12月18日：Tesla 入標普指數的最後聖誕派對 (Patreon)

Tesla貴唔貴？

12月18日Tesla會點？股市又會點？

12月18日有乜咁特別？

唔好掛住睇Tesla，其他公司嗰日又會點？揀邊間？

Tesla入完指數會點？對指數又有乜影響？

1. 呢篇短短地，但講下Tesla（以下叫「公司」）入標普指數。記住，係12月21日入，星期一。但，很重要，所有執位嘅嘢，12月18日星期五就會發生。所以不能等到下星期寫。

2. 關於公司入指數嘅前因後果，標普指數係乜，有乜標準，點解而家納入，點解之前唔納入，點解今次咁特別，有幾多次資金要追貨等等，上篇文已經講過，強烈建議你去刨。

3. 再講一次，就只係因為佢入指數先建議大家買。打後嘅嘢全部各安天命。上次出文就係上面mark住嘅價，25%回報，一個月咋，相當不錯啦。你計最高位有35%添。而已經係計埋你睇埋舊文先飛入去，有讀者就係呢啲價買。

4. 今篇文主要講12月18日嘅事。照舊，所有嘢係美金。

Tesla貴唔貴？

5. 首先介紹返，Tesla而家超貴。並唔止係因為600蚊所以「貴」，相信呢度嘅讀者冇咁低層次（否則一拆一百就唔貴了），亦唔係因為升咗好多倍所以「貴」。係講估值，市盈率（市值除盈利，但公司近乎冇盈利，有都係carbon trading），甚至市銷率（市值除銷售）都係超貴，而不見得銷售好有增長。

6. 當然鐵粉會覺得統一江湖乜乜乜，隨你。但幾時都係嗰句，再好嘅嘢都有個價，600蚊買，咁6000蚊呢？60000蚊呢？Tesla升多4倍，就成為全世界最大嘅公司。但，冇咗呢間公司，係咪對人類咁大影響？好多人可以照常生活。哦，唔好講賺錢咁膚淺，但，即使你睇公司銷售增長，同話「一統江湖改變世界」，似乎好有距離。

7. 不過，搞笑在，呢期好多更神奇嘅公司，例如Snowflake，啲市銷率更加係痴線。相比之下，Tesla又好似唔係最過份。都係相對啫。

8. 講呢堆嘢，因為講明，我依然覺得公司估值超貴，之前推過，只係純粹因為入指數。可以隨時散水，大家睇路。我就唔係好信下年仲可以升幾倍。

12月18日Tesla會點？股市又會點？

9. 12月18號會發生咩事？請掟雞蛋，但，真的，正如JP Morgan所講，「股市將會十分波動」。有人話廢話，完全唔廢。覺得廢只怪你道行未夠。

10. Volatility 係一樣可以量度嘅嘢，可以量化，可以trade，問炒期權玩VIX嘅就知。咁我嘅Statement 其實係話，Volatility will be substantially higher than average trading days，呢句嘢可以被驗證或否定，點廢？再精細啲，你咪講埋Volatility用乜度，或者幾substantial先叫substantial。

11. 以上講嘅波動，既係講Tesla，亦包括其他股票（晏啲講）。點解咁波動。首先，舊文有講，呢個係史上第一次有咁大間公司一鑊過入指數。另外，仲有因為公司係跳級入去，甚至之前冇入啲中細價股指數（S&P 1500，S&P 400 Midcap，S&P 600 Small Cap等等），好多被動基金係零持股。

12. 舊文提過，單係買入公司嘅資金，已經可能達到760億。但唔好忘記，錢從何來？被動基金唔會有現金乜滯，買公司嘅錢，當然係沽其他嘢走出嚟。所以一來一回，1500億

13. 760億有幾多？上一次嘅標普季度換馬，大約有324億交易。平均呢？270億。史上最高？都不過係508億。唔知呢啲數字計單邊定雙邊，但點計都好，今次都係破晒紀錄，而仲要係只係一隻股票！咁個市點會唔波動

12月18日有乜咁特別？

14. 另外，12月18日，亦都同時係所謂嘅「四巫結算日」，Quadruple witching day。就係期指、期權、股指、股權同時結算嘅日子，歷史上波幅都係大，大把花生可以食。唔買都見證下，相信股市會有唔少異動。

15. 當然啦，股市嘅嘢，最難搞就係始終係人嘅遊戲。人人覺得好大件事，反而最後可能好平靜。例如今年美國選舉，我估你都唔太記得嗰日升定跌。虛則實之，反而2016嗰次人人以為希拉莉坐定粒六，股市就大波動了。

16. 可能今次最後好似「千年蟲」咁，最後市況冇乜大郁動亦不定。其中關鍵之一，上次都講過，公司本身係一隻成交好旺嘅股票，嗰760億買盤，都不過係等於平時幾日成交。係有啲多，但唔係好誇張地多，你見恒指換馬有時都有呢啲規模。

唔好掛住睇Tesla，其他公司嗰日又會點？揀邊間？

17. 樓上都有講，一條好簡單嘅數學。今次加入嘅Tesla，市值近6000億。剔除咗邊隻？反正你都唔會理，係一隻叫AIV 嘅公司，市值60億。

18. 好啦，簡單算術，咁剩返嗰5940億邊度嚟？就梗係要沽走其他公司啦。邊間？我都唔知，標普公司好似冇講啲比重變更。但正常地推論，應該就係每間跌少少出嚟，每間公司按比例咁比重跌啲。

19. 咁你話，500間好細影響？Yes and No．都話係史上最大嘅換馬，影響唔會細，760億，分佈去唔同公司，對於一啲成交唔多嘅公司都幾係嘢。

20. 咁何謂「成交唔多」？就都要相對返市值。所以我會整個表，計返「成交／市值」細嘅公司，應該會異動。而如果因為指數調整呢啲公司忽然跌，就會係買入嘅機會。壞消息係呢個表要用Bloomberg整，而我身在台北，所以要等公司同事幫我整。過幾日再貼。

Tesla入完指數會點？對指數又有乜影響？

21. 短答案係，我點知？但認真少少嘅答案，都係睇淡多。原因？無數咁多量度下都係超貴，甚至根本指數本身都相當貴。入埋指數，乜好消息都出晒，應該反高潮啦掛？

22. 至於對指數影響？係冇乜嘅。有名你叫，標普500，Tesla雖然係史上最大型嘅加入，但亦不過佔指數1.5%。固然係會拉高市盈率，增加波動性。但，對成個指數真實影響，微不足道。你想像下，你有冇理過佔恒指1.5%嘅公司？除非真係升多幾位啦。