盈富基金 19 問 (Patreon)

Q1：盈富基金乜東東？

Q2：指數ETF 是甚麼？

Q3：今次點解搞著盈富？

Q4：但點解道富要買中移動？

Q5：我仲係唔明，點解道富一早會買落中移動，而點解之後唔使買？

Q6：咁一天都光晒啦，仲有乜問題？

Q7：OK，指數比重執位我明。第二個問題呢？

Q8：咁即係對盈富基金有冇影響？影響大唔大？

Q9：咁可以點搞？

Q10：會唔會畀人告違反商品說明條例？

Q11：咁之後盈富基金會點？

Q12：道富入面點諗？

Q13：咁我買2833咪得咯！

Q14：咁咪即係送生意畀人做？

Q15：其實盈富基金有幾大？

Q16：追蹤恒指嘅ETF規模有幾大？聽講唔大？

Q17：點解追蹤恒指嘅資金咁少？

Q18：聽講話美國人唔買得盈富喎，咪好大打擊？

Q19：咁明明我啲網友話盈富會大跌大撤資喎，中移動會狂跌喎

盈富基金緊急吹嘛。

本人唔係做ETF亦唔係做Fund，有可能有錯。但總比好多完全唔識嘅人好。如有疑問，自己打去道富問。但真係唔好信啲中環工都未返過嘅人。

3000字。1-2基本嘢，識嘅可跳過。3-7講點解會影響盈富基金。8-11講盈富基金可以點應對，會點應對，同有乜後果。12-14講對成個市場嘅影響。16-19講返根本恒指唔係好多人買。

Q1：盈富基金乜東東？

A1：即使冇乜經驗，大約都聽過下盈富基金。歷史不多講，應該都知道係98金融風暴香港政府入市後拎住一大抽股票，但基於種種原因都係盡快想甩手，就搞呢個東西出嚟。而家呢舊嘢同政府應該已無關係。

要強調嘅係，盈富基金嘅性質，同佢歷史背景，近乎冇關。講穿咗佢只係一隻追縱恒指嘅被動ETF，同你市面見到嘅2833（恒生指數ETF）同3115（安碩恒指ETF）近乎一樣，都係被動恒指ETF

Q2：指數ETF 是甚麼？

A2：可以講好長，但在呢篇文嘅context，好簡單，就係好多人理解嘅，「買指數」。你買呢啲東西，就等於買恒指，但唔使自己買夠N間公司。咁當然，你亦可以買其他指數嘅ETF，例如可以買國企指數（2828），科技指數，甚至買外國指數都得。掉轉頭，外國投資者在佢地嘅國家，一樣可以買返當地指數，或者恒生指數嘅ETF。

必要講嘅係：ETF唔一定係追縱指數，甚至唔一定被動。可以有主動ETF，但不討論。同樣地被動唔一定係跟指數，也不詳講。至於咩係主動被動？有個基金經理自己決定買乜好炒乜好咪主動，條友冇自由意志只能跟指數執位照單執藥咪被動。

同樣地，ETF嘅ET，係上市交易。唔上市交易嘅基金一樣可以追蹤指數。而上市嘅基金又可以唔追蹤指數，搞清楚。盈富同樓上2833，3115，都係被動，上市交易，而追縱恒指嘅ETF。

Q3：今次點解搞著盈富？

A3：開場白多咗啲，入正題。今次問題嚟自三樣嘢：第一，盈富基金嘅經理人道富（State Street）係美國公司，但呢隻嘢追蹤恒指。第二，中移動等等在恒指入面，恒指冇打算將佢地踢走。第三，美國唔畀美國人買中移動。三樣夾埋，咁道富就不能買中移動啦。

