2020 回顧 + 教訓 （二） —真係要由經濟數字睇股市，只能睇呢啲 (Patreon)

引言—操FIT你自己，到時自然識反應

睇多次美股圖，221開始瀉，323見底。背熟佢

真係睇實體經濟，就只能睇失業救濟數據

疫情數字—股市唔會等你數字爆，自己就已經率先爆

引言—操FIT你自己，到時自然識反應

1. 呢篇係 2020 回顧+ 教訓系列嘅第二部。第一部在此，未睇嘅睇咗先，睇咗就照計唔使溫多次書。暫時未定實有幾多篇，但今篇仲係「回顧」。即係至少有一篇（或多篇）「教訓」未寫。似乎總數會去到六七集。

2. 冇睇第一部又懶睇嘅，咁快手講多次。2020年太特別，值得回顧下，你亦思考下。好多人只急住想知2021會點，講真我都唔知，只能估—而更多人係連2020發生咩事都唔知。多咗經驗同思考，係我事隔十二年，2020年比2008年進步得多嘅原因。（主要講投資表現，但亦計埋其他嘢）

3. 你平日功夫做得夠，到大浪打埋嚟自然識得處理。講真，風高浪急你梗係靠自己，打嚟問我都冇用，首先我都可能自身難保，二來最愛你嘅多數都係你自己，三來人人情況唔同。我做嘅就係幫你平日操練，到時你自己識反應—分分鐘你反應好過我添。球手好波過教練有幾出奇？

4. 上一篇主要講股市，講美股，但都夠，全世界都差不多走勢。今次呢篇，我會睇埋其他東西—唔只係因為投資（所以我唔會講香港樓美國樓，金價都未必講）。而係睇，到底我將其他東西，同股市拍埋一齊，Dynamics係點嘅呢？會唔會睇其他嘢，可以知道股市差不多見底？或者有乜嘢係股市郁完佢先郁？當然下次轉角市未必都會係咁，但，「睇多次樓上堆引言」。

5. BTW，下面有好多圖，我已盡力做到最清。但講真，最好有個互動圖你去碌住睇。咁我推介你上Financial Times，啲圖免費，算好用。下面你見啲黃咁咁色嘅圖就係FT圖，人地嘅corporate color（順帶一提，有一鑊有個第個部門嘅同事，入我房見到堆FT，問我呢啲係咪以前啲股市大事，見啲報紙黃晒咁嘅。I was like……）。少部份FT冇嘅圖，我可能用CNBC，或其他梳屎．到時再提，一樣免費，你可以碌住啲圖睇文。

睇多次美股圖，221開始瀉，323見底。背熟佢

6. 嚟料啦喎，呢個圖（亦係FT），save低佢，或者開住嚟睇文。上篇文都貼過，標普指數2月至4月間。等登放大到你大約睇到日期。睇唔到唔緊要，講多次，「2月21日左右開始急瀉，1個月後嘅3月23號見底，一個月差不多跌33%」。記住，221，323。好重要，背咗佢。221，323。

真係睇實體經濟，就只能睇失業救濟數據

7. 反高潮，第一樣先講「實體經濟」。即使你以為「股市反映實體經濟」（呢句嘢根本語意不明！）都好，你講啲咩GDP真係弱智的，一季先出一次，出得嚟都蚊訓，股市永遠炒將來。咁你話，睇定下一季嘅GDP呢？理論上得，但當時你都未咁快估到，有人估都好，啲數字都慢，偏差又大。近乎冇用的。

8. 比較快手又貼地嘅經濟數據，當然係initial jobless claim （首次申領失業救濟人數，中文主播惡夢，僅次於2012年歐洲國家盃希臘對波蘭，一邊係咁基斯另一邊係咁斯基，玩死講波佬），一個星期出一次（香港星期四晚，美股開市前）。相當timely．

9. 睇圖，你見到去到314完結嗰個星期，美國緊急狀態，但嗰個星期initial jobless claim，都只係微升—咁你估都估到之後數字會狂升。另外，留意返，呢個314完結嗰個星期（星期六嚟的）嘅數字，319（星期四）公佈

