小米大跌，Spotify 又大跌。每次衰退結束美金都跌。過半美國後生都同屋企住，百年未見過。追夢？不了。蝸牛都有記憶，仲可以移植。 (Patreon)

快評幾句— 小米大跌，Spotify 又大跌

每日一圖—每次衰退結束美金都跌。過半美國後生都同屋企住，百年未見過

Good Read —追夢？不了。蝸牛都有記憶，仲可以移植。

FB Post Summary —從缺

《2020 回顧＋教訓》嘅「回顧」已完。第一篇，第二篇，第三篇， 第四篇，第五篇，第六篇，第七篇。之後會寫「教訓」，可能兩三篇。再之後係2021展望。呼，希望農曆年前寫完。留意呢啲仲要係on top of 平時嘅一星期六篇（OK，有時星期六會出術）

至於目錄？未得閒搞，但總會搞

快評幾句— 小米大跌，Spotify 又大跌

1. 或者夾埋講一次，你咩華為中興嗰啲禁令，當然係影響公司好大，直頭做唔到生意拎唔到零件喎。但，如果只係限美國人買股票，你諗真啲，對公司有乜影響？對，美資要沽。咁咪好咯，你可以執平貨。如果有些少金融背景嘅，不妨諗下，你用任何方法計股票（或其他東西）嘅價值，幾時有個parameter叫做「有人唔買得」？掉轉講，如果有隻美股，歐洲中資日資全部唔買得，會唔會你覺得冇咁值錢？固然我知美國最大，但，歐洲中國日本加埋大過佢下話？或都有七折掛？但如果係美股，你就覺得冇影響喎。實情，你邊個唔買得，點會影響公司生意？如果唔影響生意，點會影響價值？

2. 理論講完，但大家都短視嘅。況且，又似乎有其他東西可以買嘛，冇必要擔驚受怕。亦加上仲有個機會係真係禁小米買零件之類嘛。仲有最後一樣嘢：小米股價一路都在高位，從來冇平過。咁所以，還是不了。

3. 至於Spotify嘛，可能好多人知道，蘋果話推訂閱制PodCast嘛。咁大科企一出，細公司（係！同蘋果比實在太細）自然震散。市值爭幾遠？蘋果20000億，Spotify 600億。另外，蘋果嘅AirPod劣評如潮，又畀人話似牙簽又話易唔見又話音質差乜鬼。但，蘋果一年賣AirPod嘅收入，多過Spotify成間公司—更加唔好講盈利。而PodCast嘅business model，以往好多係靠廣告，似乎都不行，都係訂閱制最好。咁訂閱制肯定係蘋果有大優勢啦。

每日一圖—每次衰退結束美金都跌。過半美國後生都同屋企住，百年未見過

4. 每次衰退結束美金都跌—聽落都合理，因為舊文都有講，美金好多時係反映避險情緒，咁經濟好，當然唔要美金了。不過又留意，佢呢度嘅「每次」，都只係過去兩次，2001（科網泡沫）同2007（雷曼爆煲），留意又真係一個行法，今次都跟。咁而70-90年代3次衰退，就係掉轉，美金升，而咁啱又係幾次一樣行法。另外，佢好似係用股市見底嘅嗰日開始計，就唔同「實體經濟」嘅衰退。仲有，留意佢用嘅係trade weighted 嘅美元指數，同平時講嘅有啲唔同，雖然分別不大。舊文有講。

5. 過半美國後生都同屋企住，百年未見過— 講18-29歲嘅，睇戲睇劇總覺得鬼仔一讀完大學就自己搬走。咁當然唔係完全啱，即使係六七十年代都仲有三成同屋企住（鄉下地方吧）。但，之後一路升，升到而家過一半。原因？當然唔止因為疫情，你見近幾十年都一路升。當然係因為住唔起，亦證明選過個總統都係咁。呢啲印錢全球化導致貧富懸殊嘅嘢，當然多得聯儲局。

Good Read —追夢？不了。蝸牛都有記憶，仲可以移植。

6. 追夢？不了 —New Republic 嘅文，應該一個月三篇免費。周圍都叫你追夢，follow your heart，我鍾意呢篇呢類唱反調嘅文。根本咩「做你鍾意嘅工」好多時係虛妄，你鍾意啫，有冇能力？冇嘅，人地點解要畀錢你？倒不如做份搵到多啲錢嘅工，咁你咪有能力追求你想做嘅嘢。

7. 蝸牛都有記憶，仲可以移植—聽落都幾勁，好似memory card咁，可以將一隻蝸牛嘅記憶，移落去另一隻度。不過都講返，蝸牛嘅神經系統咁簡單，就唔同人類嘅。

FB Post Summary —從缺

8. 是的，但冇出都要話你知，等你知我唔係漏咗寫呢部份。This is a blank page咁。