GameStop嘅嘢。蘋果十分賺錢。美國股市同實體經濟脫節。做乜咁多生產力大師？股票係會無啦啦咁跌的。 (Patreon)

快評幾句（結果好多句）—GameStop嘅嘢……

每日一圖—蘋果十分賺錢。美國股市同實體經濟脫節

Good Read —做乜咁多生產力大師？股票係會無啦啦咁跌的。

FB Post Summary —從缺

又到月頭，又係乞食時間，下個月就冇工返啦，靠你地。呢排都keep住有同讀者食飯，未join 20蚊或40蚊會員嘅可以join．Join咗未約到嘅得閒可以催下我，總會畀你約到。另外，如果唔介意嘅，畀個捷徑你，食晚飯！當然我係奉工守法的，玩法係買外賣上我公司食！反正而家我一個霸晒間房。

不過記記記記住，星期一夜晚先好join，因為佢計美國時間！你早上快手join就會扣兩次錢。

另外你發現，如果你經常PM我問嘢呢，我都會建議你join 20蚊或40蚊會員，當然唔係強制性質，（暫時）唔會玩到普遍會員唔畀問咁串，天地良心，所有讀者我有問必答，對不？但都盡量想對啲VIP又公平啲，講咗一個月畀多8蚊美金唔係咩錢啫。但人人都做，去到我度積少成多就好多。

快評幾句（結果好多句）—GameStop嘅嘢……

1. 我就唔知你地，但呢隻GME已經令我相當煩厭。特別係我啲FB Post都畀人狂媽（冇計，月尾要吸下新讀者，否則我寫都費事）。開始發現呢個世界上好多人只係想聽自己鍾意嘅嘢。咁無謂阻佢地。得罪講句，錢又冇畀。所以都係專心呢度寫算。但可能短期都唔再寫（請睇第一句），不過 RobinHood我就會寫。

2. 其實呢，好多地方都有詳細講過。例如你可以睇「估值教父」嘅文，長，但極詳細，人地就係要寫咁詳細，唔係你啲網友咁TVB總之呢個就奸嘅。Bloomberg嘅Matt Levin同John Arthurs都寫足咁多日，仲有David Webb．基本上行家啲意見都係差不多：最後當然係散戶損手（當然早買嘅會贏錢），好可能對沖基金賺到笑（我500蚊沽空應該好易賺），亦唔係咩 打倒華爾街，Robin Hood限買係正常做法。當然如果堅持話人地全部都係打龍通個個都收咗錢，做記者嘅又收錢，教大學嘅又收錢，（喂，幾時有人畀錢我先？），咁實在冇乜嘢好討論。你可以繼續睇你網友嘅陰謀論。

3. 仲有，我實在唔明，唔少人根本冇買，亦都冇沽空呢隻嘢。但做乜咁大反應？原來好多人係法國大革命上身，當打倒華爾街咁玩喎。舊文都寫過呢種虛妄，我完全唔明，2008年明明沽空機構（Michael Burry 等等）係英雄The Big Short，明明係華爾街貪婪，做乜而家又變咗沽空機構係仆街。明明大家恥笑大陸只畀買唔畀沽，做乜沽空基構又變咗仆街。明明沽空機構踢爆啲中資公司騙局大賺一筆大快人心（而華爾街大行因為上市費當然樂於中資公司上市），而家又變咗仆街。明明沽空機構同華爾街大行唔同路架喎。唔理了，總之都係仆街。

4. 更唔好講根本王健林（AMC嘛），Citadel（對沖基金，亦係Robinhood投資者），BlackRock，仲有SilverLake（私募基金，投資咗落AMC）執咗唔少錢。呢啲又係咪華爾街？唔知。總之有人仆街我就好開心，其他華爾街賺到笑冇所謂。哦。

5. 拿，以上種種唔係我講的，全部係Bloomberg Reuters等等講。當然你要講到咩「主流傳媒全部都畀人收買」嘅，就好難再討論落去。正如有人話我知「監管機構都畀人收買」「成個股市都係騙局」（但又繼續買股票）

6. 然後扯到去Robinhood唔畀買，一早講咗你咁玩法人地要margin requirement，唔係咩臨時加嘅嘢，但就話監管機構都係夾埋打籠通。況且，你唔經RobinHood買，可以其他地方買呀（否則何來買盤？），但又唔理。

7. 勞蘇發完。我理解唔少呢度嘅讀者，都真係為咗想知多啲。詳細我可能都仲會寫，亦可能唔會（參考第一段第一句）。但舊文講嘅都差不多，結果，就當然係隻嘢會跌返去30蚊，甚至10蚊樓下啦。咁咩人輸錢？你可以估下，睇下而家60蚊以上買嗰啲係咪全部走到，而高位買嘅又係咩人，更唔好講「大戶」更加可以60蚊買。而我幾肯定，總有更大嘅對沖基金在呢度啲再沽空。明知最後（唔知幾多日啦下）會跌返去30蚊甚至10蚊，點解唔沽空？你散戶真係無限子彈？睇下壹傳媒282？更唔好講有冇機會監管機構使橫手—呢個亦係搞笑嘅地方，既然明知監管機構有事都係救銀行（我不反對呢個講法），咁你仲玩？