10. 而背熟未？221美股已經跌市，去到319？已經完成成個跌浪嘅八九成起碼，咪話323美股就見底—但當時（319）你見到啲就業數據都未變恐怖。可見股市係幾咁敏感，行得最快。有時錯，但好少會慢，聞到有燶味即走啦，甚至我聞唔到但見到人走我就走啦，仲要等見到火？

11. 之後？你睇321完結嗰個星期同埋328完結嗰個星期嘅數，極其恐怖。但分別在326同4月2公佈—323美股已經見咗底了。

12. 咁你見到成個dynamics大約係點啦？即使你而家睇圖紙上談兵，知道328完結嗰個星期就業數據去到最差—你見到個數都4月2，而323 就見左底啦。何況，當時你點知去到最差？要睇埋4月4完結嗰個星期嘅數—即係你4月9先見到。而如果見到回落但仲擔心反彈要「睇定啲」嘅，唔知你等到幾時。

13. 以上有少少亂，有打錯字勿怪，但相信大家明個精神啦？自己碌一次，或者搵返當時嘅報紙頭條嚟睇。

14. 總結：319星期四，你見到314完結嗰個星期嘅救濟數，都仲未開始狂升，但股市早已經跌到七彩，成個跌浪都做咗八九成。已經係幾好入市時機。相反，之後啲數字再恐怖，股市已經展開晒反彈浪，仲等你？你咪鬧「脫離實體經濟」—但股市一早預測到你啲數難睇啦，炒緊再之後嘅嘢了

15. 細心睇多次呢段嘅嘢，一理通百理明。真係睇經濟數據，係用嚟咁用嘅。如果advance啲？啲人會睇定下一兩星期嘅預測（炒前來嘛），或者自己估！甚至用其他偏門方法，包括去夜場數人頭呀，睇下LV有幾多客呀之類。第時再講

16. 如果呢部份段（失業數據）唔係好明嘅，真係睇多次，亦可能我會打錯字。你自己對住失業救濟圖同股票圖研究下（記住失業救濟數字要再下星期四先出架下，開市前出的）。唔好夾硬似懂非懂勉強睇落去。上面嗰段明咗，之後就好簡單。

疫情數字—股市唔會等你數字爆，自己就已經率先爆

17. 好啦，之後就簡單了。全球累計感染人數，so sad，姑且唔好理中國住，有人話假，都似有啲假。但反正中國爆得早過其他地方點都係事實。所以睇其他，主要係美國，同埋中國外最先狂爆嘅意大利。

18. 留意個圖冇logscale，而且係cumulative（所以唔會跌）。我都係維基百科搵，冇搵原數據，你可以自己搵。但目測，美國人數急升，3月16號之後嘅事—噢？基本上就係323見底嗰時。再講一次，股票行得好快的。所以有時咪會畀人覺得點解「唔反映實情」。323應該係美國開始爆到七彩，但股市就見咗底反彈啦。咁你之後仲日日鬧 嘩仲有人死緊 創緊新高 點解個市仲升，係你唔了解個世界點運作者。

19. 補充一點，意大利爆得早過美國。但3月頭（呢個圖最左）仲係冇乜。但咪話，221已經開始跌咯，冇架，聞到燶味，見中國爆咗，然後又已經去到外國，咁大家都知必定失控—仲使等你官方出數字咩。何況之前個市都升得幾好。

20. 當然，以上種種，唔係自動波。政府唔係坐定定。疫情嘅，可能控制得唔好，但亦冇計，疫苗又唔係話有就有。封關封城嘅，唔封又驚遍地開花，封咗又怕影響經濟，往往封完又解，解完又封，冇計，百年一遇。

21. 但我更想講嘅係，聯儲局。要不是聯儲局？2020應該不一樣。在呢啲咩救濟數字係咁升期間，或者疫情狂爆期間，聯儲局係做咗好多嘢嘅。你又可以拎嚟對比下。但聯儲局當然係戲肉，隔多一篇（下篇再下篇，即係第四集）先講。

22. 咁第三集講乜？同你講負油價，同埋VIX。總冇理由講完聯儲局先講呢啲。

第三集已出