版務小分享數則。All in美股？今年暫時包尾咁滯，嘻。快評一堆：移卡9923金山3888明源雲909微盟2013。香港電視1137。港交所388。騰訊700。中海外688。雷蛇1337。 (Patreon)

版務小分享數則（冇乜特別，趕時間可skip）

All in美股？今年暫時包尾咁滯，嘻。

快評一堆：移卡9923金山3888明源雲909微盟2013。香港電視1137。港交所388。騰訊700。中海外688。雷蛇1337。

1. 明明星期一喎，應該埃汾休息，仲要美股休市，做乜又有文？是的。除咗因為有啲嘢想寫，亦因為星期二可能唔得閒，提早一日出。今日都寫夠三千字。本人真係文字生產機。

版務小分享數則（冇乜特別，趕時間可skip）

2. 卒之我再覆晒大家在舊文嘅留言。呢個我覺得自己真係做得唔好，覆得唔夠快，亦承諾會改善，應該都做得到。不過同大家分享下背後故事：點解我打幾千字嘅文可以一日幾篇，你地PM我我都算覆得快，但咁抗拒睇返舊文留言？首先係，「蛤蟆的油」。正如好多演員唔會睇返自己嘅戲，我仲會上電視嘅年代，但凡食飯或者乜見到自己，我即時走，或者聽歌。我亦唔會睇報紙登返我嘅文，唔想睇編輯改咗乜。此其一。

3. 但第二點先係主要原因：面皮薄，唔想畀人串畀人鬧。亦因為咁，我網上寫嘢差不多廿幾年（有讀者真係睇足廿幾年！），但我到2016年先搞個FB Page．我想出名，但又唔想畀人批評。理論上Patreon好好，用我常用嘅比喻：買平飛嘅人噓得最大聲。咁Patreon付費讀者，梗係欣賞我先會睇，唔通畀一舊水一個月入嚟串串貢咩 —但之前真係有咁嘅人。冇錯，極少數例子，好似一兩個，仲要已經退訂，很好。但帶嚟嘅陰影都有啲大，但我今年決意克服。

4. 關於我在《迴響》寫文同有折扣畀大家，好似都幾大迴響，好事。我同山城豬伯稱不上一見如故相逢恨晚，但至少算啱嘴型。文我已經寫好，但反正31號先交稿，而我亦唔算太滿意，考慮重寫。至於有啲讀者唔知道我寫散文到底會點，實情Facebook Page上耐唔耐都有（呢排好似少咗啲），例如呢篇講我嘅「增強抵抗力」魚生飯。主要就係，好散。不過《迴響》應該唔會咁意識流同咁多＊，費事畀人媽。我畀人媽唔緊要（唔通我會收少一個仙稿費？），但唔好連累人地。

5. Audio見大家冇乜反應，但我都係會照搞，反正唔係我錄，會免費開放一兩篇畀大家聽下性感嘅男聲。反應差，咪摺咗佢（唔係點？拎支搶迫你訂？）。出書呢，繼續卡住，但我相信都係只會遲到，不會缺席，stay tuned，準備定信用卡（唔通免費？）。文章目錄嘛，未得閒搞，但或者農曆年？

6. 呀仲有，好多時如果你睇Patreon遇到問題，往往你用desktop版有機會解決到，例如啲文嘅link開唔到呀，舊文睇唔到呀之類。當然呢啲唔係我控制到嘅嘢。

All in美股？今年暫時包尾咁滯，嘻。

7. 美股休息，原本想寫多啲港股，但唔少都已經寫過又寫，Instagram亦有提（記！住！科！ @ivanliresearch）。唯有參考返1月6號嘅玩法，當財經版咁每隻寫兩句。

8. 另外，都真係唔使問我幾時買得。幾時買得？開市你咪買得，唔好又玩嗰啲隻嘢10蚊跌到9.5你買然後11蚊止賺嘅嘢啦，我上廢柴電視節目先玩呢啲。幾時買？開市咪買得。幾時沽得呢？就參考下之前多次講Tesla嘅放風爭策略了，有冇睇熟先？不停問冧把，練下基本功好喎。但你話，喂，有時一買隻嘢就跌喎，咁點？「我都唔知」。不過你可以參考下中國海外（688），下面會講

9. 但，在呢堆個股之前，想先講呢一樣嘢：

10. 新一年話咁快就兩個星期，呢堆就係世界各地主要股市回報，係咩國家你自己Google。唯一冇嘅係Nasdaq，話埋你知，升0.9%。

11. 中間嘅Column係當地指數，你買日本咪日經，你可以當係「當地人」回報。最尾Column係計及匯率，以美金計（港紙都差不多），咁你買德國股（DAX）咪要計及歐元對美金匯率，你可以當係「外國人」回報。留意因為今年年初至今美金對多數貨幣都升，所以你見多數「當地人」回報，高過「外國人」回報。你買德國（DAX）法國（CAC），當地指數升，但因為歐元對美金跌，外國人仲要蝕水。

12. 睇邊個？任你。但一般我睇「當地人」，冇咁複雜。

13. 固然兩星期表現不代表全年，但個趨勢係有趣，亦同我心中估嘅有啲似。幾個點：首先，見唔見美股（最頂兩格）麻麻地，排名好低？因為太貴了，今年美股我估未必再咁勁（但，冇叫你沽晒佢！好重要！）。第二，歐洲呢？你見唯獨係英國（FTSE）一支獨秀，因為舊年實在太雞！我今年睇好英國股市。第三，亞洲呢？普遍都幾好。最強印尼（JAKARTA），唔好問我點解。台灣都強，台積電嘛。仲有新加坡同香港，舊年極雞。大陸滬深300舊年勁今年都勁，但另一種玩法。

