可能搞個勞蘇基金。嘩。摩連奴 as a Metaphor．明源雲909，王維基1137，雷蛇1337，心動2400．AliBaba AliBaba跟蹤土匪好勇敢．美股：NetFlix，ASML績後新高。Google都新高。FB低位反彈唔少 (Patreon)

小版務：可能搞個勞蘇基金。嘩。

摩連奴 as a Metaphor

明源雲909，王維基1137，雷蛇1337，心動2400

AliBaba AliBaba跟蹤土匪好勇敢

美股：NetFlix，ASML績後新高。Google都新高。FB低位反彈唔少

1. 出咗篇NetFlix號外，4千字，都幾多人問呢間公司。又，號外文，索性免費，方便我吸新讀者。

2. 而我寫完篇號外都仲keep寫埋呢篇！聽講我好似話事忙。不過講真，星期四應該真係冇文了。

小版務：可能搞個勞蘇基金。嘩。

3. 另外，雖然十劃未有一撇，但有可能今年之後搞個類似基金咁嘅嘢。當然攞正牌，唔係非法集資或私下問你拎錢嗰種。讀者都歡迎參加，但門檻唔低，你預50萬港紙起跳。唔係睇少啲讀者冇50萬，而係你有50萬都未必會放晒股票嘛，放晒股票又未必要信我嘛，信我亦未必會信咁多嘛。到時睇情況咯。但再強調一次，攞正牌做啦，你當可能一年2%管理費（你投資嘅錢就硬掘），20%表現費（賺嘅錢先分20％），出面啲對沖基金咁。嘩。

4. 但放心，應該同呢度完全分開，我亦唔會不停在呢邊賣廣告。50萬唔係細數，你有都未必要完全信我。以上種種都係好初步，搞唔成嘅機會都相當大。但分享咗先，又冇蝕底。當然你話支持嘅，更好（而真係已經有人話支持）。但真係絶對唔使feel obliged or pressured.

摩連奴 as a Metaphor

5. 我諗起好多年前，仲成日睇波，有次睇摩連奴（應該車路士年代）教波，佢作風好似係未完場就走入更衣室，嗰次好似好早已經走人。我有冇記錯不重要，想講係嗰種「胸有成竹」。又或者係明白，有啲嘢去到臨場先搞已經太遲。應該好多人公開試考英文之前嗰晚都係早早上床，甚至溫第二科，明知道英文能力冇可能一兩日谷到。至於你見有啲教波嘅係咁在場邊嗌，唔知有幾多幫助。

6. 點解講呢啲？就係因為恒指不停升，如果你睇科指仲勁，睇二線科企仲勁。咁講真，「在我預計之中啦」。我覺得呢啲時間我反而唔使講咁多嘢，畀咁多冧把。大家之前學咗幾多嘅，呢排應該見到回報。見住自己個身家慢慢升，係好開心嘅，因為係你耕耘嘅成果。你今日先問我買乜，甚至話我知你仲係滿手cash嘅，咁可能我失敗，或者你失敗—但照計都唔會兩日間「痛改前非」？

7. 真的，之前全部係部署練功，而家到時機到，你地各安天命，點都有啲真傳，利潤自然滾上門，唔使費心。所以我呢幾日反而睇少咗股票機，睇其他嘢多。

8. 但當然，下一場又係另一種玩法。摩連奴係呢場波早咗走啫，返去已經準備下一場啦。爆煲？真係會爆煲架。但，唔爆煲邊有嘢買？舊年3月爆大煲，係咪好後悔冇買股票？如果低位沽咗仲後悔。況且，你啲股票可能升多幾倍先跌三四成呢？

明源雲909，王維基1137，雷蛇1337，心動2400

9. 其他股票，快講幾句咯。首先係隻明源雲。呢隻唔少讀者跟咗，但前日（星期二）好核突呀，逆市跌，我都有寫。都有讀者嚟問，「我都唔知畀咩反應佢」，但我有寫係極大成交，你見到有啲交叉盤上板，直接對咗盤放上去，大戶減持吧。但，好彩個讀者都記教誨，冇因為跌4%就嚇走（雖然大升市跌4%係幾難睇），結果昨日（星期三）即時已經破埋頂。另一個讀者我仲鍾意，前日掛住打機冇睇，咪冇事！佢都話有睇可能震走。所以股票真係唔使成日睇得咁實

