蘋果又創新高，下一隻產品，係咪打Tesla？ASML 又創新高，500蚊都嚟緊，呢啲就叫技術門檻啦。SNAP 大升，二線社交平台應該有得玩—但唔好太似Facebook。節目預告：迪士尼 vs Netflix。阿里巴巴買得未 (Patreon)

蘋果又創新高，下一隻產品，係咪打Tesla？

ASML 又創新高，500蚊都嚟緊，呢啲就叫技術門檻啦

SNAP 大升，二線社交平台應該有得玩—但唔好太似Facebook

節目預告：迪士尼 vs Netflix。阿里巴巴買得未

1. 返返嚟香港正式第一篇（上星期日係每日一圖 Good Read之類），當然唔會令大家失望。最主要係用返屋企部電腦屋企張枱，真係唔好睇少呢啲硬件嘢。

2. 今日三個故事，第一個講蘋果新高，而早兩日先講過研發開支創新高—對上一次係出iPhone前，今次可能真係出車，好可能威脅到Tesla．

3. 第二個故事講ASML新高，冇乜好講，公司實在冇乜新聞但日日升少少升少少咁日日新高，我鍾意。但溫故知新同你講下咩叫護城河，咩先係技術門檻。

4. 第三篇講SNAP，講埋Twitter．理論上社交網絡係Network Effect好強嘅嘢，但你見Twitter之類，玩咗咁多年，固然市值只係Facebook 二十份一左右，但至少養得住自己，有盈利唔會死。而家龍頭全部驚反壟斷，唔敢以前咁明目張膽出招搞死人然後平價收購，會畀到空間呢啲二線社交網。

5. 仲有？壓軸嘅一篇，係講NetFlix vs 迪士尼。迪士尼股價又創新高（我挑，啲網友係咁抽我水添）。回想半年前你見NetFlix市值一度大過迪士尼，但而家迪士尼再拉返開，股價低位升咗一個開。點解？而你見呢半年NetFlix股價係原地踏步嘅。

6. 明顯呢個串流戰去到第二回合，最初NetFlix執行力強偷襲成功，加上疫情幫咗佢三樣嘢（上多咗客，低息又幫到佢啲負債，同埋迪士尼火燒後欄唔得對付佢住）。但而家迪士尼站穩陣腳，幾個月間就推出咗個幾成功嘅串流平台。後事如何？「呢篇文係冇寫嘅，我直頭開篇新嘅號外，聽朝出」。因為費事寫到太長。

7. 呀最後，睇完呢幾個故事你就見到，我啲文都係會搵返啲舊文出嚟講，真係成個想法嘅脈絡，唔係你睇一篇文拎個冧把去買嘅。係咁簡單人人都富貴啦。

8. 仲有壓軸嘅壓軸，應該呢兩日我會寫，阿里巴巴跌夠未。不過，似乎係跌得七七八八了。記住，點都係睇價，你由300蚊講到落200蚊講同一個故事，implication 已經唔同了。我就當螞蟻一文不值，又如何？仲有其他業務都值錢。

蘋果又創新高，下一隻產品，係咪打Tesla？

9. 話口未完，昨日先寫過，蘋果嘅研發開支（as % of 收入）多年新高。對上一次有咁高水平，係出第一代iPhone之前。似乎，真係會造車了。嘩。值得期待

10. 當然Elon Musk就嗤之以鼻，剛剛先出嚟講，「幾年前我求蘋果買我呀，佢見都唔見我，而家我升咗十倍了」，亦都不忘講返，Elon Musk認為，撈唔掂 Tesla嘅人咪去蘋果，當對方係回收箱咁滯。佢直指話做車同做電話嘅技術，係兩回事。

11. 可能係吧，但蘋果有一個好大嘅優勢：整consumer product嘅經驗。再講白啲，係執行力，大量生產，控制成個供應鏈嘅能力。你Tesla而家只係整咁少車，都經常有阻滯，第時再大量生產又點？唔只係睇創意睇設計嘅。蘋果同Tesla有一個好大嘅分別：蘋果只係將品牌，設計同研發自己做，但生產搵人代工。Tesla就一腳踢。係咪好事？遲下咪知。

12. BTW，仲想講埋，你見蘋果都新高，另外幾間大科企，近日都OK。我依然認為大型科企（特別係Amazon Facebook Google）嚟緊面對政府各種針對。但望落似乎比中國嘅大科企情況好好多。

13. 的確係國情不同，美國政府（特別如果唔係總統堅決出絶招）要使橫手整死間公司都唔係咁易，中國當然另一回事。今日有記者訪問，我都有提到，中國嘅監管風險大好多（但一路都係啦）。

