信你身邊最信任嘅人？不幸地，佢地嘅見解未必係好嘅。又或者，不一定會係為你最好。你信任佢，不等於佢又信任你。可能佢好想你PK呢。就算大家都出於善心，地獄之路係咁鋪成嘛（Try「香爐灰開水畀個仔飲」，in good faith）

42. 以上呢啲問題，都真係冇乜好好嘅答案。再玩落去就涉及Theory of Knowledge（IB必讀，又，唔係Interactive Brokers，唔好咁爛賭），或者種種哲學問題。例如，What do you mean by 因為咁咁所以咁咁？咩叫做 A對B有影響？

43. 唔想咁快痴線嘅，畀篇短文你睇。冇答案，但會引導你去好啲嘅方向。How to make better decisions: consider Believability。入面引Ray Dalio（又，佢又係咪專家？但佢隻基金表現真係分分鐘差過好多散仔）

44. Summary：唔係所有意見都有同樣地位（而我心底係精英主義，唔BUY一人一票的），你信嘅人尊敬嘅人亦不一定值得聽。咩先係專家？佢要在嗰個領域，有往績，有成功過幾次，仲要講得出點解（否則就陷入畢菲特嘅「擲公字專家」問題），令人信服。

網友至X醒，但IB爆煲未？

45. 我用一個例子總結：GME事件，你有冇聽過以下幾樣嘢？

對沖基金一定要不問價平盤星期五期權結算就幾多錢都要追

IB借晒貨畀人，到時還唔到貨就會爆煲，金融災難

對沖基金輸到爆煲要狂沽股票會拖冧市場

46. 至少你都聽過一樣，甚至係幾樣齊。但最後有冇發生呢，可？（勉強嚟講，第三樣有嘅，美股跌咗幾個%，但幾個% is nothing）。發唔發現，呢啲就同傳說中講咗幾十次嘅聯匯崩潰 或者提走晒存款行爆煲一樣？正如上一次負期油，又係有人話IB爆煲，IB一年爆煲嘅次數多過羅樂林。

47. 你唔使信我，或者唔使信政府，唔使信官方。但你可以睇下各大傳媒點講？但好多人寧願信美國連登仔，或者各式網友陰謀論。點解？即係又玩「傳媒都畀人買通晒」？你又點知你啲網友冇畀人買通？況且，冇畀人買通都可以柒爆架嘛。如果傳媒都係夾埋大戶呃九你錢，借問聲我隻股票點升十倍？你點樣可以Tesla 480蚊（有啲人更早）渣到900蚊？即係你贏錢時就公正，你輸錢（甚至你根本冇買GME）就畀人買通？

48. 你見我耐唔耐取笑「你啲網友」，但事實係咁。你可以唔信我，但我叫你睇David Webb 黃國英 盧志威，因為我覺得佢地勁。你覺得佢地係基金一親金融界嘅，你咪睇左膠傳媒Washington Post，你覺得WP智障嘅（有時都幾），你咪睇親共和黨嘅WSJ。你覺得啲記者唔夠專業嘅（有時都係），你咪睇Financial Times睇Economist。人地百九幾年招牌，寫嘅全部係勁人（當然，如何分勁人廢人又係另一學問），你唔信，而去信啲美國連登仔？或者你啲網友？

49. 唯一解釋，咪因為你圍爐，佢地講嘅嘢你想發生，佢地令你感覺好。

50. 而我不客氣就會講：咁X醒，做乜咁窮？

51. 真喎，你係畫家你係作家，我可以接受你好勁但好潦倒。但，我地講金融下話？網友咁醒料事如神嘅，做乜似樣少少嘅工都搵唔到份？知道港股爆煲，炒期指都發達啦。

52. 而講到尾，往績嘛。咁你睇返，之前啲咩存款爆煲論，港紙爆煲論，結果點？呢個真係同政治無關，但唔好搞到好似共濟會 Deep State 咁反智啦，今年唔中就下年中，2000唔世界末日就2046。

我食花生，一樣過得很好。

53. Off晒Topic：畀我總結一句—呢篇文係我暫時咁多文中最滿意嘅幾篇之一。當中用咗唔少故事典故（羅素雞，擲公字專家等等），唔明嘅Google下，或者睇我啲文我都成日回帶。

54. 股票嘛，GME崩盤，但又如何？其他股票已經升返晒啦，Tesla差不多上返900，Google都新高啦。你同我根本唔使參與呢啲遊戲，贏錢飽食驚風散，仲可能輸得甘。信報（還是有時有啲嘢好睇）郝承林話頭，投資冇難度分加的。你搞一大輪胃痛失眠搵嘅1萬蚊，唔會香過我坐定定收息嘅1萬蚊。

55. 你想知多啲嘢，可以，但真係唔使走去試自己眼光。真係想試嘅，有位讀者，人工身家多過我，但佢拎幾千蚊（港紙！）去玩嗰堆嘢。

56. 應該好快變返舊文形式，但真係剪存呢篇。記住呀，魯迅。心態唔啱，再多冧把都救你唔到。我都唔係好叻，有冇話你知我200蚊買過Tesla？係未拆之前嘅200蚊呀！有單為證添呀！不如搵日貼上嚟自己恥笑自己。當然賣咗啦！但又兜返一句，你真係唔使好叻，你大約同大市同步，都夠你十分富貴。複利的威力嘛。一年贏十幾巴仙好夠架啦。

57. 我想特別多謝一位讀者，就係星期二約食飯嗰位。同佢食完飯啟發咗我要打篇咁嘅文。所以呢，點解我要搞同讀者食飯，真係雙向的，你學到嘢時，我亦觸發到自己思考，特別係見啲年紀同我爭一截嘅讀者，或者背景爭好遠嘅。咁先有火花。（行家食飯就多數變咗講是非）。

58. 順手最後答埋個FAQ：你見之前有啲讀者請食飯好豪，咁佢地十分尊敬我，很好。但真係唔好有壓力，我是認真的，你唔怕嘈唔怕坐得唔舒服嘅，麥當勞譚仔我都食，當然原則都係你請。不過好似好多人都怕醜，我建議1號讀者（正係高山）睇到呢篇文不如同我去食麥當勞，由你開始，唔好等其他人唔敢請。