2020 回顧 + 教訓 （五） - 聯儲局一秒鐘印100萬美金，你想同佢對抗嗎？ (Patreon)

聯儲局緊急開兩次會，幾日都等唔到，有話仲嚇親市場

第一次減息拆息唔跌，第二次減息拆息仲要升。可見銀行全無信任！

323 股市見底，正係聯儲局推出「無限QE」之日

QE如食白粉，易請難送，銀紙長印長有。不投資，向下流。之後會點？唔關我事。

1. 今篇係 2020 回顧＋教訓 第五部。第一篇，第二篇，第三篇， 第四篇早前出咗。呢篇同第四篇都係講聯儲局。上篇同大家講咗我地呢個高度金融化嘅社會，亦講咗如果銀行出事有乜後果。今篇講下到底2020年3月時銀行間有幾唔信任，同埋聯儲局做咗乜。

2. 貼多次標普圖，應該每篇我都會貼。記住，「2月21日左右開始急瀉，1個月後嘅3月23號見底，一個月差不多跌33%」。記住，221，323。好重要，背咗佢。221，323。（大家大約想像到當年我係點教書嘅，係喎，我以前教中學的）

聯儲局緊急開兩次會，幾日都等唔到，有話仲嚇親市場

3. 留意聯儲局一年正常開8次會，一早定晒日期。2020年第一次係1月尾，冇加息減息。第二次原本係3月18。但大家都知，221股市已經大瀉，當時已經燶味四起，疫情開始全球擴散。咁當然唔會低能到話「未到日子我地等下先」。2020年開咗緊急會，2008年後應該第一次

4. 太遠嘅唔講，但金融海嘯中聯儲局緊急減息減到零。然後拖咗好耐都唔肯加，到2015年慢慢加上去，加到2018年，加咗9次。然後2019年開始見唔對路，減咗3次息。呢啲都係每次0.25厘。而2020年1月尾嗰次冇減息。咁計到，仲有6次息減啦。

5. 結果呢1.5厘，呢6次減息，就在3月中嘅例會未開之前，兩次緊急會減晒。先係3月3日減0.5厘，到3月16日再減1厘

6. 記得日子啦嘛？221開始瀉，到323先停。亦即係，第一次聯儲局減息後，股市係繼續瀉，其實瀉得仲勁。第二次亦都係，瀉多幾日先見底。

7. 當時嘅講法有好多，除咗經典嘅「聯儲局發明唔到疫苗」「印銀紙救唔到人命」（本人唔buy）。仲有：「聯儲局忽然咁急減息，應該背後知道大鑊嘢」（當時我buy，事實亦係幾大鑊），以及「咁快打晒啲子彈之後咪冇嘢用？」「做乜兩日都等唔切？應該好大鑊」（第二次減息適用）

8. 事後睇，我會理解係，食藥都要畀啲時間啦，一打落去即時見效咩（陣間會細解）。亦都有人話，「減息似乎解決唔到問題」，都有道理。因為聯儲局仲做咗一樣嘢：QE。之後會詳細解

第一次減息拆息唔跌，第二次減息拆息仲要升。可見銀行全無信任！

9. 我想同大家睇睇，一個月嘅美金LIBOR，銀行同業拆息。大家預聯儲局減息，呢舊嘢就會跟住郁。詳情有點複雜，但例如今日係1月15日，聯儲局開會係1月31日，而家聯邦基金利率係2%，而大家都估1月31日會減到1.5％，咁我1月1日嘅一個月LIBOR係幾多？應該係1.75%．大約係咁機制。

10. 好啦，221開始跌市時，一個月LIBOR講緊係1.6厘左右，隨住疫情又爆股市又瀉，大家當然估會減息，咁LIBOR都一路跌。特別留意嘅係，3月6號緊急減息0.5厘後，9號LIBOR只係跌少少（可能預咗，或者反映預下一次再減），都仲算正常。但去到10號，仲要反升，之後都冇乜點跌，就令人相當擔心了。係咪聯儲局搞唔掂？

11. 而你睇返個VIX圖，正係3月6號開始一路抽上去！ 因為銀行都互不信任呀！開頭係唔借錢畀企業，後來連同業都唔借。我點知你會唔會爆煲？然後股市係咁跌，VIX係咁升，大家更加驚。死亡螺旋。

12. 然後到3月16日，就真係末日的開始了。聯儲局再緊急開會，今次將剩返嗰1厘，全減！當然係想釋出信心。但似乎弄巧反拙，當時因為股市一路瀉，大家嘅演繹就係「聯儲局忽然咁急減息，應該背後知道大鑊嘢」，以及「咁快打晒啲子彈之後咪冇嘢用？」「做乜兩日都等唔切？應該好大鑊」—的確，原本係17-18日開會，但16號再緊急一次，令人相當意外。

13. 然後就勁咯，你見個股市都仲係不停跌，大家都擔心減晒息冇晒子彈。你睇最核突嘅係乜？係見到16號減息1厘後，LIBOR唔跌，仲要升！升返上近1厘。見到市場真係極度恐慌，銀行間信心全無。不過留意，呢個現象去到4月頭先緩和，但股市323已見底。股市投資者既怕死又貪婪，沽得快，入返市亦快。銀行就當然縮埋一邊，見到定晒返先伸返個頭出嚟

