盈富基金點算好？真係有Santa Rally．美國印錢仲勁過08！次次擔心通脹都係虛驚。疫情下美國人收入多咗負債低咗。點解新移民唔會拖低人工 (Patreon)

快評幾句—盈富基金點算好？

大師冇點你—真係有Santa Rally

每日一圖—美國印錢仲勁過08！次次擔心通脹都係虛驚。

Good Read —疫情下美國人收入多咗負債低咗。點解新移民唔會拖低人工

FB Post summary—從缺

1. 噢耶，埃汾已經結束14天隔離！但噢撈，星期一又要返工。「又話畀人炒咗？」。係喎，但都仲要返到3月頭，除非佢再賠錢要我早走（而我係十分想的）。所以快寫

2. 另外，留意我嘅「2020回顧+教訓」已經寫咗5篇。應該8篇內完成，今個週末內吧。未睇嘅，呢度：

（一）—美股一個月跌咗三成，而呢廿幾日有六次反彈，你點捉？

（二） —真係要由經濟數字睇股市，只能睇呢啲

（三） —VIX 90 入市，都要捱多幾棍先見底。至於負油價？記唔記得幾時？

（四）—社會高度金融化，股災就係驚金融系統出事，定得住佢就冇事

（五） - 聯儲局一秒鐘印100萬美金，你想同佢對抗嗎？

快評幾句—盈富基金點算好？

3. 應該聽日（星期一）寫篇新文

4. 有關呢個「盈富基金」嘅故事，當然好多人睇，亦好多人關注。制裁嘛。但講真全不意外，既然美資公司唔畀買中移動，咁即係美資公司出唔到中移動輪（因為要有正股對沖）咁。啲ETF亦會有問題，因為恒指入面有中移動，你又唔買得。

5. 但你話會令個市場好波動？不見得。因為暫時影響，係零。盈富一早買咗按恒指成份比重嘅中移動。所以有乜問題？而家又唔係之前買落都要沽晒。但當然如果之後增發就會有問題，會開始偏離，都有啲煩。詳情聽日講。

6. 不過好快兩樣嘢：發輪門檻唔高，你高盛發唔到中移動輪，我海通咪搶埋你生意。多謝先。同樣地，ETF基本上門檻唔高（主要係要多錢，鬥低fee），美資嘅買唔到，咪搵歐資嘅陣間 兆富基金 樂富基金，全部唔要你盈富都得。邊個損失最大？

7. 而你亦都想像到，啲美資行會點去同政府游說抗議。留意同你想像唔同，美資行在中國（係中國！唔係香港）過去一兩年加大咗好多投資。日本行都係。我知唔少人唔啱聽，但人地講到明：「雖然中國存在包括政治風險在內的無限風險，但經濟亦具有無限增長潛力」。

8. 如果聽日（星期一）跌兩千點？梗係買啦。如果跌兩百點？咁你可以睇下一年恒指有幾多日咁嘅波幅。升嗰時就個個股神嫌渣得少嫌升得慢，跌就幾百點叫救命。股市是好危險的，怕危險就不如渣cash，冇波動，保證輸死。好開心的。I mean，成日去擔心人地，不如顧掂自己先啦。

大師冇點你—真係有Santa Rally

9. 舊年平安夜寫過呢個 Santa Rally，年尾最後5日，加埋新年嘅2日，呢7日，史上回報一般都相當強，強過其他7日組合。而如果呢7日跌嘅話（好少見），之後嗰年都冇乜運行。咁跟進返，舊年都仲有Santa Rally，嗰7日係升嘅，今年放心啲。當然只係多個話題，冇乜任何特別跟據，亦冇包生仔。

每日一圖—美國印錢仲勁過08！次次擔心通脹都係虛驚。

10. 美國印錢仲勁過08！- 2020回顧嘅第五篇專講印錢。如果計聯儲局嘅balance sheet，以金額計當然印得勁過08，但百份比計唔係。不過，如果你用M1去睇，而家美國M1係增長65%—近50年都好似冇見過20%。咁你話信邊個先好？冇喎，代表唔同嘅嘢，首先你覺得咩係「錢」先？亦記住唔同國家M1定義根本唔同。

11. 次次擔心通脹都係虛驚—話說印咗咁多錢，實通脹啦。呢個亦係近日大家好擔心嘅嘢。「但其實08年嗰時都好擔心」。不過呢個圖見到，投資者以往次都擔心，但出嚟嘅數，係差不多一定低過佢地所估。但，官方CPI，真係代表「通脹」？

Good Read —疫情下美國人收入多咗負債低咗。點解新移民唔會拖低人工

12. 今日兩篇我都好鍾意

13. 疫情下美國人收入多咗負債低咗—是真的，我唔係指某啲美國人受惠股市升。而係指as a whole．用原文：Americans made $1 trillion more from March to November of 2020 than they did from March to November of 2019。點解？因為派錢。咁，股市升又係咪同實體經濟脫節呢，可？

14. 點解新移民唔會拖低人工—十分「Econ」嘅一篇文，睇啲圖就知。我不完全同意佢結論或推論過程，但睇下其他觀點永冇壞。

FB Post summary—從缺

15. 對，除咗預告會寫盈富基金外，一個Post都冇出。另外有唔少人提議不如我將FB Post 貼埋過嚟，但我暫時唔係太想。麻煩都唔係太麻煩，但會令到太多post，搵舊文更難。反正FB Post唔多，應該唔會難追。記得設定「see first」，而反正每兩三日我都會在呢度list 一次。