Facebook，UBER，DropBox。明源雲909。迪士尼。中海油883。越蝕錢越燒錢嘅公司升得越勁。越高市盈率未來十年越大鑊。美國人一個鐘值19蚊美金。拖延症有乜好？。 擔仔麵，海南雞飯。 (Patreon)

快評兩句—Facebook，UBER，DropBox

大師冇點你—明源雲909。迪士尼。中海油883。

每日一圖—越蝕錢越燒錢嘅公司升得越勁。越高市盈率未來十年越大鑊

Good Read— 美國人一個鐘值19蚊美金。拖延症有乜好？

FB Post Summary— 擔仔麵，海南雞飯

快評兩句—Facebook，UBER，DropBox

1. 埃汾又被Facebook禁言，今次7日。又係話HateSpeech，今次夠晒無辜，因為我個post只係出咗「民意」兩個字，但可能張圖其他人嘅留言有字出事，畀佢scan到

2. 但我向來諗嘢抽離啲，正如之前都講，你搬去MeWe都解決唔到問題。實情「社交網絡」一做到大，就有呢種問題。講到尾因為社會太分化。你唔禁Hate Speech又好多人投訴，企業會抽廣告（因為客會杯葛）。但你禁Hate Speech又有人話審查，又會殺錯良民。冇得搞。

3. 但另外你見，呢排公司正式畀美國洲政府告。講到要拆骨咁滯，或者要佢賣走Whatsapp同Instagram．但你見公司股價唔係點好受影響的—因為似乎入到嘅機會都唔高，畢竟當年你官府批咗，而家先嚟改龍門？

4. 另外，仲有兩個idea．首先係，既然外賣仔Doordash上市反應咁好，係咪應該反而去買UBER？

5. 第二個，都同我覺得下年嘅主題有關：2021年中國同美國嘅焦點，都係啲二線科技股。ATMXJ 同 FAAMG都應該冇乜運行。

6. DropBox，應該係進可攻退可守。最大機會係畀人買起。The Information嘅文講．留意，佢地舊年就貼中Slack 會賣。仲估咗三間買家，其中一個就係SalesForce.

大師冇點你—明源雲909。中海油883。迪士尼。

7. 之前推過隻明源雲，都係因為入港股通，之後一日升一日大跌，星期五又再有返力。個人估，2021年中國同美國嘅焦點，都係啲二線科技股。ATMXJ 同 FAAMG都應該冇乜運行。

8. 迪士尼又創新高，今日可能係史上其中一日最大升幅添。原因因為宣佈咗Disney+上客近9000萬（！），9月底時先7300萬。計埋Hulu同ESPN+就1.4億添。仲預去到2024年2.6億用戶

9. 呢隻唔算大師冇點你，上次寫完都仲要插。但星期五逆市彈得幾勁，轉勢啦？不過講短炒幾日就呢隻，中長線少少我都係睇中國海外688。

每日一圖—越蝕錢越燒錢嘅公司升得越勁。越高PE未來十年越大鑊

10. 越蝕錢越燒錢嘅公司升得越勁—是真的，但見到，年初至今呢，蝕錢嘅公司跑贏賺錢嘅，死未。留意唔止講咩Airbnb 之類，圖係羅素3000指數，包咗好多細公司。最正係，蝕錢之中呢，燒錢嘅就升得勁過有現金流嘅。又嚟「股市脫離實體經濟」？不過掉轉諗，其實又燒錢又蝕錢嘅公司，之前應該極殘，就死。咁忽然一個大放水，由死到唔死呢下，爆炸力好驚人的。

11. 越高市盈率未來十年越大鑊—也是真的。而家呢啲時勢講估值畀人話你過時，根本一大般公司連盈利都冇。但上面個圖好正，畀你見到美股在唔同估值下你入市，未來十年嘅回報。你見個圖好靚，明顯係低估值時買回報好好多。而超過30倍時買，平均要輸錢。而家？超過30倍。不過兩樣嘢，第一，好少人會睇十年，睇一個月都叫長線。第二，留意做到2010年—因為而家2020，但明顯QE呢味嘢係2008年先出現，扭曲咗市場。

Good Read— 美國人一個鐘值19蚊美金。拖延症有乜好？

12. 美國人一個鐘值19蚊美金—留意，唔係講時薪。政府好多時都想做呢啲研究，想知你一個鐘值幾錢，亦即係你願意為慳一個鐘畀多幾多錢。主要當然係用嚟做交通同房屋規劃。以往嘅做法十分流，就係整個問卷：你慳返半個鐘願意畀多幾多錢？但今次玩法好玩，用咗Lyft（UBER對手）嘅數據，睇下啲人幾時肯叫車幾時唔肯，幾多溢會。結論就係一個鐘值19美金，比之前政府計嘅高出一截。不過留意，叫得Lyft嘅都係大城市，全國應該冇咁高

13. 拖延症有乜好？—原來係2012年嘅文！但好文唔怕睇。係本書嘅作者訪問，作者自稱就係procrastinator。最重要係乜？係呢個作者之前寫嘅書好正。Frank Partnoy，寫過《血戰華爾街》（F.I.A.S.C.O），我成日提嘅一本書。

FB Post Summary— 擔仔麵，海南雞飯

14. 繼續只係紀錄嘢食（有時間都寫Patreon啦），不過有啲文有講其他嘢就貼下呢邊

15. 擔仔麵—好記擔仔麵。擔仔麵當然係台南嘢，最出名嘅就係度小月。但留意台灣人「傳統」根本唔多食麵，因為唔啱種小麥，情況同日本一樣。都係二戰後先開始食麵。正如台灣本省人「原本」都唔多食牛，因為窮，加上牛係用嚟做其他嘢

16. 海南雞飯—同場加映新加坡七間海南雞飯簡評。同埋，留意台灣係近乎冇「潮洲人」「潮洲菜」，有講點解