14. 後來成壇危機點平息？有理由相信，係因為聯儲局嘅無限QE。似乎真係game changer，至少日期上吻合。但不能話之前做嘅減息等等冇用。

323 股市見底，正係聯儲局推出「無限QE」之日

15. 對，聯儲局推出「無限QE」，正係3月23號。咁你背熟咗啦？323 正係股市見底。似乎唔係巧合，但我再強調，不等於之前做嘅嘢唔重要或冇用。

16. 減息大家都知係乜，咁QE係乜？倒可以解下。好多人理解做「印銀紙」，嚴格上唔係完全一樣，但一般外行人咁理解，都冇乜問題。張圖都係咁畫。

17. QE做嘅，基本上就係直接買債，壓低債息。聯儲局（其他央行都係）傳統上通過郁個中央利率，去傳導去啲短期拆息，再傳去啲短債債息，去到長債債息就唔係央行管到。但QE，你當直接踩入去啦，上面張圖都有寫unlimited purchase．

18. 咁「錢」從何來？冇架，篤手指記數，記帳落去自己嘅Balance Sheet。所以變相就係印咗出嚟。而睇「印錢」幾多，你睇聯儲局嘅Balance Sheet就可以了，公開數據，一星期有一次，幾好的。

19. 不過，都畀大家知多啲，QE同「印銀紙」真係有一樣唔同：QE嘅始作佣者（雷曼爆煲後），上上任聯儲局主席伯南克Ben Bernanke 都講過：分別係，QE係可以收返嘅

20. 此話不假，2015-2018年，聯儲局除咗加息，仲有「收水」，亦即係「縮表」。見到嘛？2015嗰幾年真係有縮落嚟，丁丁咁多。到2018年大力啲縮（8%），即時全球股市大跌！所以你講啲咩經濟數據真係多餘。（順帶一提，以百份比計，2020印錢冇2008咁多。但金額當然多好多）

21. 咁2020年，聯儲局印錢有幾恨，實在太多太多圖，你隨手Google都有大把。但我比較鍾意呢一個。

22. 除咗形像化嘅「1秒印100萬美金」（我真係計過！），呢個圖仲睇到2018年收水（然後股市大跌），亦留意2019年尾聯儲局已經停咗收水，仲適度放返啲。不過去到2020年爆疫後先係戲肉

23. 留意嘅係，聯儲局唔係「無限QE」嘅323先開始印錢。你見第一次減息（3月6）後已經差不多同時做，之後直角咁上去。而323講「無限QE」，同你食自助餐一樣，你估真係食到無限咩。但畀到市場信心。

24. 呢個係另一個睇法，聯儲局每星期Balance Sheet變動。見到就係3月25號嗰個星期「印」得最多，亦係宣佈「無限QE」嘅一星期，結果股市見埋底。

25. See？其實好似好簡單，不過就當下次全部重覆一次都好，有樣嘢你要知道：你係再下一個星期三先見到呢啲數嘅。

26. 所以你話「聯儲局發明唔到疫苗」「印銀紙救唔到人命」？但聯儲局解決咗大家好多問題。

QE如食白粉，易請難送，銀紙長印長有。不投資，向下流。之後會點？唔關我事。

27. 寫到呢度，都真係冇乜好講。又係high level啲去睇，近十幾年，資產價格飛升，絶對係因為錢印得太多。官方啲「通脹」話3%，但你睇食麥當勞貴咗幾多？買樓貴咗幾多？PTGF/BF貴咗幾多？比特幣，球員身價，紅酒，呢啲全部都係QE後遺症。仲有，其他人有錢咗，你自己嘅心理難受，不能低估。個個都一年去幾次日本，唔通你返古兜溫泉？好多唔係必要嘅嘢，你都覺得必要。

28. 可能有人覺得我消極，但我覺得我係敬畏大自然嘅力量。唔好諗住去對抗佢，或者改變佢。而係順佢個勢而行。唔敢話乜都升，年年升，但有咗聯儲局呢種玩法，的確資產價格係易升難跌。唔投資，必然向下流。

29. 當然，到佢縮表，咪好似2018咁咯，已經嚇死好多人。但你應該估到，聯儲局似乎都係縮得慢，印得快。然後你可以去鬧佢地都係為權貴為有錢人服務，隨你。「但在座有買股票嗰啲都算係有錢人」

30. 而你睇民主黨嘅玩法，擺明派錢。但錢從何來？都係靠印。當然我相信共和黨上台都係一樣，只係程度上嘅分別。驚通脹之下，呢排美債債息狂升。咁點算好？去到一個位，可能就會又入市買債，壓返低個債息。錢從何來？又係靠印。正路就會整到美金弱，然後可能再有通脹，回歸基本步。

31. 呢個遊戲可唔可以不停玩落去？怕且唔得。但唔緊要，套用我明報（星期一）專欄一句：凱恩斯說，長遠來說我們都難逃一死。事實也像路易十五所講：「我死後，哪管它洪水滔天」

32. 呢啲，就真係另文再講了。但對於當權者嚟講，選擇都係顯而易見。群眾已經似係食白粉，再經唔起真正嘅大蕭條。你見美國啲友收入仲高過疫情前，因為有錢派！只要一股災，一經濟衰退，又係覺得要印錢了。咁政客為選票當然配合，返唔到轉頭。

33. 美金弱？連早幾年低位都未跌破啦，唔使咁快驚。貧富懸殊？係架，你問我近幾年全世界咁多示烕不穩，並唔係因為政治制度（美國智利法國冇民主咩？），而係因為貧富不均。不過，始終啲人唔係冇飯開嗰種赤貧，所以難成氣侯。

34. 似乎講得太遠。下篇應該係 2020 回顧+教訓 入面，回顧篇嘅最後，講2020年嘅美國債息，同埋美匯指數。之後就到教訓。下星期內必然搞掂。