年尾都係小心啲好。Dropbox即升。美股十年嚟首次「供過於求」。美國人一生時間用落咩人身上。霸菱爆煲25年的教訓。賤人先成功上位？水牛城雞翼。乾杯好過老乾杯 (Patreon)

快評兩句—年尾都係小心啲好

大師冇點你—Dropbox即升

每日一圖—美股十年嚟首次「供過於求」。美國人一生時間用落咩人身上

Good Read—霸菱爆煲25年的教訓。賤人先成功上位？

FB Post Summary—水牛城雞翼。乾杯好過老乾杯

1. 隔離進入第6日，我先搵得返個生活節奏，之前都係五六點訓然後十點畀里長叫晒然後我再訓然後兩三點佢再叫醒我。呼。希望聽日開始每朝十點起身。好早架啦，對我嚟講。你地有眼睇到我幾點出文的。

2. 你見今日寫得比較長，因為狀態好轉中，而今日啲每日一圖同Good Read都好正，我甚至可能會在Facebook出長文。但當然你地已經先睹為快。

3. 另外，之前篇週末專題Tesla都係好東西，未睇記住睇。而因為我年尾先返香港，計埋回港隔離14天要1月中先出到街，所以呢期都冇推VIP住，但仲有位的。1月會再推下。

快評兩句—年尾都係小心啲好

4. 星期日嘛，冇市，所以都真係兩句。但的確我覺得年尾係小心啲。我估12月應該都仲係有得升，但2021呢？上次貼咗張圖，好具啟發性。估值都係好重要的，加上人人都識講一街股神。雖然點計都應該stay invested，但就唔好話借盡錢呀咁。或者好似我之前講嘅，手頭有錢，唔郁係最不智。而家唔入市嘅，咪拎去洗咗佢—例如反正屋企要裝修嘅，咪而家做。咁你其實令將來嘅錢多咗。

大師冇點你—Dropbox即升

5. 其實唔關我事，我都係站在巨人肩膊上，但上次Patreon分享咗The Information 篇文，佢地貼Dropbox會賣盤（而佢地上年估Slack賣，仲有提Sales Force，中到應一應），話咁快股價就升，兼且有人吹話Facebook會買。無論如何我覺得下年二線科技股真係焦點。

每日一圖—美股十年嚟首次「供過於求」。美國人一生時間用落咩人身上

6. 美股十年嚟首次「供過於求」—有時幾怕啲人半桶水（可能我都係）。乜都唔識反而還好，識一半或學藝不精嘅先麻煩。例如好多時聽人講「股票都係供求」（廢話），而佢地覺得多咗股票價格就會跌，實在低能得很。佢地好似講經濟，但連Ceteris Paribus都唔理。咁多年股票都係越嚟越多，但股價升定跌？交易所上市嘅市值升定跌？越嚟越多股票，點解恒指唔係100點跌到1點？講返，樓上個圖，你見到今年美股係「供應多」，即係IPO印公仔紙/集資　多過回購。但，係咪就會跌？咁你可以睇下，對上一次有咁情況，係2009年尾（同而家一樣，股市反彈，而企業要修補財務）。打後十年美股點？

7. 美國人一生時間用落咩人身上—有淡淡嘅哀愁呀下，應該唔使解個圖。我覺得比較好玩嘅係，試下拎走啲線，然後叫人估下條線係點，應該幾有趣，可以測試下對方（面試？相睇？）對世界對人性有幾理解。越大就越多一個人，特別係四十歲後。廿歲後開始同伴侶一齊多，但三十至六十都差不多時間，到老時先再多，最後又會少咗，因為死埋。小朋友亦有趣，當然你三四十歲先多時間陪佢地，老咗呢，就佢地唔理你了。朋友就越嚟越少，但其實由二三十歲開始已經一路少，會陪伴侶同屋企人嘛。呼。想睇全文，呢度。

Good Read—霸菱爆煲25年的教訓。賤人先成功上位？

8. 霸菱爆煲25年的教訓—短嘅文，但幾好睇。記住睇埋佢入面嘅link．今年係霸菱銀行爆煲25年，後生嘅讀者都未必識。但真係鑒古知今，歷史有時都幾相似。霸菱當年係某位rouge trader Nick Leeson炒爆derivative（戲都拍埋）。但背後有啲嘢千古不變。第一，佢嘅玩法其實亦係所謂嘅「推土機前執銀仔」，留意呢樣行為咁多年都有人做，沽option拎期權金，沽VIX等等，一般都冇事，直到出事。當年打爆佢嘅就係神戶大地震。第二，聽落好賴皮，但銀行迫到埋牆角，冇錢賺，自然乜都敢做。當時時代背景係英國開放金融業，霸菱呢啲老銀行受壓，唯有放任下面做啲「新業務」。我會在FB Page寫長啲。

9. 賤人先成功上位？—忠忠直直終需乞食，流行文化中都係講賤人上位，成功嘅總有啲邪惡嘢。但呢篇引述研究，睇下人格障礙同「成就」嘅關連。見到其實並冇呢回事。例如講佢地多數較有魅力，有機會上位是真的，亦都較容易在選舉勝出（侵侵？）。但，到佢地做嘢就會出事，人格障礙嘅基金經理投資並不特別叻。而整體呢啲人收入不見得高過普通人。留意呢度嘅「人格障礙」都佔整體人口1-2%，唔只係你諗嗰啲變態殺人犯。不過都講返，得罪讀者都講句，「心理學研究啲嘢」，都係同正式科學有啲分別嘅。

FB Post Summary—水牛城雞翼

10. 希望會寫返多啲其他嘢，希望可以。但實情去到台北隔離我嘅效率極低。

11. 水牛城雞翼—講呢個水牛城雞翼嘅起源，同埋鬼佬唔食雞翼嘅迷思，甚至in general 「乜乜人唔食乜乜乜」呢回事。

12. 乾杯好過老乾杯—平價版好食過貴價版，仲要平一截。然後順手講下「食慣好嘢返唔到轉頭」等等。有啲兒童不宜（不過有邊個post唔係？）