2020 回顧 + 教訓 （七） — 2020 3月債息美匯同時狂升，極度恐慌 (Patreon)

再貼多次標普圖

疫情前美債債息都係跌緊

股災初期股票跌債價升，最恐慌時就股票債價一齊跌

4月時股市已定，債息得0.5厘，點睇都係買股票最佳時機

美金升美金跌，係同乜比？

美金初段同股市一齊跌，但到熔斷就股票跌美金升

美金100跌到90就驚？早幾年75都見過呀，所以放心印

1. 今篇係《2020 回顧＋教訓》第七篇，回顧嘅最終回。第一篇，第二篇，第三篇， 第四篇，第五篇早前出咗。第六篇 同 第七篇（今篇）都講美債，同美匯指數，第六篇仲有頭五篇嘅小導讀。回顧寫晒，之後寫幾篇教訓，然後再寫2021展望。希望1月內寫完，或者農曆年前。

2. 第六篇寫美債真係較長氣，但讀者嚟自不同背景，而我見到普遍讀者對債券係比較陌生嘅，下次唔寫得咁詳細。另外，除咗呢啲長文專題，我都仲keep住一個星期寫六篇市況，真係算係咁。

3. 好，上篇講晒美債基本嘢，今篇睇下舊年股災中美債咩情況，最後講埋美匯。

再貼多次標普圖

4. 貼多次標普圖，應該每篇我都會貼。記住，「2月21日左右開始急瀉，1個月後嘅3月23號見底，一個月差不多跌33%」。記住，221，323。好重要，背咗佢。221，323。（大家大約想像到當年我係點教書嘅，係喎，我以前教中學的）

疫情前美債債息都係跌緊

5. 咁我地首先睇下，美國10年債息，過去5年嘅走勢。見到，2017年債息持平，18升，19跌，20都跌（留意，2017年股市升，18大跌，19升，20都升）。係咪同聯儲局「加息」「減息」有關？有啲關係，但2017年加咗三次息，美債債息都要跌。仲有2009-2014年都係零息，但美債債息照樣有相當大嘅上落，所以聯儲局並不能太過直接影響個債息，除非大量直接買債。

6. 然後睇呢個圖，似乎近幾年，債息更加受聯儲局「印錢」同「縮表」影響。2018年一縮表就債息大升，股市亦跌。但最想講返嘅係，2019年，疫情前，聯儲局已經減緊息，擴緊表，而債息一路跌緊。

股災初期股票跌債價升，最恐慌時就股票債價一齊跌

7. 記住啦喎，美股221開始跌，323見底，我地就睇呢段時間嘅債息。疫情環球爆初期，即使去到221開始股市跌，你見債息都係一路落，冇乜問題的。亦係「正常」避險情況下見到嘅嘢：唔買股票，咪買債咯，多人買債，債價高，債息低咯，低一低息我都制

8. 但見我引號咗「正常」避險情況，即係去到「不正常」時就唔係咁。可能第時可以拎嚟量度市場係咪極度恐慌。到好驚嗰時，就乜都跌，乜都沽，美債我都沽。所以會股票跌，但債升又升，好危險。因為債息升又同時令股市吸引力下降（舊文講過，所以真係要睇）

9. 你見去到3月9號開始，就債息反彈啦，債價大跌，好奇怪。一度一個星期由0.6厘彈到上1.2厘喎，一個開，咪話唔驚。咩事？正係市場最驚嗰時，咪畀你見到股市又跌，債價又跌（債息升）。而記唔記得舊文有講，聯儲局係3月6號減息的？當時股市勁跌，啲友演繹係「聯儲局忽然咁急減息，應該背後知道大鑊嘢」，以及「咁快打晒啲子彈之後咪冇嘢用？」「做乜兩日都等唔切？應該好大鑊」，但我認為係藥力要時間，事後亦證明似乎係咁。到3月16號聯儲局再減第二次息，股市去到恐懼高峰（留意美股在呢兩次減息間3次熔斷），見唔見債息又再抽上去？

10. 不過見到，債息到18號已經開始跌落嚟，事後睇可能呢個係入市指標。留意，當其時聯儲局仲未出無限QE（3月23號出，亦係股市見底日）。咁當時點解個債息已經跌落？似乎係因為已經大力印錢。以上種種，第五篇有講。

4月時股市已定，債息得0.5厘，點睇都係買股票最佳時機

11. 然後？都冇乜然後了。3月23日無限QE，股市見底。聯儲局力壓下，債息一路壓在0.5厘左右嘅水平。呢度時間睇返真係買股絶佳時機，即使你唔睇無限QE，咁低嘅債息都係唔買股票就笨。

12. 4月後不用我多講，大家都知股市升極都有。但唔少人忽略咗債息一路升（因為之後聯儲局開始放慢手腳），升到而家1厘樓上。咁股市啲咩PE PB 就貴咗，但債息高咗，兩重影響下，實情值博率低咗好多。所以唔好怪我賴皮，但呢排好多人問我，我都係睇得審慎啲。「舊年叫你又唔買」。

