別人貪婪時我小心，但，唔好沽貨呀！明源雲，雷蛇，王維基一齊逆市跌。美金弱勢預示新興市場跑贏美股？美股細價股狂炒。關於寫作。15蚊最低工資冇問題。1137新高。奇而濃的狂想。Big6 會計師。地鐵史上首次盈警 (Patreon)

快評幾句— 別人貪婪時我小心，但，唔好沽貨呀！

大師冇點你—明源雲，雷蛇，王維基一齊逆市跌

每日一圖—美金弱勢預示新興市場跑贏美股？美股細價股狂炒

Good Read —關於寫作。15蚊最低工資冇問題。

FB Post Summary —1137新高。奇而濃的狂想。Big6 會計師。地鐵史上首次盈警

1. 係喎，仲有時間又有idea，咪照寫文，但今星期可能我都會休息一日，或不？

2. 噢，又一個諗頭，都好多人叫過我做。之前因為工作關係，唔方便買個股，亦費事公開自己持股。但到離職後呢，就應該可以買返個股了，可以整個真倉畀你睇。似乎好多讀者都覺得有用，可以跟住。但，仲有幾個問題。第一，我係唔多想而家搞嘅，因為而家明顯估值唔係特別平—我呢啲時間開個新倉畀你跟，你好易中伏，我寧願股災先出手，但等到幾時？第二，即使做，我都唔會畀真銀碼你睇，頂多畀你見到每隻股嘅百份比，即係跟返現實比例，但你唔知總數。因為太少錢又怕畀你恥笑「嘩撈咁多年先得咁少錢」，太多錢又怕讀者覺得「嘩咁富貴唔使助養你啦」。

快評幾句— 別人貪婪時我小心，但，唔好沽貨呀！

3. 拿，早兩日先同你講世事無絶對，今年港股幾醒神。結果今日（星期二）港股3000億成交，恒指一度彈成1000點，真係別人貪婪時我小心啦，不妨問下自己，而家去到周街股神未？港股又好似未。但往往事後至知。

4. 咁，當然都係stay invested，你嘅選擇只係90%定100%嘅錢買股票（我而家係唔足100％，但都有90%）。又係好悶咁講下，可能買啲冇咁炒味勁嘅嘢咯，或者唔好買咁多衍生工具咯，或者有開支（交咗稅未？）交咗先。但，千萬千萬唔好大幅減持。除非你呢刻真係搵夠退休。

5. 都真係有人問，大佬，咁幾時先沽？唔係講一生一世。咁我幾時沽過貨？2008低位打靶講過啦，輸咗成百萬，即係成副身家咁滯（因為仲要槓杆）。仲有？2014好似都有，搞移民台灣要600萬台幣。仲有？2017我裸辭星展時都有，一來沽清在星展啲貨，二來要使費（我去咗兩個月旅行）。前後三次，每一次我都後悔，「因為長遠嚟講股票係升嘅」「至少我嗰啲係」。咁幾時應該沽貨？咪閣下結婚，買樓，移民，退休，真係要用大錢之時咯。不過，你畀我揀多次？其實應該加按自己層樓，根本唔使沽股票（但首先要有層樓，仲要你有糧單）（而2008我未買樓，但嗰次唔係等錢用，係槓杆被迫低位打）。

大師冇點你—明源雲，雷蛇，王維基一齊逆市跌

6. 你冇睇錯，恒指升成1000點，我走去揀三隻跌嘅同你講，仲要三隻我都推過。點解？當然係講啲故事。幾樣嘢，首先，又係嗰句，Narrative 人人識講，王維基講嚟講去都係嗰嗰故事，但點解10蚊唔跌16蚊跌？冇得一早計到的。

7. 第二，有啲人問我摸頂追左點算，都真係冇得點算的。但，所以點解要分散咯，從冇叫你全部買晒同一隻度喎，亦唔係叫你有十幾廿萬一日買晒落去。有份參加，你心理會平衡啲。出面乜都升，你買隻嘢要跌，好難受的， 分分鐘搞到之後個人越諗越牛角尖。