Q4：但點解道富要買中移動？

A4：問得好，其實係唔使嘅。暫時唔使。因為一早買落。除非美國政府話持有都唔得，要沽晒，就另一玩法。

Q5：我仲係唔明，點解一早道富會買落中移動，而點解之後唔使買？

A5：咁講長少少。恒指是甚麼？就係一籃子股票。你當有好多好多錢，入面N隻成份股，每隻有若干股，出嚟嘅一個大組合。咁入面每股成份股有不同比重。而隨住啲嘢日日升跌，你每隻嘢嘅「持股量」唔會變，但比重會變—即係你一年前1000蚊買落匯控，1000蚊買Tesla，1000蚊買曼聯捧英超咁（唔好介意）。當時係每隻33%，去到今日當然係比重去晒Tesla度．啲嘢升跌，就另佢地在恒指嘅比重升跌。

但，盈富基金天地初開已經跟當時嘅比例買，咁之後發上發落，佢都會跟返個比重之嘛，唔使自己日日又買又沽的，你估你咩。

Q6：咁一天都光晒啦，仲有乜問題？

A6：Except two things，講第一樣簡單啲嘅。恒指執位。大家都知恒指一年會執四次位，好多原因，有新成份股有舊，原有嘅比重亦會執。有時同個股價表現無關，甚至係越做得好越畀人減（例如騰訊，因為上限10%，咁次次升得多過其他，一到執位咪要斬返落嚟），有時會涉及個籃某啲股票多咗少咗。咁你中移動個比重如果忽然大咗，咪仆街咯。我咪要買多啲中移動，但唔畀買喎。畀人拉喎。點搞？

Q7：OK，指數比重執位我明。第二個問題呢？

A7：第二個問題真係比較複雜。但有冇諗過，盈富基金講自己規模有幾大（市值1090億）。點解會越嚟越多架呢？錢邊度嚟？留意唔係因為你去買。你去買，咁另一個人（例如我）沽畀你之嘛，唔會有錢入咗去盈富基架喎！正如你買賣隻Tesla，唔會有錢走咗入公司（除非佢出嚟集資）

呢度涉及，基金可以「增發」同「贖回」。詳情都有啲深。但唔係你同我參加嘅嘢，係「大戶」參加。當中冇乜古惑，可以睇呢度（Vanguard嘅文件，但原理差不多）。咁有「增發」同「贖回」，就煩啦，就涉及要買賣中移動。

Q8：咁即係對盈富基金有冇影響？影響大唔大？

A8：當然大！否則唔使星期日已經放風畀傳媒。但只係唔係即時嘅影響。好多人睇嘢就係咁，嘩聽日跌兩千點呀隻盈富人踩人呀。唔係咁。挑，今朝盈富3個月新高添。但手尾是很麻煩的。短期冇事，長期幾煩。

Q9：咁可以點搞？

A9：冇得搞！基本上就係盈富話你知嘅樣一樣，以後唔買中移動咯。

Q10：會唔會畀人告違反商品說明條例？

A10：章程寫明，公告亦講多次，「倘若跟從恒生指數成份股及權重並不可行，經理人將在計及所有相關市場情況後，運用其專業技能、打理能力及判斷力繼續盡全力實現投資目標」。即係，盡做。但做唔到冇計。你去告美國政府咯。

Q11：咁之後盈富基金會點？

A11：正如好多分析有講，恒指有中移動，但你啲新單位買唔到，咪會有mirror 個friend，error，但有error又會點？冇架，你唔好買咯，冇話有error唔得喎。樓上寫咗啦，已經盡做。不過話說回頭，如果有人覺得中移動垃撚圾嘅，冇中移動嘅恒指斷腳ETF，唔係仲好？你可以自由選擇的。不過因為只係新發單位受影響（安定友愛單位冇事），所以分別唔會太大住。慢慢就見到