14. 想講嘅，始終係平衡。當然市旺時畀人恥笑，之前寫港股有人叫我唔好寫添，話佢唔睇（等我再講一次，關我撚事？你買份報紙返嚟唔睇馬經？掉撚咗佢咯。唔通你會打去投訴？交12蚊會費咁撚多爹？你交12萬會費我就任你點）。其他讀者當然唔會咁，但事實真係人人都話買美股啦。

15. 但，你點知美股之後都跑贏？係，之前好多年都好勁。係，美國上市嘅公司好勁。但，總有個譜。幾時其他股市會追返近？係咪今年？定下年？唔知。但你見暫時今年年初至今係咁。

16. 要明白嘅係，而家梗係個個牙刷啦，心雄啦，我都會。升嗰時梗係嫌自己買得唔夠啦。買乜港股？梗係屙煙美股。買Tesla都嫌慢啦，兩個月先升一倍，梗係買NIO買氫能源。買實股都嫌慢啦，梗係買option！買期權都嫌少啦，梗係借孖展借tax loan買期權。

17. 咁，祝你好運。但原諒我就係比較老土。你可以諗下，舊年3月叫晒救命嘅係咩人。2月嗰陣一樣係美國連登仔勁買option。我就好簡單，寧願賺少啲，但坐得穩。因為我可以好大個本訓入去。你買果三幾皮嘢，畀你贏幾倍又點？而你可以一路咁贏落去？

18. 所以，分散還是必要的說。你覺得港股廢，咪七成美股三成港股。而今年暫時啲港股都跑贏美股喎。

快評一堆：移卡9923金山3888明源雲909微盟2013。香港電視1137。港交所388。騰訊700。中海外688。雷蛇1337。

移卡9923金山3888明源雲909微盟2013

19. 不用多講啦，二線科技股嘛，SAAS嘛，講真，同美股相比唔輸蝕丫，仲要你唔使捱夜（你估好過癮？）。會唔會爆煲？會架。Tesla我都覺得會爆煲。但，且戰且走啦。咁多隻揀邊隻？唔知喎。但的確要一手手買，入場費冇美股咁低，可能不能全餐。咁，各師各法，理論上就細市值蝕緊錢嘅好炒啲，大市值又賺緊錢嘅就防守性強啲。邊間故事好聽？就任你演繹了。

香港電視1137

20. 呢隻就另一樣嘢，感覺大家買都有啲信心，至少唔會造假（掛），至少唔會忽然畀人封艇（掛），加上150億市值，容乜易炒起。唯一一個問題，咪又係Tesla嘅教訓咯，好多人都買過呢隻，做乜早早沽？輸錢想止蝕都理解，但贏緊錢都急急腳走嘅，咩心態？等住開飯？咁你睇埋下一段，包你懷疑人生。

港交所388

21. 我畀個好悲傷嘅故事你聽，真人真事，我識有個師奶，剛退休架啦（真係唔係我老母，放心）。佢啲港交所，值幾千萬！佢仲要係50蚊買嘅，贏十倍，真係輕易砌低咩股神基金經理。固然你可以話佢生得早，但都只係十幾年前，個教訓係，我畀你50蚊買到，你都要坐到先得架。又70蚊走咗佢？咁點掂？係喎。佢都買過啲垃圾股，輸清光都有。但，一隻港交所，夠佢輸N隻垃圾啦。另一教訓：佢唔算富豪（香港地冇億億聲美金都唔好叫富豪），但買幾百萬落隻港交所喎。好多人有咁嘅錢，都唔會買咁多。你去買樓當然係必須（如果唔著草又唔成世痴屋企嘅），但cash is king就唔知咩構造了。

22. 講返港交所，唏，中美交惡受惠股呀。但，拜登上場照計冇呢回事啦？不過你諗下，我係抖音我係快手，老死之後都在香港上，美國就bonus。只在美國上？太危險。你而家唔搞我啫，陣間你2024侵侵或蓬佩奧回歸又話強制除牌我咪死得？有在香港上嘅冇乜驚（你見中移動有乜事？），但只得美國上就難搞了。

騰訊700

23. 「喂埃汾又話一線科企跑輸？」其實都係的，你見上面堆二線嘢，一兩日就升 一兩成，騰訊年初至今先係咁升幅。況且，我可能錯嘛。仲有，冇叫你一隻一線都唔渣嘛。我發現好多人會咁錯誤理解的。「埃汾話可能會大調整喎，我沽晒啲股票先」。咁埃汾錯你咪仆街？或者，升多一倍先跌一成呢？諗嘢唔好咁表面喎。真係基本原則，stay invested，分散，唔好借錢，應該唔會點大錯。

中海外688

24. 拿拿拿，總算返返去最初講呢隻嘢嘅位。呢隻我都唔知點解好多讀者跟，個故事冇變呀，但由我一推，係咁跌。唔知有冇人「止蝕」，定好似有啲低位買。無論如何，而家返返當時嘅位。大家唔使輸錢，咪好。不過故事教訓都係：實情有好多好股票，分析員就話要玩呢啲嘢啫，你自己根本不用亦不能kiss every girl，渣隻1137咪幾簡單。股票冇難度分的。但當然你當時問我688我會話你知買得過，「但世上有N咁多股票」

雷蛇1337

25. 回購嘛，寫過啦。但同上面688情況差不多，冇錯係返返我寫時嘅位，但會有更好選擇。我每日都寫好多唔同東西，但你唔使跟晒，亦冇可能跟晒。只係有時我會hit中你心中所想嘅嘢啫。

大家開心啦嘛？咁話埋你知，寫寫下我連聽日嗰篇都寫埋。聽日仲會有文，頂多短啲。