2020 回顧 + 教訓 （三） — VIX 90 時入市，都要捱多幾棍先見底。至於負油價？記唔記得幾時？ (Patreon)

唔Google，記唔記得幾時負油價？

VIX抽到90時你飛入市，捱多四棍見底。捱到嘅，事後睇的話。

1. 呢篇係 2020 回顧+ 教訓系列嘅第三部。

2. 第一部在此，第二部呢度。照計會去到六七篇。之前引言嗰啲我唔再重覆了。直入主題。

3. 但，當然貼多次標普圖，應該每篇我都會貼。記住，「2月21日左右開始急瀉，1個月後嘅3月23號見底，一個月差不多跌33%」。記住，221，323。好重要，背咗佢。221，323。（大家大約想像到當年我係點教書嘅，係喎，我以前教中學的）

唔Google，記唔記得幾時負油價？

4. 呢篇講多兩個圖。第一個，油價。即係股災我都見過，2020都只係比較快同深，本質唔係未見過，唔係我認知想像以外嘅嘢。但負油價就真係大開眼界啦，對不？

5. 考下大家，負油價呢件事，發生在幾時？你可能有啲其他嘢（例如自己生日）令你記得。但我坦白，我係唔肯定嘅，我都要查返

6. 原來？係4月尾嘅事！

7. 咁又問你書啦喎，221股市跌，323見底嘛。負油價，係成個月之後嘅事。

8. 啟示係乜？唔敢扮專家。但我嘅理解：油價，就真係「反映實體經濟」。個敏感度似乎冇股票咁快。或者咁講，221-323呢段，股票跌，油價都跟住一齊狂跌—但負油價呢一浸，就係股市反彈咗成個月後先出現的。明顯係受另一啲因素影響，咁大家應該當時都聽過人講了。

9. 結論？唔使太睇咩油價，另一個圈嘅東西嚟的。你4月見負油價又以為股災咩。至於嗰啲咩以為頁岩氣公司爆煲銀行會出事呀，或者咩有人炒輸期油出事呀，都相當低能—故事人人識講，高油價又有人爆煲，低油價都有人爆煲。正如人民幣強又話出口企業爆煲，人民幣弱又話走資內房借貸成本升會爆煲。年年幾十次爆煲，自己就先爆煲。

10. 以上啲論述，係咪錯得晒？都唔係架。但，大佬，量化啦。否則你乜春都話蝴蝶效應，一年就爆幾十次煲啦。有邊間頁岩氣公司你講得出名？爭銀行幾多錢咁大把？銀行一年三百六十五日都有人還唔到錢架啦。又有冇睇過而家嘅銀行，同2008比，底子厚咗幾多？（但，盈利能力就冇乜了）。同樣地，講咩中國銀行輸幾多億，又有冇望過中國銀行本book有幾多億？

11. 以上呢啲，就係好多外行人常犯嘅毛病。咁講真大家唔係全職做，有啲根本唔識，識亦未必有時間—而我就係幫大家做呢啲嘢！你就慳返時間陪老婆仔女小三情夫，幾咁好。

12. 問題係，呢啲轉角市，「專家」網友特別多。唔量化嘅，講乜都多餘。仲有，量化嘅都好，只係講咩「最後情況」嘅，亦都幾多餘（未必最多餘）。最壞情況聽日核戰添，仲買乜股票？你唔成副身家沽空？（不過交易所炸爆咗邊個賠畀你？）。疫情最壞情況咪一掃光冚球鏟。

13. 呀，真係寫落有火。量化唔到嘅固然就無知，但有啲更大鑊嘅，半桶水（都冇）走去用錯數據去量化嘅，仲大鑊。因為有數字，有啲人就以為專業啲，「埃汾話冇數嗰啲唔好理嘛」。

14. 例子？例如記唔記得嗰時有人話每日拎兩萬蚊可以提爆香港嘅銀行體系？或者話個個去提爆中銀。你真係覺得符合你常識？但佢有計數，不過入面計嘅數，就係錯咗。第一個例子，啲人將香港銀行體系結餘（幾千億），當咗係「香港總存款」（十幾萬億）。第二個例子，將中銀嘅「現鈔」當咗係「存款」。