14. 最難搞係，中國嘅監管風險好難預測。Facebook Amazon，甚至阿里巴巴呢啲，大家都知遲早出事。但，點知佢會忽然走去搞泡泡瑪特 9992一間咁細嘅公司？剛剛又話再去搞美團（3690）了。

ASML 又創新高，500蚊都嚟緊，呢啲就叫技術門檻啦

15. 次次講都有啲悶，咁今日試下講多幾句。首先以前都講過，公司嘅嘢，護城河，如何真係可以避免競爭？不外嗰幾味：官方畀你壟斷（港交所），強勁嘅品牌（蘋果，留意好多人誤會咩係品牌，品牌唔係牌子），工藝（LVMH），極雄厚嘅財力（亞馬遜），Network Effect（Facebook），專利（藥廠），Trade Secret（可口可樂）或者極高嘅技術門檻（Tesla？）。

16. 咁ASML，應該係屬於極高嘅技術門檻。固然本人唔係咩科技人，但純科技人，甚至啲半桶水科技人，最大問題係高估某啲嘢嘅門檻。

17. 對我嚟講，極高嘅技術門檻好可能係「後驗」嘅嘢：冇其他人做到出嚟，你拎晒Market Share，咪高。至於有人做到差不多嘅嘢但你堅持話自己嗰款勁啲，就冇用嘅。所以在呢個case，UBER絶對唔係「高技術門檻」。滴滴打車一樣咁玩，GRAB又咁玩。你可以自high話自己個配對勁啲乜鬼，但實務上我係司機邊面畀得多我咪掛邊面，我係客嘅邊面平廿蚊我咪用邊間（不過玩咗咁多年，UBER又似乎開始有高嘅財力了，你入去燒錢都唔易同佢鬥燒）

18. 實情我想帶出嘅係：我都唔使知道到底光刻機係乜。「我知道好勁，賣好貴一部，同埋差不多佢地一間廠做晒，就已經夠」。投資嘅嘢好得意，固然要知得多嘢，但往往係睇你知啲乜嘢—你知道每間車廠嘅車有乜唔同，往往唔會令你炒車股叻過一個師奶。之前都識啲車迷朋友，仲係十分迷信咩德國工藝鋼水之類，買股票輸到你甩褲。

19. 記住，股票嘅嘢，往往有自己一套邏輯。因為，股票真係人嘅遊戲。記住呢句。

SNAP 大升，二線社交平台應該有得玩—但唔好太似Facebook

20. 呢隻都算係二線科技股—雖然只係760市值，但係一個都有啲重要嘅社交平台。我從來冇乜點推過，所以唔會認叻。早排只係掛住講咩ASML PayPal Nvidia等等，都冇講啲社交平台。可以留意下的，甚至睇埋咩Twitter Pinterest之類

21. SnapChat本人冇玩，亦唔知有乜好玩，Pinterest 亦唔知有乜過癮。但當然唔好用你自己嘅品味去買股票，你唔鍾意唔等於冇人鍾意。至於 Twitter我倒係有用。

22. 講呢啲做乜？想講，By Nature，社交網絡係極強Network Effect嘅一樣嘢．但唔同平台又真係可以共存。MeWe之類，同Facebook太似，難生存。但我玩咁多年Twitter，固然公司市值（430億，原來得Snap一半！）同Facebook（近8000億！）冇得比。但Twitter細有細玩，又一路都冇畀你滅絶。佢唔係太賺到錢，但至少夠生存，唔使不停蝕。而亦因為啲人真係又玩Facebook 又玩Twitter

23. 搞笑在，Twitter嘅影響力，同佢市值不成正比。佢都有份畀美國國會叫去照肺，但其他全部係幾千億甚至萬億美金嘅巨企。而Twitter市值甚至得Snapchat一半。如何將個影響力變成收入盈利，就考下公司CEO嘅功能（話說回頭，CEO係Jack Dorsey，佢同時又係Square嘅CEO，有人覺得佢根本冇心戀戰Twitter，我覺得大重組係有機會的）

24. Twitter唔敢講，但SnapChat一路都傳賣盤。未必係壞事，而同時間，以前大家都知大科企用好多好狗嘅手段去收購，最簡單就係燒錢，或者照抄你啲嘢。而家照計冇咁肆無忌憚，相信會令呢啲二線社交平台有啲空間。