2020 回顧 + 教訓 （六） - 債市101文。明明借據印好幾多息，點解又會話債息升升跌跌？ (Patreon)

「2020 回顧+教訓」頭五篇導讀（睇過舊文嘅可skip）

債券101

明明借據印好幾多息，點解又會話債息升升跌跌？

講到尾：債息升就債價跌，反之亦然

有乜影響債息/債價？ 通脹，避險意識，債仔情況，同埋萬惡聯儲局

1. 吹脹，在家隔離時就覺得在家冇乜效率。到返工（新讀者留意，本人已被炒，3月中起身）又覺得要通勤冇效率。果然係隔離飯香，放假望返學，返學望放假（留意開始做嘢後我會唔會放假望返工的）。

2. 不過 to be fair，返工嘅五日我都仲做咗其他嘢，包括同讀者食飯（五日食咗三餐！），同埋見工（我冇搵工，但有工搵我）。所以又未必真係咁低效率。記住上20蚊同40蚊月費會員，就可以順手搵我食飯。Patreon只會扣你差價，年費都可以轉，唔會收多咗。之前有啲未約到嘅再催下我，總會在合理時間內安排到。

「2020 回顧+教訓」頭五篇導讀（睇過舊文嘅可skip）

3. 講返，新讀者留意，呢度係史詩式「2020 回顧+教訓」嘅第六同第七篇，亦係「回顧」最後兩篇。之後應寫多兩三篇教訓，然後到2021展望。希望今個月搞掂，或者農曆年。至於點解要講咁多回顧？第一二篇都有講

4. 第一篇講嘅係舊年市況，點急跌急彈，根本冇得捉，亦證明Time the market 嘥時間，震走咗更加悔不當初，而你錯過咗最好嘅幾日，回報已經爭好遠。只有stay invested，不做槓杆。第二篇，講點解睇「經濟」多餘，如果真係要睇咁只能睇就業數據。

5. 第三篇冇咁重要，講VIX，講就話「別人恐懼我貪婪」，實行上唔係咁簡單，仲有講埋負油價根本係同股價冇乜相關。

6. 第四第五篇都係講聯儲局，很重要。第四篇講明明只係一次大啲嘅衰退，做乜市場咁擔心？因為現今社會結構，傳染到金融系統就好危險，亦因為咁聯儲局定住金融系統就冇事。第五篇詳述聯儲局當時做咗乜，幾時先穩住市場，同埋近十幾廿年嘅世界點行，銀紙點越印越多，加劇貧富懸殊，獎勵債仔，有資產嘅階級，同埋懲罰儲錢嘅人。

7. 第六（而家呢篇）同第七篇講債息，同美匯指數，但先講啲101嘢

債券101

8. 香港普遍投資者都係冇乜留意債市，原因好多。首先香港債市唔多發達，另外債市又比較「悶」，冇冧把好睇，得一大堆好悶嘅經濟數字同術語。加上債券涉及嘅數學比較多，實在有點惡搞。講債係極冇娛樂性嘅一樣嘢，你唔會見到有財演上電視講債券的。

9. 不過，世事嘅嘢環環相扣，埃汾冇乜叻，但勝在每樣都識啲。點你都至少留意美國債市，甚至可能係全世界最重要嘅一個資產。所以容許我講得長氣少少，又101講起

10. 債券嘅嘢，講到好深都得，但講到尾不過係借據。美國國債就係美國政府問你借錢，你得到幾多利息。就係借據一張，呢個應該不太深？你話，喂，美國政府用美金借錢，唔會還唔到架喎，因為可以印。事實係咁，因為政府有印鈔權，一個國家用本幣發債，違約風險差不多係零。當然可能到時隻貨幣貶晒值，所以太雞嘅國家就較難用本幣發債。

11. 債券嘅利息，係一早set死晒嘅。所以投資者如果由頭坐到尾，所有回報都係確定，唯一不確定係條友可能唔還啫，只要佢還就所有回報都係確定。長氣講一次，借據嘛，所有嘢一早設定晒。

12. 咁但你話，唔係喎埃汾，我見啲人話啲債券價格會上落喎，咩恒大港航啲債有一排跌到趴喎。冇錯係丫，因為張借據你可以賣畀人。舉例，我張借據可以到期收100萬，但而家傳條友好唔掂，應該就快破產，咁我可能寧願50萬都甩手。但買嗰個可能有內幕資料知道佢冇事，到時坐到尾佢咪收返100萬。

