唔好跌500點又話股災啦。Paypal，王維基1137，雷蛇1337，移卡9923，微盟2013。每日一圖—歐洲銀行股幾時開始跑輸美國？史上VIX水平一覽。聯儲局資產負債表又新高啦。D-K效應可能係假嘅？PDF如何屹立不倒。大自然都想人類死？後備方案：方格子，Substack (Patreon)

快評幾句— 唔好跌500點又話股災啦

大師冇點你—Paypal，王維基1137，雷蛇1337，移卡9923，微盟2013

每日一圖—歐洲銀行股幾時開始跑輸美國？史上VIX水平一覽。聯儲局資產負債表又新高啦

Good Read —D-K效應可能係假嘅？PDF如何屹立不倒。大自然都想人類死？

FB Post Summary —從缺

小版務—後備方案：方格子，Substack

1. 星期四休息咗，今日繼續。之前提過勞蘇基金，仲係極初步嘅念頭。應該冇人聽過我話夢想要做基金經理，你問我我寧願寫下文好過（即係而家咁）。但真係呢排有人叫我出山，亦幫我搞掂唔少厭惡性工作（但，當然要$），所以我先諗。

2. 除咗舊文提咗嘅嘢，冇乜額外詳情，你亦見我冇在Facebook Page講。但呢度居然已經收到差不多20個讀者有興趣，遠超我想像，實在令我好感動—「但其實仲要多180個」，你大約有數得計，即使去到50萬港紙入場，如果得幾丁友，我一年得1%，就唔多吸引。當然，本身都預係靠拍檔幫我搵客（投資操盤之類完全係我做，同佢無關），冇預過呢度會齊200人

3. 唯一仲可以補充嘅係：本人都一定會放埋錢入去，起碼都100萬港紙。自己都唔坐埋一條船點服眾？

4. 有興趣嘅，繼續PM我。當然don’t feel pressured or obliged，即使你口頭答應，到時改口，道理上法律上情感上都絶對係冇問題嘅。

快評幾句— 唔好跌500點又話股災啦，大佬。

5. 上次講完摩連奴，咁你就當我入更衣室時即時畀人追返一球。升到上3萬點後，星期五全無先兆下，都回返500點。咁但，只係1.7%唔夠。

6. 我個人睇法？星期一睇明報你就知，但預告少少：短期升幅過急，你睇RSI就知（一般我唔係技術分析派，但RSI有啲用）．但講估值，不見得貴。你唔好拎而家嘅30000點同2018，甚至2015，甚至2007比。正如太古城唔會變返幾百蚊一尺，呢個世界有通脹，企業會越做越大。同埋指數都會變，而家多咗好多科企股。仲有，債息都唔同啦，2007年5厘息呀。

7. 費事抄晒明報成段文，但，2007年恒指每股帳面值（Book Value Per Share）BVPS係10,000，2015「大時代」係18,800，2018係21,500，而家係23,600。咁你計下當年嘅3萬點，等於而家幾多點（而事後睇，2007年3萬點係3倍帳面值，點會唔死？當年仲要5厘債息）

大師冇點你—Paypal，王維基1137，雷蛇1337，移卡9923，微盟2013

8. 你睇美股，雖然今年表現差過香港，都仲企得OK硬。例如PayPal先又創新高，仲有之前提嘅ASML 蘋果之類。

9. 但更重要係睇港股，王維基隻HKTV Mall升，可能真係因為「咪Go佐敦」，你見759都大升。但，另外雷蛇，甚至移卡微盟呢啲，個市跌500點佢地照樣勁升。咁你話，喂，有啲跌嘅你又唔講？想講係你呢啲升嘅，應該夠冚其他跌有突啦。幾時都叫你唔好全副身家買一隻股票，之前啲友退休買匯控等收息嘅教訓，咁快唔記得？