13. 快講兩句，既然正路呢兩三年都低息（五年十年話估到都呃你），債息而家咁低，股市都係值搏。但，難保之後債息會抽升，股市可能就會大幅震蕩了，咁貴嘅估值，小小事就震落嚟架啦。債息點解會抽升？好可能係嚟自通脹預期，或者民主黨不停派錢，美金繼續弱（而派錢又再引致通脹，美金弱亦引致通脹，互為影響）。

14. 不過觀乎民主黨最新整咗個大型刺激方案，債市又冇乜反應呀下。所以都係不能太過教條主義。係呀我估可能會股市會跌返10-20%，但等等等等到幾時？都係嗰句，每個月有錢剩嘅，都係放落股市好。但有舊大錢嘅就唔使呢刻全部放晒入去—但絶冇叫你沽呀下。

美金升美金跌，係同乜比？

15. 最後，美匯指數。應該知道，外匯呢啲嘢，係相對架啫。即係總係currency pair，但由於美國最大最勁又最好抽，美金又最有霸權，實務上全部都係講對美金嘅匯率啦。所以日常你講英鎊升，日圓跌，全部指係對美金。呢個好多人知。

16. 但what about 美金 itself？同邊個比？點解成日聽到講美金升美金跌？答案係：就同返一籃子嘅貨幣比。實則上就叫呢個做「美匯指數」Dollar Index DXY。

17. 以前Facebook 寫過，美匯指數其實相當過時，舊世界產物。50年比重都冇變過，死未。入面60% 係Euro，日圓英鎊加紙各佔10%左右。「50年前邊有Euro？」．當時係西德馬克法國法郎之類，後來合埋。實務上，係有traded weighted 嘅美匯指數，但似乎大家都係用舊嘢「美匯指數」多，暫時亦冇乜好大問題。

18. 相比於好多其他東西，美匯指數係比較易理解嘅一回事。實際用途同VIX差不多，量度恐慌程度。一般嚟講美金弱就股票好，新興市場固然係，美股都係

19. （留意，for some reason，有機會再解，但成熟市場如美國英國德國日本，就貨幣弱股市指數會好（外國人買會唔會賺價蝕匯另計），新興市場如泰國韓國巴西菲律賓中國，就貨幣好股市好—所以美金弱好似有利晒所有股市）

20. 但更明顯見到係兵荒馬亂嗰時，更加見到美匯指數係代表恐慌情緒。道理唔難理解，一有咩死人冧樓環球災難，梗係個個信美金。最反美嘅中東佬南美佬中國佬都一樣。你見幾次真係大災難，都係咁。97亞州金融風暴係咁，08雷曼爆煲係咁，2020疫情有一期都係咁。

美金初段同股市一齊跌，但到熔斷就股票跌美金升

21. 我地睇返美匯指數當時嘅走勢。留意221美股急跌，但見唔見美匯指數都係一路跟跌？「又話避險時美金升？」，首先冇包生仔，唔係科學實驗次次一樣。另外你可以理解做2月尾嗰浸，都只係「正常」嘅股市跌。等於債息開頭都同股市一齊跌。

22. 記唔記得寫過，3月6號聯儲局第一次減息，先係股市加速下跌嘅頂峰？3月16日第二次減息（留意美股在兩次減息間3次熔斷）。咁你見到呢段時間美匯指數就失控狂升了，好快升穿之前嘅水平。

23. 然後？到3月23日，股市見底，美匯指數咪跌咯。見到近乎同個股市係同步的。但最大嘅參考作用係乜？你見到323後幾日，美匯指數已經跌返去2月頭嘅水平，其實係好好嘅入市訊號了。

24. 講到尾，見到美匯指數的確同股市反相關。但係乜推動美匯指數？唔知。好可能就只係聯儲局擴表，印得多美金咪唔值錢。所以，似乎美匯跌股市升，冇話邊個領先邊個，兩者都係因為聯儲局。

美金100跌到90就驚？早幾年75都見過呀，所以放心印

25. 之後？快講兩句啦。咁樣印錢同埋派錢，正路美金都係一路跌。但係咪咩美元崩潰？又言之過早。唔投資嘅就崩潰啦。你睇美匯指數好似好弱，舊年100，今年90。但，睇長少少？2014年80都見過，再早幾年係7字頭添。美金又崩潰咗未？

26. 正係因為跌到75都冇事，咁你估仲邊有顧忌印錢？債息升？咪直接買債。係會將美金再整低，但睇返第一句。至於通脹啦喎，「唔知呢？」。但，你見2008年印咗咁多錢，唔係話冇通脹，但好多係在啲官方CPI/PCE 唔多計嘅地方，例如樓價，例如股票。乜嘢先叫「通脹」，就好深嘅問題了。照計東京一餐米芝蓮一星唔會係列入CPI/PCE，但肯定會因為印錢而貴咗好多咯。

27. 全個《2020 回顧＋教訓》，回顧篇卒之完。之後寫幾篇教訓，然後再寫2021展望。希望1月內寫完，或者農曆年前。

28. 重貼一次：睇完我呢堆文，你發現大學教你嗰啲真係唔多掂，唔好忘記你份學費仲有好大部份係政府津貼。記得推介畀朋友，呢排聽講本Patreon有啲 word of mouth，唔少人係朋友私下討論介紹，十分好。