15. 扯遠咗，咁你話，「咁我信咩人好？」。咁我唔會無恥到話「除咗我邊個都唔好信」。一般嚟講，「主流傳媒」都算係比較可信—有時都會錯，記者亦唔係乜都識，但，至少可信過啲乜乜KOL。而又一般嚟講，鬼媒似乎比華文媒體可信。華文之中，香港又似乎最好，大陸同台灣就算把啦。

16. 仲有，我有一份good read名單，成年冇update，但怕且仲有用。有我平時或以前睇（＊）嘅書，傳媒，部份作者等等。呢篇文最底attachment會有。

17. （＊）亦即係抄料名單，哈哈，不過唔怕畀你知，首先有啲你未必睇得明，明又未必肯畀錢，肯畀錢又未必有時間，況且我抄完往往仲勁過原文，幾篇煮埋一篇。呢啲就最高境界，話埋畀你知抄邊度都得。正如我從唔怕人地抄我嘅文同idea，因為我不停可以寫新嘢，仲寫得快，你抄都抄唔切。

VIX抽到90時你飛入市，捱多四棍見底。捱到嘅，事後睇的話。

18. 好，今集嘅下半部，講VIX。初哥可能聽過但唔係好明，都唔算好難明，簡單解下。點都要識有啲認識。

19. VIX，指美國標普500指數啦，恒指有恒指版本嘅VIX，原理差不多。實情上VIX係乜？佢係標普500指數期權嘅引伸波幅。咩係期權咩係引伸波幅就唔解了，明嘅明，唔明都死唔到人嘅。

20. 十分簡單嚟講，VIX就係市場啲友，估個指數將來波動大，定係細，一個量化指標。咁講明啦？

21. 咁你話，波動可以中性，狂升係波動，狂跌都係。理論上係，如果講長期投資直頭volatility is your friend．但實務上呢？俗語講，going up like escalators and dropping like elevators 。即係乜？基本上，大波動，好多都係跌市股災。有實證支持，我估同人嘅心理亦有關。

22. 唔使講咁深，睇多次標普指數221 323個圖已經知啦！跌落嚟快手食瀉藥，升返去（即使已經係史上其中一次最快）就慢慢。2008亦係咁，V型反彈都好，講速度都係跌快，升慢。

23. 所以，實務上，呢個VIX，又叫fear gauge，fear index，恐慌指數。急升之時，必然係股災。但時間上係點先後呢？就研究下。

24. 有啲經驗嘅知道，VIX長期低迷，往往就係股災先兆。2017年就係咁，當時仲有好多人係沽VIX—即係賭VIX長期唔會升，日日收錢—直到一日忽然間打靶。就係我成日講嘅，堆土機前執銀仔，999日你日日都安全執到一蚊，但一舖就車扁你。但反轉，你估股災，又唔知估到幾時。

25. 相反，VIX在股災中當然扯高，你在VIX高時買股票，到平復落嚟，賺錢好簡單。但呢啲只係理論，實際上，大佬，幾高先叫高？幾恐慌先叫好恐慌？就要睇實際嘅圖了。嚟料

26. 留意呢個VIX圖，係我星期一晚CAP嘅。BTW，CNBC嘅免費圖。插一句，當時我寫緊其他文，冇睇美股，但見到個VIX一日升21％（一度唔止），我就已經知美股大插 — VIX幾咁準。

27. 好，講返正題。221股票跌，瀉到323見底。頭一浸好易見到，VIX不停升上去，越跌越升。但惡搞嘅地方係，你見VIX，最高抽到上80，係3月16號嘅事。之後VIX回落，但你3月16日飛入股市，仲要捱多幾棍先等到323。事後就易，當時呢？

28. 況且，我等登mark住，323，個VIX都仲在6/70水平，極高。你點知唔會再反彈？見唔見3月16前都試過回落再抽？

29. 而即使去到4/5月，你見VIX都仲在30水平—有排都未回落到大屠殺前20樓下

30. 所以，又唔係冇用，但真係唔係咁易捉。甚至你話邊樣領先邊樣，都可能真係要做嚴謹數據分析先計到—咁唔係一眼睇到嘅，即係都唔係你想像中咁易用。可能我去估救濟數據見頂未仲易啲

31. 當然，事後睇真係得的，3月16號見VIX 90，飛入去捱多幾棍，2400-2500，捱到落2200咯。十個巴仙多啲，又唔係冇可能頂到嘅。