［號外］尋找獨角獸。李澤楷+Peter Thiel+印尼UBER + 印尼Amazon，值幾錢？ (Patreon)

（20:55 更新 - 盤前係咁插，似乎唔多對路咁。不過出咗文就唔刪）

嚴正警告一堆

印尼有3億人。Period（趕時間可以skip呢段）

印尼UBER 同 印尼亞馬遜合併！180億美金估值

印尼股冇得買，但李澤楷幫大家搞咗間美股SPAC！

而家15蚊，得就20蚊，唔得就10蚊

嚴正警告一堆

1. 警告：初哥最好唔好睇，睇咗都唔好做任何嘢。唔係怕你睇唔明，實情好易明，仲要有我呢位好老師解畀你知。但第一我怕你輸錢。第二我更加怕你贏錢。輸錢皆因贏錢起

2. 利申：我掙扎過好唔好寫呢篇文。用嘅時間腦汁都好少。但真係掙扎咗十五分鐘。特別係我見呢排唔少新讀者，亦唔少似乎我現實或網上識嘅，我理解都係投資新手。我更加驚。

3. 樓上講，首先怕你輸錢。咁除咗怕你退訂外，亦都講真怕你唔見錢，我當然唔想讀者輸錢。第二，更加怕你贏錢，之後以為我係股神，或者以為自己股神。好危險。昨晚篇文咪講咗咯，隻隻中點石成金，仲唔小心？即晚就美股插 600點（我寫嗰時冇留意）

4. 咁點解仲要寫？主要，都係刷存在感。講真，呢個中咗要認下叻。所以你衡量下啦。唔中甚至輸錢嘅，我最多講句唔好意思。中咗嘅我就大搖大擺講全港獨家。在我寫文嘅立場，決定好易做。但你自己嘅錢，另一個算盤。

5. 同埋，我講我想法啫，唔等於叫你買，而成個故事幾值得花生。仲有，好似成日都講中大型嘅股份，BUY AND HOLD，有啲人半信半疑，使鬼聽你講咩。咁就試下畀啲短期，獨家嘢。

6. 所以最後警告：新手嘅，最好唔好買。事必要買（即係有人拎支槍指住你？）嘅，唔該，你預會可能好短期有機會損失三四成（應該唔會total loss嘅，下面解）。等住開學呀老母做手術呀下個月奶粉錢呀就唔好拎嚟玩了。但手痕錢多想扮型可以參加下—但記住，買少少好，呢啲唔係用嚟致富，係過癮啫。你當賭馬或者賭波啦（控制到注碼，賭係冇問題的，但唔好明明賭又以為自己投資）

7. 你見我上次推Tesla都未有咁大段廢話，就知真係掙扎。但實在過癮，想寫！

8. 另外，For我自己阿Q良心，呢篇文我冇特別PM讀者話你知有號外，睇到係你好彩注定發達，或唔好彩注定有呢一劫。

9. 拿，500字警告你，仲要睇仲要買，貴客自理。

印尼有3億人。Period（趕時間可以skip呢段）

10. 故事簡單到不得了，唔知大家有冇去過印尼。我想去，原本有機會去（以前東南亞公司嘛），最後都係冇去。印尼有差不多3億人，全球第四大。當然而家仲係相當窮，但相對年青。之前可能都有人見過我寫越南，印尼同越南嘅情況差不多，年青，人口多，發展中，亦係中美左右逢源，「不過印尼人口係越南三倍」（但當然地理，勞工質素等等有啲唔同，暫不討論）

11. 咁亦應該知，各式start up，電子商貿等等，最好就呢種地方：版圖大（丁屎咁細未必有咁多問題），人口多。中國美國出最多獨角獸（估值10億美金嘅初創），除咗因為國力，亦因為人口—你中國啲乜乜美團，根本只係做自己國家都得，你咪制裁，我唔使好似傳統出口業咁賣全世界。而印尼亦係一個有返咁上下大嘅市場。

