阿里巴巴真見底啦掛．ASML/VISA/迪士尼齊齊新高．道指成份股表現。坡股跑輸大市。美國零售V型反彈．點解只係買得一注？如何避免熊市。Whatsapp點收錢？MINISO當災。迪士尼大戰Netflix (Patreon)

快評兩句—阿里巴巴真見底啦掛

大師冇點你—ASML/VISA/迪士尼齊齊新高

每日一圖—道指成份股表現。坡股跑輸大市。美國零售V型反彈

Good Read—點解只係買得一注？如何避免熊市。Whatsapp點收錢？

FB Post Summary—MINISO當災。迪士尼大戰Netflix

1. 拿，新讀者可以留意，冇呃你，返到香港後，啲文即時冇咁hea。想講唔在香港，真係軟件（心情時間）同硬件（電腦同酒店）都影響寫文。第時再有機會外遊，要諗諗點搞。

2. 但事實見到，我返到嚟香港，好文一浪接一浪啦。甚至整咗篇號外寫迪士尼 vs Netflix．邊止一個星期六篇？八篇都嚟緊頭，因為我應該仲會寫篇 點解覺得阿里巴巴見咗底。就唔係今日先講啦，28號已經叫你。

3. 節目預告：咩除夕紅日當然照樣出文。另外仲會有我自己嘅2020回顧，少則一篇多則幾篇。另外仲會有2020嘅投資教訓。以前可能放Medium，而家會放晒在呢邊了。

快評兩句—阿里巴巴真見底啦掛

4. 阿里巴巴話咁快就低位反彈12%，不過係兩日嘅事。之前幾篇都有講話差不多，唔知算唔算捉到底，任你。但，係有一定Rationale的，你話馬後炮都好，遲下分享點解覺得210呢啲位已經相當吸引。當然冇包生仔，永遠覺得「中共要打殘馬雲」之類嘅，咁100蚊都唔好買添，但你敢唔敢沽空？唔敢，即係廢話啦。你要assume 打仗冚球鏟嘅，咁永遠咩股票都唔好買添。

5. 當然兩日咁彈12%，都唔係咁易捉。特別係你話跌10%又叫晒救命嘅，咁就冇得玩。咪不如乖乖地月供，或者買ETF算數。唔係一定要玩撈底個股嘅。

大師冇點你—ASML/VISA/迪士尼齊齊新高

6. 都冇乜特別，ASML算係二線科技股，VISA迪士尼都係舊經濟。你見一線科企就只有蘋果破咗頂。又，呢三隻東西，我在instagram  @ivanliresearch都有提，費事呢度再重覆。下？居然有人未科我instagram？快去！

每日一圖—道指成份股表現。坡股跑輸大市。美國零售V型反彈

7. 道指成份股表現—講過道指有好多缺點，大價股（而唔一定係大市值！因為可以拆細）影響力大啲已經夠低能。而且只得30隻—但有時又可以係優點。一個表你睇到晒三十隻成份股表現。見到即使係最大嘅企業，表現好同差都係差天共地，講緊升89%同跌33%嘅分別，而道指本身今年只係升6%左右。事後解就易，但，點解同係投行，高盛升JP Morgan跌？點解都係信用卡，VISA升AE跌？冇你想像中咁簡單

8. 坡股跑輸大市—不過要講，呢度係指跑輸Developed Asia．即係邊啲？舊文寫過，「都唔多肯定」。肯定在Developed Asia嘅，得三個，就係日本，香港，同埋新加坡自己。其他？我都唔知，唔會有大陸，正路都唔會有台灣，而好可能有南韓。無論如何，坡股跑輸，又可以畀你研究下咩 common law 金融中心 有利投資係幾咁無聊。真正原因？因為坡股冇Tech股。日本都叫做有Softbank，韓國有三星，香港有騰訊阿里巴巴。

9. 美國零售V型反彈—所謂的股市脫離實體經濟，但誰的經濟？平時一X二X個話「GDP失業率不代表乜」，做乜講股市時又要只睇GDP只睇失業率？圖為美國嘅零售額，你睇個圖幾靚！根本就同股市一樣。係咪真係脫節？

Good Read—點解只係買得一注？如何避免熊市。Whatsapp點收錢？

10. 點解只係買得一注？—黃國英嘅文，我感同身受。完全唔明點解好多人都問我買A好定B好。又唔係揀男女朋友，why not both？莫非窮到只係買到一間公司？如果係嘅，咁應該儲多啲錢先。況且美股可以一股一股咁買。同意黃國英講，講到尾係心態問題。但邊會咁多一注獨贏？正路都係成個花園咁，有啲股票升幾倍，有啲輸唔少，拉勻你都有賺。

11. 如何避免熊市—Reformed Broker嘅文相當唔錯。鍾意可以睇晒成篇，懶嘅我話劇透話你知。如何避免熊市？得，唔好投資咯，保證輸死。點解人地賺到錢？因為冒咗風險。Risk is your friend．問題係你樣適度take，Risk no more than you can afford to lose and also risk enough so that a win is meaningful.

12. Whatsapp點收錢？—FT Alphaville，照計唔使錢，只登記就得。留意Facebook 最初收購Whatsapp當然係因為用戶多。但，點將佢轉化成收入（術語叫Monetize）？收月費？表面上好似得，問題係有對手，會唔會啲人去晒Telegram？賣廣告？情況同收錢差不多，趕客喎。搞到尾，都係唔係好知點帶到收入。反而instagram就簡單。

FB Post Summary—MINISO當災。迪士尼大戰Netflix

13. MINISO當災—內地政府忽然間高調針泡泡瑪特（9992）嘅「盲盒」，結果美國上市（係呀！）嘅MINISO都當災，因為佢地都做唔少「盲盒」。同場加映講埋「盲盒」同手機遊戲課金扭蛋嘅心理。

14. 迪士尼大戰Netflix—其實係Patreon篇號外嘅廣告文。結果廣告寫得長過原文。咁你亦可以睇多次，我點樣將同一個故事寫第二次。