13. 同樣地，出面嘅息口都影響債券價格。我張借據鎖定咗10厘息，忽然間出面係咁加息，我求其做定期都20厘嘅，你呢張10厘息借據當然跌價，掉轉亦係。

明明借據印好幾多息，點解又會話債息升升跌跌？

14. 講到呢度，就可以講咩係「債息」，好多人都會覺得好奇怪嘅嘢一樣嘢。明明話美國國債係借錢畀美國政府，咁借錢嗰時講好幾多息架啦，點解仲會聽到話咩債息上上落落？

15. 因為，借據上嘅係「票面息」（coupon rate），平時我地講上上落落債息係「孳息」（yield）。即係乜？前者唔使講，就係印在借據上嘅息，每年7厘咪7厘，除非你走數，否則一定要派，派少一個仙都係違約。後者呢？就係你中途買返嚟，拎得到嘅「真實利率」。最極端嘅例子，當我隻債券係零息債（冇問題，唔少公司都有出），coupon rate 係零。零息都有人買？有，因為一條數之嘛，可以有discount，我90蚊借畀你，你三年後100蚊還畀我，零息。咁但我嘅yield就肯定唔係零啦，對不？應該係3.6%（100/90 開3次方根 減1，呼）。當然如果當中有埋定期還息，去計個yield就很煩，但我地唔討論。

16. 好啦，同樣上面呢個例子，張零息債，如果中途傳個債仔唔對路，張借據中途賣出去可能只係值50蚊。咁50蚊買嗰個，就唔係零息，又唔係3.6%嘅yield 啦，明冇？

17. 而所以，咩港航債息升到200厘，唔係代表佢要用200厘息還債，只係買嗰個會執到200厘（如果，唔爆煲的話）。佢還幾多息幾多本一早fix死咗架啦，只係嗰期隻債跌到趴街冇人敢買驚走數咁解。

18. 而去到呢度，應該大約明白「票面息」同「孳息」嘅分別。平時講債息，會日日跳嘅，差不多全部都係講「孳息」。

講到尾：債息升就債價跌，反之亦然

19. 咁你再知多一樣嘢，應該就可以了解債市：就係，債息同債價，係反方向嘅。唔使用咩數學公式，好簡單，個債仔唔掂嘅，人人都唔想要張借據，即係張借據價格跌，咁你用上面例子一諗，就知債息係升，有人執到平貨，最後條友還到錢佢咪執一筆勁。相反，借完錢個借仔好掂，其他人爭住要呢張借據，債價升，債息跌咯。

20. 舉多個例：通脹。當通脹好勁，或者只要係通脹預期勁，你發現債息自然會抽升，亦即係債價跌。亦係近排美國出現嘅嘢。你可以用好多角度演繹，例如係「銀紙貶值，咁我之前鎖定咗一個低息口嘅債主，咪好笨！所以張嘢會跌價」。

21. 希望大家唔好嫌我長氣，因為有啲可能真係唔知債息係乜，往後我可能亦唔會再寫文講。自己睇熟呢篇佢

有乜影響債息/債價？ 通脹，避險意識，債仔情況，同埋萬惡聯儲局

22. 好，嚟啦喎。頭先我地約略講咗有乜因素影響債息債價，通脹啦，個債仔掂唔掂啦。仲有兩種因素，第一，避險意識，人人都驚股災嗰時，自然買債唔買股票，債價貴債息低。第二，聯儲局。聯儲局呢個特別煩，因為佢可以干擾埋頭先第一點。你見2020年，股票升（詳情可以睇舊文，篇「年度鉅獻」），而債息跌，即係債價都係升。即係股又升債又升，以前唔多見呢啲情況，多數係債價升股票跌，或掉轉，你咪當一舊錢唔係買債就買股，多咗聯儲局就複雜了。

23. 上次有讀者問過聯儲局點影響債息，簡單答：以前，聯儲局唔會直接買債，咁只會去搞個短息，例如隔夜息。然後慢慢咪可以傳導去中期（例如一星期）嘅銀行拆息。你想像下原本隔夜銀行拆息係10厘，聯儲局可以減到0借畀你，咁個隔夜息會點？然後如果隔夜息你可以跌到差不多0，咁點都會扯低一星期嘅拆息啦？然後慢慢散到去長少少嘅年期 — 但，唔會散到去10年的。10年呢啲咁長嘅息，就由市場去決定，就係頭先講嘅，通脹呀，經濟呀，覺得你會唔會走數呀，避險情緒呀等等。

24. 不過，打從聯儲局開始可以直接買債（2008年）開始，就唔同了，聯儲局唔會「定死」個10年債息，但可以不停咁得閒入嚟買下債，唔使日日，鍾意得閒買啲。咁嚟啦喎，供求定律（！）嘛，有個咁買家不停買，債息當然壓低咗。咁你問，聯儲局錢從何來？咪就係印咗出嚟咯。仲唔明？你拎住張借據，聯儲局同你買，畀現錢你。咁咪等於印咗銀紙出嚟咯。

25. 再一次道歉，又寫到鬼咁長。下篇係「2020 回顧+教訓」回顧嘅最後一篇（同時出埋），2020教訓就遲下整多兩三篇，呼。

26. 不過我相信呢，睇完我呢堆文，你發現大學教你嗰啲真係唔多掂，唔好忘記你份學費仲有好大部份係政府津貼。你畀一舊水個月，睇N篇文，好過拎個PhD嘅同你講。記得推介畀朋友，呢排聽講本Patreon有啲 word of mouth，唔少人係朋友私下討論介紹，十分好。