［號外］迪士尼再創新高，Netflix就半年原地踏步。串流大戰進入第二回合。 (Patreon)

不經不覺隻迪士尼居然又創新高！NetFlix呢？近半年原地踏步

1. 循例講多次，呢隻迪士尼先神奇股，呢隻係今年年頭（1月），我在公司年度報告嘅推介之一（中間有啲我自己公司嘢就遮咗，同迪士尼冇關的）。唔係馬後炮，係寫完已經覺得有啲錯，因為太貴，而我講嗰啲咩票房好勁嘅嘢，全部反映晒啦。咁當然，嗰時估唔到有肺炎啦。

2. 然後，明明疫情對佢三重打擊（主題公園唔開，戲院唔開，ESPN冇體育賽事播），年頭150蚊，3月時跌到85蚊。而家低位超過一個開近180蚊。唔係講緊咩新經濟股喎。

3. 但留意，迪士尼嘅估值，以 Price to Sales計，係幾十年嘅新高。一方面固然同利息水平有關（記住睇返星期六篇專題），另一方面，亦都見到投資者對公司嘅串流業務極之有信心—而暫時迪士尼交嘅數字都好靚，仲係好短期之內已經做到。

4. 另一方面，發唔發現NetFlix靜晒？用家當然唔係咁講，一路有劇有戲出。但投資者嘅角度呢？發唔發現近半年都好少有呢間公司嘅新聞？

5. 因為Netflix最初真係受惠疫情，但去到7月股價已經見頂，近半年都原地踏步。之前出嗰次業績，有個評論講得好：去到呢刻都仲未訂NetFlix嘅，照計將來幾年都唔會了。（但本人就係例外：我係12月頭，去台北隔離之前訂的，當然我只係極少數）

6. 的確係此消彼長，迪士尼串流做得咁好，就令NetFlix股價麻麻地。應該唔少人知道早幾年我係唔多睇好NetFlix呢間公司，因為燒錢燒得太勁，同埋我認為個技術門檻唔夠高，護城河唔夠深。大公司（主要係迪士尼）有的是錢，一定可以同你鬥燒。

7. 後來嘅發展，疫情的確救咗Netflix—首先，再上咗好多客。第二，低息環境令NetFlix啲負債不太成問題。第三，迪士尼自己都周身唔得閒。

8. 你見年中NetFlix市值一度大過迪士尼，係十分defining 嘅moment，好似Amazon 市值超過咗WalMart，或者Tesla市值超過咗Toyota咁

9. 但迪士尼真係執行力強，話咁快就推出咗成功嘅串流平台。再一次證明，個技術門檻冇你想像咁高。然後，市值又拉返開NetFlix了，而家差不多大NetFlix 50%，亦即係過去半年，迪士年跑贏佢50%，估唔到呢？

10. 而家NetFlix就進入嗰個迪士尼站穩陣腳，全力打你嘅年代，就睇Reed Hasting如何能人所不能了

11. 結果會點？我大膽估計，係會不分勝負，鬥而不破，誰也勝不了誰。NetFlix憑住極強嘅執行力，加埋獨特嘅企業文化，偷襲成功，再加上樓上都講，疫情幫咗NetFlix三樣嘢。但而家傳統勢力嘅迪士尼站穩陣腳，就唔會坐定定畀你打。正如你見Walmart依然未死，仲係市值十大嘅公司（不過Amazon係第二三咁解）

12. 串流as a 平台，並冇Facebook嗰種咁大嘅Network Effect．對好多人嚟講，why not both？正如球迷以前可以又訂有線又訂NOW。舊文都寫過，NetFlix挑戰傳統電影公司，結果出嚟係大家都同化對方。傳統嘅公司又搞串流，而NetFlix又一樣要拍大片去拎獎。最後咪大家都變到差不多，甚至有人話根本係荷里活改變NetFlix，好似滿人蒙古人入主中原最後被漢化咁。

13. NetFlix殺死嘅，可能係啲更小型嘅公司。呢，MGM之類，好似話要賣了，拎住啲占士邦片都幾值錢的。正如Amazon打唔死Walmart，但打死好多中小企。

14. BTW，舊年年尾，在GoBear都寫過啲媒體股，固然估唔到疫情，但都值得睇下。當時已經講MGM或者Lionsgate之類要賣盤了，而未知有疫情。

15. 內容唔係唔值錢，但平台先係殺著，固然串流平台唔係好高技術門檻，但暫時做得最成功嘅，當然就係財力最大嘅迪士尼。

16. 呢個實在係幾大嘅一個課題，我幾乎想寫多篇週六專題，但隨緣吧。而家都一篇千幾字嘅文，又唔想夾硬加長佢。