印尼UBER 同 印尼亞馬遜合併！180億美金估值

12. 今日嘅故事，好簡單（英文）。兩間印尼公司傾合併（中文）。Gojek同Tokopedia。我諗成件事嘅痴線地步，等於阿里巴巴同騰訊合併，或者蘋果同亞馬遜合併？因為Gojek同Tokopedia，就係印尼最值錢嘅start up

13. 講真，比較似UBER+亞馬遜，或者滴滴打車＋阿里巴巴。業務我都不詳細講，我唔會畀你上維基百科查知多好多。Gojek係打車兼支付，「印尼UBER」（其實係「印尼GRAB」，UBER冇支付，GRAB有，去星馬越應該會用過）。（另外留意，Gojek之前先講話同GRAB合併，「不過係上個月過期嘅產品」）

14. Tokopedia？「印尼亞馬遜」，電商。兩間公司夾埋，估值應該180億美金。十角獸呀！（10億美金就獨角獸，100億就百角。「有冇千角獸？」係有的！早排撻咗Q嘅螞蟻，或者抖音嘅母公司，都上到1000億美金估值）

15. 180億美金有幾大？大過任何中美以外嘅Start up．

16. 常識都估到，Gojek同Tokopedia，個仙甩治應該幾大。換著第啲國家未必批，反壟斷。不過印尼嘅嘢，嘻，你懂的。咁正面啲，佢地想有間 National Champion，做大做強，亦都合理。

印尼股冇得買，但李澤楷幫大家搞咗間美股SPAC！

17. 講到呢度，「印尼股」，點買？之前就提過下美國上市嗰間新加坡公司SEA，但Gojek同Tokopedia，根本冇上市。

18. 但，真係睇本Patreon比別人知得多。雖然我冇去過印尼，但之前我地舊文有提過下Tokopedia呢間嘢。 （BTW，篇文係我在台北被Zoom炒嗰日寫嘅，幾咁強大嘅心理質素）

19. 點解？因為同李澤楷有關！拿，國際視野呀！

20. 咁去到故事下半部，舊文你見我寫，李澤楷搞間SPAC，就話要買起Tokopedia。一齊嘅仲有矽谷神人Peter Thiel（呢個真係神人，我唔會亂叫）

21. 唔知咩係SPAC嘅，睇舊文（但好長）。但你咪當空殼公司，準備收購Tokopedia，而呢隻SPAC，在美股已經上咗市一排！應該你美股戶口買到！

（20:55 更新 - 盤前係咁插，似乎唔多對路咁。不過出咗文就唔刪）

22. 冧把，Bridetown，行動代號，BTWNU（BTW 李澤楷好似好鍾意Bridge，香港搞檔金融嘢又叫Pine Bridge，以前我公司樓上）

23. 咁第一個想法，隻嘢仲唔炒到飛起？事實之前已經10蚊（SPAC大多數都係10蚊上市）炒到20蚊，呢排回落啲，15蚊左右

24. 之前在頭盔我寫過，隻嘢有機會跌三四成。就係跌返去10蚊。如果最後告吹，SPAC買唔成嘢，咪回水，10蚊

而家15蚊，得就20蚊，唔得就10蚊

25. 不過，有一個嘅問題：諗返成個故事。最初係隻SPAC傳（應該唔會假）想買Tokopedia。但人地而家合併埋Gojek喎。買個妹送埋家姐。點計數？再籌多啲錢先買？定人地有咗Gojek根本唔使再搵你隻SPAC上市？定所有嘢由頭計過？就風險啦。

26. 廢啲講句，我估隻SPAC嘅價，會相當波動。如果成壇嘢撻Q，就10蚊見啦。但如果仲係有得玩，點都上20蚊甚至更高掛？

27. 所以，唔買都可以食下花生。但，我信李澤楷同Peter Thiel．