8. 不過，仲有三點可以講下

第一， 會唔會GameStop批新股？我覺得係幾有趣嘅一樣嘢。暫時為止，公司本身近乎冇受惠，你股價升關佢鬼事，除咗係啲股東可以甩身。正如壹傳媒炒上，本身都幫唔到公司—但如果批新股拎錢就唔同啦！有錢入到公司，咁真係死公司都救返生—不過，亦只代表間公司可能唔止以前咁只值10蚊，可能20蚊？亦唔好忘記，市值大咗，公司多咗錢，股價可以再跌架喎，你發新股嘛，可能大幅攤薄。而我亦有啲懷疑啲新股有冇人要—有嘅就發咗啦—而「大戶」到時又可以拎呢啲股票嚟還貨啦喎！講得比較亂，但你見AMC都係咁嘅做法，亦因為咁令王健林賺錢，以及令Silver Lake賺錢（原本係convertible bond，轉咗股份，套現）

第二， 會唔會炒到入標普指數？拿，理論上，如果玩到好似Tesla咁，到時有被動基金接貨，咪得咯？都好似係。都唔使再炒上好多，而家Gamestop嘅市值已經大過唔少標普指數成份股！不過，下次檢討幾時？好似仲要捱多一陣。仲有最重要嘅：記唔記得寫Tesla嗰時講過，公司要連續四季賺錢喎。咁即係，至少等多一年，相信係冇乜可能。

第三， 會唔會搞到系統風險？相信係唔會嘅。有人提LTCM，十分好。LTCM當年的確係輸到要聯儲局救，亦都幾爭議（但當年未有連登未有Facebook），LTCM都不過係輸咗50億美金—而家啲對沖基金應唔止。有機會詳寫，但首先，而家印咗咁多錢，聯儲局等等嘅規模大咗好多了。第二，當年就真係似救華爾街大行—LTCM死根本冇乜大問題，但間間華爾街大行（BTW，唔係對沖基金）借錢畀佢，所以要齊齊救。而當年，係冇造成咩好大嘅系統性風險。美股全年照升30%。呢排美股跌，係咪同啲對沖基金要班水有關？可能部份係，如果再跌，直頭入市良機。

每日一圖—蘋果十分賺錢。美國股市同實體經濟脫節

9. 蘋果十分賺錢—之前都寫過了，蘋果季度收入首次突破1000億美金，史上最高。科企之中，就只有亞馬遜有咁嘅收入金額。不過又留意，傳統企業有幾間（Walmart，仲有中石油中石化）唔止咁嘅收入，但利潤就爭得遠了。即使亞馬遜嘅profit margin同蘋果比都係爭好遠。點解蘋果係全球市值最高公司（唯一一間超過2萬億美金）？就因為好賺錢。有幾深？

10. 美國股市同實體經濟脫節—美國卒之出咗舊年全年GDP（但講真，除左啲蛋頭學者，who cares？），按年跌2.5%，金融海嘯以嚟最勁（但居然都冇勁過金融海嘯）。但，美股照升18%。實情美國近幾十年都好少全年經濟收縮，00，01，02都冇，但股市反而連跌三年。記唔記得舊年3月啲友係咁話經濟好大鑊？and？

Good Read —做乜咁多生產力大師？股票係會無啦啦咁跌的。

11. 做乜咁多生產力大師？—相當奇怪，有唔少讀者約我食飯，係想知道我咩構造—想知我點分配時間，點睇到咁多嘢等等（簡短答案：唔好生仔，搵份hea工，唔好上網同人嘈）。呢篇文都講，近年係好多productivity KOL，但點解疫情中大家仲咁搏？可能係因為覺得自己份工都唔穩，又或者WHF多咗時間睇呢啲嘢，甚至多咗時間可以諗side hustle。

12. 股票係會無啦啦咁跌的—上面有講蘋果，實情即使10年前Steve Jobs釘蓋時，公司已經無人不知。但大家永遠係懷疑，喂佢死咗後仲得唔得架。特別係股價跌嗰時，自然人人就會搵「解釋」，媒體亦都會「解釋」（因為讀者鍾意）。呢篇係the Reformed Broker嘅文（全部文都好好睇），講返個故事，2018年，幾個星期之間，無緣無故，蘋果股價差不多跌咗4成。而標普指數亦都跌咗差不多20%。當時驚乜？話驚聯儲局收水啦，話驚中國會報復貿易戰啦。咁唔使講，事後睇返，你知道當時係買入良機。但正如舊年3月一樣，要低位買都真係幾難（但你可以每月定期投資）—不過，你至少唔好畀人低位震走。你諗下嗰時你賣咗蘋果，而家有乜感想？（當時低位差不多37蚊，而家132）。所以，點解跌少少就咁驚？固然當時你唔會知道事後會彈返，但呢個故事話你知，股票係會無啦啦跌的。心理捱唔到嘅？咁你可以月供ETF。但標普指數都幾個星期跌咗20%。

FB Post Summary —從缺

13. 是的，從缺都會寫明。原本想寫篇講Clubhouse，未夠時間，但應該聽日會寫，有興趣可以自己研究下係乜。