8. 我Instagram （真係要科！@ivanliresearch）已經貼咗一堆呢度有講而表現很好嘅港股。心動，微盟甚至 中海外 友邦 港交所。 唔掂嘅三隻樓上我亦貼咗。咁你買晒（哪有錢！）嘅，拉勻成績都不錯。但事實係，邊有咁多錢？咁但都做到幾樣嘢，首先，一係諗下買指數（唔買盈富可以買科技指數）。第二，咁叫你（舉例！）買一隻一線科技股 一隻二線 一隻舊經濟都唔係好過份啫？做乜硬係要一注獨贏？冇話唔得，全副身家買Tesla一早退休添，但食得鹹魚抵得渴啦。我想法就唔使贏得最多，但一定要有份，同埋我注碼可以做到好大。

9. 當然你可以話呢啲作風都反映我花心，但至少有個好處：大家都知，買咗嘅股票特別關心。一舊錢買五隻股票，正路地你學到嘅嘢多過買晒一隻。

每日一圖—美金弱勢預示新興市場跑贏美股？美股細價股狂炒

10. 美金弱勢預示新興市場跑贏美股？—之前寫過弱美金一般有利股市，因為係風險指標。但呢個圖更有趣，兩條線跟得幾貼，直到近期。而歷史亦夠長，唔係3個月trend拎出嚟講。紅色線係美匯指數（留意係trade weighted，但問題不大）。黑色線深少少，係量度「美股跑贏其他市場幾多」—可能兩個都跌，兩個都升。見到美金強，就美股跑贏其他市場。近來呢？美金弱，但美股仲未跑輸 — 定已經開始？今年呢十幾日見到係咁喎。舊文有提。

11. 美股細價股狂炒—在股票上一般我都係個極之樂觀嘅人，但美股真係妖氣越嚟越重。見到啲細價股，全部跑贏晒大股，絶非吉兆。而美股相對比較少合股或拆細之類，基本上細價股就係細公司低市值（香港唔同，你見隻建行15000億市值但股價係單位數）。呢啲炒法點都似係爆煲先兆，尤幸香港未見。當然，唔使刻意避大調整，甚至唔好刻意避，避唔到的。打埋嚟，咪硬食咯。你想打埋嚟之前沽晒佢然後低位買返？會唔會太大諗頭？

Good Read —關於寫作。15蚊最低工資冇問題。

12. 關於寫作—作者原來大有來頭，做金融，亦都寫嘢。之前我亦貼過佢嘅文。成個Blog都好睇。今篇文好短，講佢對「寫作」嘅諗法（冇講明邊類文章或書），部份我同意，部份不同意，有機會寫篇長文講。但撮要如下：你只得5秒鐘引人注意，好題目自然易寫，人越嚟越冇耐性，可以十個字講完唔好用十一個字，要狠心刪走文字，寫得好因為讀得好，唔好介意乜都有人寫過，可以試下將人人都知嘅嘢寫成文字，寫作係軟技能，人人想聽故事唔係課堂，寫作係藝術所以永遠主觀。共勉之。

13. 15蚊最低工資冇問題—傳統經濟右翼（芝加哥獅子山學會列根佛利民乜乜乜之類）會視最低工資為洪水猛獸，特別係我成長嘅年代（即係，2008年前）呢派係主流，佢地講法話最低工資當然係令僱主唔請人，或者出術。但近年經濟學家睇法已唔同，呢篇文會講點解，同埋講點解拜登登嘅15蚊最低工資唔會扼殺職位增長。

FB Post Summary —1137新高。奇而濃的狂想。Big6 會計師。地鐵史上首次盈警

唔知心情靚定乜，出咗4個Post，又或者係雞犬皆升反而我寫少啲股票。乜都升邊個唔係股神？跌市都敢買先見真章嘛。

14. 1137新高—都係老生常談，唔係特別講隻股票，而係講要坐定。做乜升少少又走咗去？身痕？下個月等錢著草？下下升兩三成走，咁輸錢嗰啲點算？點都要有隻嘢升幾個開嘛？

15. 奇而濃的狂想—同金融完全無關。我逢星期日instagram個魚生飯好多Patreon讀者問，咁一次答你在邊買。但結果大半篇講吳奇隆，同埋《YES》雜誌

16. Big6 會計師—都同股票冇乜關係，恥笑下啲JobAd，順手講下會計師樓歷史，同我的大學年代

17. 地鐵史上首次盈警— 寫咗我兩粒鐘（你以為好易？）。不過呢度讀者嘅優惠就係：我upload埋個Excel上嚟，雖然好似冇乜用。「下次寫咪有用！」