10. 更唔好講咩思摩爾6969或者比亞迪1211之類，升到懷疑人生，instagram有講（記住科！@ivanliresearch），就唔係好似散場格局。

每日一圖—歐洲銀行股幾時開始跑輸美國？史上VIX水平一覽。聯儲局資產負債表又新高啦

11. 歐洲銀行股幾時開始跑輸美國？—答案係2009年開始。但發生乜事？就係歐洲央行開始行負利率。銀行係至怕低息環境的

12. 史上VIX水平一覽—舊文都寫過，睇VIX都勉強可以捉到股災時入市時機，雖然郁得好快。呢個圖就話你知史上VIX嘅每年最高，最低同平均水平。留意舊年3月去到80樓上，近30年只見過兩次，另一次係2008金融海嘯。兩次都證明係入市良機。

13. 聯儲局資產負債表又新高啦—不用多講啦。留意今年只係1個月未夠，但聯儲局擴表規模已經等於2019年全年嘅一半。呢啲流動性總會支持到股市有個高估值。

Good Read —D-K效應可能係假嘅？PDF如何屹立不倒。大自然都想人類死？

14. D-K效應可能係假嘅？—即使冇聽過D-K效應都好，入面講嘅嘢好易理解：廢人就高估自己能力，勁人就掉轉。不過呢篇文作者睇返原本嘅研究，覺得似乎個講法站不住腳。「但我都係傾向覺得D-K效應係真嘅」「可能因為我係笨人」「而呢個咪證明咗D-K效應」

15. PDF如何屹立不倒—冇錯係文件嘅PDF。差不多由我上網咁耐（廿幾年），就接觸PDF咁耐。有冇諗過，點樣會成為咗網上嘅standard？點解從來都冇人挑戰到佢而出另一套制式？篇文有講。順帶一提，Adobe都係我留意嘅股票.

16. 大自然都想人類死？—森林植物光合作用吸二氧化碳放氧氣嘛。但，唔使幾耐，有啲森林就開始會係淨碳排放了。點解？因為熱得滯。惡性循環。大家自求多福啦。

FB Post Summary —從缺

17. 出咗個Post講Netflix，但只係照copy呢度嘅號外，當然睇呢度好，有埋圖。

小版務—後備方案：方格子，Substack

18. Patreon我用得相當滿意，公司而家話上市添，「有錢就整好啲個平台啦」。但最緊要小心嘛，佢有乜冬瓜豆腐，或者國安法封咗個站，我咪跳樓？所以都係防範於未然（雖然治標不治本），諗定後路。

19. 暫時我留意到嘅，一係台灣嘅方格子（我覺得佢係照抄Patreon），一係就美國嘢Substack．大家未聽過未見過嘅可以睇下，甚至reg定account．但我再強調，我完全冇搬嘅諗法，完全冇。但，準備定嘛，到時先慢慢再睇邊個平台好就蛇都死。Substack在鬼記者之間幾有名氣，專門用嚟搞newsletter，不過介面好似仲唔及Patreon，食水好似亦仲深過Patreon。可以睇下介紹。

20. 講多幾句。方格子我覺得最大問題唔係台灣人唔肯畀錢（我見股票嗰啲有人肯畀），反正我都係做返香港人讀者。最大問題反而係佢會推啲不同作者—而我係最憎的。即係圍威喂，同佢熟或者點就push你啲文，又即係樂易玲之類。呢類遊戲我最憎，所以先做Patreon—就係貪Patreon濶佬懶理（至少香港用家），大家自己講實力去吸讀者，唔會存在邊個同佢熟 邊個佢鍾意 邊個私下畀著數佢就promote多啲。呢個亦係我而家淡出傳統媒體嘅原因，做乜我要同啲編輯記者食飯灌水呢？

21. 不過talking about 傳統媒體，我應該下星期開始會在經濟一週寫專欄。疑似係呢度讀者向公司推介，先行謝過。大家有興趣就買本睇下，佢地亦應該會轉貼去Facebook Page。