10. 另外你見前日兩隻逆市跌嘅，王維基香港電視，同埋雷蛇，昨日都強力反彈。王維基就冇乜特別消息—冇人話要有乜特別消息，股票有時無啦啦升無啦啦跌。都話，好似對女人咁（無不敬之意），唔好乜都太理性問點解，要去感受佢。

11. 不過雷蛇就真係有消息，算係盈喜咁，話收支平衡。但重點想講，當然我唔會一早知啦。況且，一早知亦未必係好事，冇話出盈喜一定會升。我主要係見隻嘢夠落後，夠殘嘅股票（又有故事講嘅）往往一有好消息就彈得勁，壞消息就免疫。

12. 反面教材就係呢隻心動2400，之前升到癲，昨日一度大跌，雖然收市都拗返上嚟。

13. 唔想咁煩嘅，根本可以直接買ETF。嫌盈富基金慢又比人笑嘅，咪買「港版納指」科技指數嘅ETF。南方東英呀Kenneth 同我算朋友，我估我幫佢啲產品賣下免費廣告佢唔介意嘅。又或者，你咪每樣買啲，大科企一隻，細嘅一隻，舊經濟又有，破頂有momentum 嘅買，落後嘅又買。我自己就都鍾意咁，總之當個花園咁，總有啲花開得好，有啲差啲。

AliBaba AliBaba跟蹤土匪好勇敢

14. 聽日仲想寫文細講，但，Instagram 有講（好長氣，但記住follow @ivanliresearch），灣仔有間舖賣滷水鵝，我幫趁咗好多年，個鵝佬好鍾意炒股票。次次都會問我嘢，咁我前日（星期二）點去食，行緊去我已經諗定（明知佢一定問）。結果入到去，佢都未開口，我就同佢講咗四個字：阿里巴巴！

15. 後來嘅事大家知，昨日（星期三）馬雲出現返，大家咪知冇事，阿里巴巴大升。我當然唔係知道佢會出現（否則發咗），但正如雷蛇故事一樣，阿里巴巴講到世界末日咁，正係人棄我取。根本就唔會搞死間公司，大陸嘅玩法，要搞死嘅早就死咗，仲有200蚊？嗰時已經話十分值搏，冇呃你啦。你出面啲友仲不停講咩政府仇富 講佢得罪人 之類，完全冇意思。幾個月啦老細。

美股：NetFlix，ASML績後新高。Google都新高。FB低位反彈唔少

16. 美股我快講幾句算，NetFlix業績後升到笑，創新高。篇號外寫咗4000字，可以慢睇。但主要唔係因為純利同收入，甚至唔係訂戶，而係因為唔使再燒錢，仲話回購。

17. ASML亦都係績後創過新高，但之後回軟。業績未必有機詳細講，但，留意佢預期今年收入只係單位數增長，不過冇所謂，因為公司做好大量嘅回購（之前太多錢）。仲有，公司冇出口去中國，暫時荷蘭政府都唔畀（但主要因為美國）。公司唔預期拜登上場會即刻變—但，如果真係會出口去中國，就應該再有一浸勁升。

18. 仲有，悶咗好耐嘅Google，都卒之新高，原因不明。

19. 我仲有想講，Facebook，Contrarian，杯葛呀轉場呀講到天跌落嚟咁，事實又真係唔少人轉（但多數係兩面用）。但反而股價低位彈唔少。我會再詳細講，可以試下睇我明報篇文先（要登記，但暫時仲會免費至3月）。留意下星期（27號）出業績，到時就知影響有幾大，「相信股價會十分波動」。冇錯係舊年第四季業績，但公司正路都會講埋近期嘅事。