ivanliresearch

制裁股見起色，阿里巴巴買得未？ATMX 齊跌。越嚟越多公司同股不同權，點解？蘋果研發開支大增，搞乜？德意志電訊唔畀人用粉紅色，結果敗訴。自由主義？經唔起幾隻熊嘅考驗。龍五投資澳門，變投資台灣 (Patreon)

Published:

2020-12-28 09:21:13

Imported:

2021-07

Content

快評兩句—制裁股見起色，阿里巴巴買得未？

大師冇點你—ATMX 齊跌

每日一圖—越嚟越多公司同股不同權，點解？蘋果研發開支大增，搞乜？

Good Read—德意志電訊唔畀人用粉紅色，結果敗訴。自由主義？經唔起幾隻熊嘅考驗。

FB Post Summary—龍五投資澳門，變投資台灣

1. 已回港，在家隔離中，不過昨晚實在太累，小睡一陣就去到第朝。無論如何都只係遲來，冇缺席，仲算保得住我嘅「永無甩稿」紀錄。

2. 記住星期一晚冇稿，星期二照常。

快評兩句—制裁股見起色，阿里巴巴買得未？

3. 下面「大師冇點你」都會講，但都係重覆，科技股龍頭冇乜運行。只係估唔到，連泡泡馬特嘅「盲盒」都畀官媒關注，呢隻完全唔算大，真奇怪。而我不知道中共幾時咁關心大家上唔上癮。

4. 同時間舊經濟股友邦（1299）十分有力，港交所（388）都創過新高。

5. 另一方面，制裁股中，不幸地最睇好嘅中國海外（688）仲係冇乜起色，反而中移動（941）中海油（883）低位都彈唔少。但我寧願相信，中海外係有本身行業問題多啲。你見真正惡名昭彰嘅中車時代電氣（3898），唔少海外業務，一出完業績都狂彈了，證明制裁甚麼，不能一直壓住股價。無論如何，買咗中海外嘅，我覺得唔使驚的。

6. 另外，週末話已經完成調整阿里巴巴。但股價照瀉，我覺得呢啲位應該算吸引了。

大師冇點你—ATMX 齊跌

7. 一早講明啦，冇點你啦？真係以為只係馬雲大嘴巴得罪人？

每日一圖—越嚟越多公司同股不同權，點解？蘋果研發開支大增，搞乜？

8. 越嚟越多公司同股不同權，點解？—睇到了，今年超過四成嘅科技新股，都用同股不同權上市。而我係一直反對呢樣嘢。點解要為呢啲公司破例？你可以話，投資者唔介意就得。但，規例真係咁用？咁李嘉誠啲公司係咪唔使守上市條例？投資者唔介意就得喎。講到尾，只係今年市旺，冇事咪冇事，大家咪冇所謂。但例如有幾間爆煲，或者創辦人無能或自肥，但你都趕唔唔走，咪知味道。你話咩投資者短視嘅，講到尾，蘋果亞馬遜唔使用同股不同權，Tesla騰訊都唔使。你創辦人唔想畀人管，咪自己私人公司唔好上市咯。

9. 蘋果研發開支大增，搞乜？—蘋果雖然畀人話創意不再，但今年動作唔少，包括出咗5G iPhone，自家處理器嘅電腦，智能speaker，自家耳機—仲有，傳話會出車。今年蘋果嘅研發開支，佔收入差不多7%，係多年新高。對上一次有咁高係幾時？就係出iPhone 之前。當然研發嘅嘢唔係包生仔，但，令人期待會唔會有啲真係突破性嘅嘢出嚟。例如，真係整車？

Good Read—德意志電訊唔畀人用粉紅色，結果敗訴。自由主義？經唔起幾隻熊嘅考驗。

10. 德意志電訊唔畀人用粉紅色，結果敗訴—正係T Mobile嘅母公司德意志電訊，其實在好多國家都有業務。留意佢地嘅corporate color 係粉紅色（應該話係magenta）—居然係註冊咗！之前有間初創用呢隻色，畀佢地告，德意志電訊認為任何公司都不能用。結果在法國，剛剛判咗德意志電訊敗訴。

11. 自由主義？經唔起幾隻熊嘅考驗—咩叫自由主義都有啲深，但呢度指嘅係Libertarianism，同美式講嘅「白左」「博愛普世」「政治正確」左翼Liberal係不同的。我身邊都有朋友自稱係Libertarian，核心思想當然係痛恨「左膠」云云，反對任何監管，還我選擇，不要政府之類。留意搞搞下有時變成無政府主義，「咁咪變埋左翼」。但想講實際例子，有人真係搞啲咁嘅烏托邦社區，大家各不相干，唔要公共服務—最後點出事？因為有熊，「externalities」。如果冇「政府」「公權力」，點保護「公眾利益」？實務上，有熊，我想拎啲都甩去餵熊，但隔離屋怕會畀熊襲擊，有冇權制止我餵熊？根據Libertarian講法，當然冇權阻止人地做乜。結果啲熊就周圍走，搵嘢食，甚至連限制其他人啲垃圾桶要封好都冇權嘛。果然，烏托邦嘅嘢，實行就出事，最後都要有「公權力」。