埃汾已被炒。明源雲，中海油883，中國海外688。Tesla繼續派對。Dropbox仲有得升。2021展望—初步版 (Patreon)

大版務—埃汾已被炒

明源雲，中海油883，中國海外688

Tesla繼續派對

Dropbox仲有得升

2021展望—初步版

大版務—埃汾已被炒

1. 你冇睇錯，今日星期一，理應係冇文嘅，但反正市況有嘢想寫，就將聽日嘅文今日寫。另外，呢篇文我會放免費，當然係為宣傳。

2. 咁聽日寫乜？另一原因，就係因為我剛剛畀公司炒咗（係喎，放緊假都可以被炒的，Zoom添）。人生本是無常，早兩日FB Post我先講緊大搞作，而家要順延。正如接到公司通知前嗰分鐘，我都仲寫緊 for 公司嘅2021展望。

3. 星期二我應該會再寫篇文詳細講，順便在Facebook上告下急（當然要）。但我心存感恩—當然唔係對炒我嘅公司（雖然我亦冇乜好大怨恨）—係感激大家。冇大家支持，呢刻我應該好焦慮。

4. 當然我講過，任何情況下都唔加價，即使冇得撈亦冇打算咁做。大家有心嘅，可以做嘅係乜？

5. 首先，如果你財政狀況還好嘅，就唔好cut Patreon啦，等我搵到新工（還是會搵）或者個Patreon再搞大啲先。畢竟我冇咗個月入，唔係話會餓死埃汾太或供唔到樓，但影響點都有。如果財政狀況唔好嘅？咁梗係照顧咗自己同身邊人先啦，親疏有別。

6. 另外，財政狀況well off嘅，就請去join 20蚊或40蚊會員吧，我已加大quota，講真都係一個月多一兩百，你食餐飯冇咗。純粹自願，但積少成多。而我建議月費得了，到我搵到工或Patreon再搞大啲你咪cut返落12。

7. 第三，當然係介紹朋友訂。甚至你本身係KOL多人識嘅出個post話人知：喂呢條友失業啦但寫嘢都幾好，亦可以。

8. 第四，如果有初等或中等職級嘅金融工作介紹，請話我知。「埃汾你老哥做咗十幾年都仲初等中等？」。唔係我，係我team嘅同事，做得不錯嘅，我可以擔保請得過。

9. 第五，最不重要嘅，有主管位啱我做嘅，都話我知。當然我知機會不大。所以放到最尾。

10. 寫寫下呢度都600字，但，聽日先出篇詳細嘅。唔使安慰或問問題住，有啲FAQ我會聽日篇文答埋。真係要打氣呀問嘢呀留返聽日先。

11. 無論如何，禮多人不怪，再一次感謝大家。唔係有你地，我呢刻唔會仲咁好心機若無其事咁寫股票。

明源雲，中海油883，中國海外688

12. 呢堆其實理應係「大師冇點你」，不過都寫多幾句。首先呢，你見係真係有讀者跟住買的。「我唔係cheap到造假下話？」。VIP讀者添，有頭有面的，熟朋友嚟的（分分鐘有人估到係邊個）。係挫過落嚟，但我都仲係好有信心，對不？

13. 至於呢隻嘢，同之前玩Tesla入標普指數差不多。你有幸買咗嘅，放風箏策略，未跌返去你買入位，唔使咁快take profit，反正唔係叫你長玩（實則我連間公司做乜都唔知），打回頭你咪當發場夢，原本啲錢就唔係你的。Upside可能好大，唔好為咗升一成就唔要以後嘅嘢。當然去到輸錢應該斬。

14. 至於中海油同中海外，兩隻都係逆市升嘅，很重要。中海油呢，之前一篇都提過了。至於中國海外，我知有讀者跟住買，應該輸緊錢，冇計。但相信見底啦掛。

Tesla繼續派對

15. 又係有讀者跟，另一個呀下，不過佢已落車，但買得夠大。我就覺得一路可以玩落去，請參考對上兩段講「明源雲」嘅策略。咁各有前因，只係畀你睇到，拿，真係有讀者跟住的，另一個。

16. 真係set stop loss嘅，咪set在你買入嘅價。有盈利嘅有得佢碌，打回原型當發場夢。再講一次，反正呢啲錢原本唔係你的。至於星期五會發生乜事，前因後果，舊文都有講，兩篇。

Dropbox仲有得升

17. 上篇寫過了，有機會畀人收購嘛。再有讀者追入去，話埋你知，40蚊VIP添。仲其實係我Patreon第一個讀者，亦係推40蚊後即入嘅。同開埋佢名都差不多了。

18. 一樣，純係話你知，真係有人跟，佢睇埋我篇文先飛入去都仲OK。因為今日仲有得升，而家回返啲，更好。下年焦點都應該係二線科技股，下面再講。

2021展望—初步版

19. 未係final，「其實有乜係Final？」，情況變我自然變，唔通你而家拎返2019年我叫你買迪士尼嚟抽我水咩，鬼估到爆肺炎咩。固然而家照樣新高，但講真我都覺得2019年尾叫人買係錯，有冇疫情都係，好多嘢唔止睇結果。

20. 講返，2021，呢一刻我大框架嘅諗法如下，有機會變，但暫時係咁，將來細講：

21. 經濟實會好—但，呢樣東西per se唔會保證股市實好。睇嘢唔好咁表面，2020你應該學會啦。既然經濟差股市可以升，經濟好點解股市唔會跌？

22. 但，買股票似乎都係好idea—因為冇乜其他選擇。債息低成咁，買葡國債意大利債負息，搵笨。股票貴？債更加貴。樓亦唔平（海外樓可能OK，another issue），交易費用又高。所以都係100% invest，要自住嘅買樓，投資嘅，除咗股票都唔知有乜

23. 應該放返多啲重心去美股以外—美股很貴，任何估值都係。固然貴得有道理，貴者可以仲貴，我都知。但似乎去到嚟緊幾年，其他股市值搏率可能高啲。唔係叫你沽晒美股。但我知呢刻好多人只買美股唔買其他嘢，我就唔會。

24. 舊經濟股有啲機會—主要係美股以外。美股唔少舊經濟股亦都照樣破頂，唔算平。但港股A股甚至歐洲日本，仲有唔少舊經濟股幾殘。機會應該有

25. Big Tech冇運行，中美都冇—基本上係呢排最強烈feel到嘅嘢。可以寫專題，但一個字：監管。唔止中國，美國亦係。冇錯，美國打自己科企太勁會驚益中國，中國亦咁諗，所以唔會殺絶。但大型科技股應該進入另一個時期，冇以前咁橫行霸道。而投資者當然會驚，仲要好多過去幾年買已經賺到笑

26. 二線科技股有運行—上面嗰段之後嘅必然結論。亦因為做併購，可以買人又可以畀人買。PayPal，DropBox，ASML 呢排都幾強勢的，明顯跑贏啲Big Tech．甚至中資亦都係，例如樓下呢隻，當然等我研究下先。