當然如果咩拜登上台取消呢樣嘢，就繼續打牌啦。而如果忽然間話持有中移動都唔得，要沽晒，更煩。

Q12：道富入面點諗？

A12：我幫佢答埋都得。咪就係「仆街。又點撚樣呀？」。我相信你去做都係咁反應。但所謂形勢比人強，唔通可以同政府作對？

Q13：咁我買2833咪得咯！

A13：冇錯！本文唔係幫任何人做廣告，但，客觀就係咁。得你盈富識做恒指ETF？

因為，你要明白，指數ETF並唔係十分高技術門檻嘅一樣嘢。個門檻嚟自錢，基本上都係鬥平，以本傷人。並唔係咩晶片之類嘅獨門科技，而美國暫時亦似乎不能迫到恒指公司將中移動踢出指數。咁，我做恒指ETF嘅，美資行唔買得中移動啫。我唔係美資行咪買得咯！所以iShares（Black Rock旗下）隻3115一樣有盈富基金嘅問題。但2833就冇呢個問題！如果你care tracking error，咪買2833

當然會唔會有一日雖遠必誅，你恒生銀行我都要制裁，制裁埋你老母（匯豐），你阿爺（平保，或Black Rock，匯控大股東），甚至買過中移動嘅全部打靶，就another issue啦

Q14：咁咪即係送生意畀人做？

A14：都差不多，但政治嘢，係咁上下。你可以參考另一個例子：呢排啲美資行都要將啲窩輪退市。點解？因為我買唔到中移動，點發中移動輪？點解發輪要買正股？因為要對沖。你估學你咁賭白頭片，自己睇好睇淡？輪商根本唔使咩睇好睇淡殺你，根本唔使「同你對賭」—因為根本食硬你。

同恒指ETF一樣，發中移動輪亦唔係咩技術門檻好高嘅嘢。中資都識做，亦都一直有做。你發唔到中移動輪？多謝先。先生埋嚟我呢邊啦，佢嗰檔冇得玩啦。

不過你可以想像華爾街冇咗咁多生意，點會唔同政府講／嘈／游說

Q15：其實盈富基金有幾大？

A15：唔係好大。當然佢地講1000億，但真係唔係咩咁大

Q16：追蹤恒指嘅ETF規模有幾大？聽講唔大？

A16：頭先講咗，唔止得盈富一隻，仲有其他嘢。甚至有其他海外上市嘅嘢。雖然的確盈富最大。但夾埋都唔係好多。比實數你：跟據恒指公司講，追蹤佢地指數嘅被動資金講緊340億美金。即係幾多？咁你可以睇下，追蹤美股標普指數嘅，講緊46000億美金。百幾倍。美股冇大香港百幾倍下話？

Q17：點解追蹤恒指嘅資金咁少？

A17：好多原因。除咗美股當炒，深度夠，交易成本低外。即使在香港，機構投資者往往係買MSCI香港指數嘅。一路都話恒指有點過時。正如專業投資者睇美股一定係標普500指數，唔係道指（當然恒指冇道指咁廢）

Q18：聽講話美國人唔買得盈富喎，咪好大打擊？

A18：冇錯，但請睇返Q16同Q17。另外，佢地可以買2833

Q19：咁明明我啲網友話盈富會大跌大撤資喎，中移動會狂跌喎

A19：先講中移動，今日朝早勁升，係尾市跌返啲。但中移動當然之前因為美國禁令而跌。

至於投資者會狂質盈富之類，實屬多餘。盈富基金per se並唔係任何嘢，佢只係代表一堆股票，亦即係恒指個籃。咁，恒指跌5%，佢咪跌5%。

老實，盈富朝早仲要創3個月新高添！咁下午咪跟返恒指跌（主要係跟A股）.

會唔會恒指唔跌盈富大跌？係就好，好多「大戶」好開心。因為可以套利。你當個信封入面有10蚊美金，值78蚊港紙。個信封就賣78蚊（唔好鳩拗，唔係首日封OK？冇肺炎口水冇得呃錢）。忽然間美金冇變但個封賣40蚊，我梗係買！

再講白啲，你恒指升200點（今朝嘅嘢），隻盈富如果因為邊條傻西狂質跌2%，我咪飛去買咯！一邊買盈富另一邊沽正股或者沽期指，套利。反正亦因為，如果指數大跌晒但盈富唔郁嘅，我咪買正股或買期指，沽盈富。