ivanliresearch

楷仔SPAC買印尼，iPhone產量勁，藍月亮麻麻地，Tesla有壓力。PayPal又創新高。投資者愛嘅係似Netflix嘅迪士尼。歐洲邊國最多低收入勞工？高息股過去十年一路跑贏。日本儲分KOL。Netflix冇改變荷里活，係荷里活改變Netflix。Newsletter打救媒體 (Patreon)

Published:

2020-12-16 19:13:03

Imported:

2021-07

Content

快評兩句—楷仔SPAC買印尼，iPhone產量勁，藍月亮麻麻地，Tesla有壓力

大師冇點你—PayPal又創新高

每日一圖—投資者愛嘅係似Netflix嘅迪士尼。歐洲邊國最多低收入勞工？高息股過去十年一路跑贏

Good Read—日本儲分KOL。Netflix冇改變荷里活，係荷里活改變Netflix。Newsletter打救媒體

FB Post Summary—永和豆漿，春水堂

1. 被炒第三天（冇人唔知架可？），心情當然仲係唔多好。但仲未特登寫篇文，會寫的。但都係嗰句，如何幫到我？就係keep住訂Patreon，財政狀況好嘅可以加碼join 20蚊或40蚊會員。或者介紹朋友訂，如果你本身都有啲名氣在你Facebook推下更好。都有啲朋友做咗，十分感激。

2. 但，文依然要繼續，世界亦繼續。唔好畀呢啲嘢影響判斷。呢啲嘢我係相當冷靜的。

快評兩句—楷仔SPAC買印尼，iPhone產量勁，藍月亮麻麻地，Tesla有壓力

3. 跟進幾單嘢。之前都講過李澤楷同Peter Thiel搞隻SPAC（真係差不多全香港最快！），之後都有吹話會買東南亞嘢，原來係印尼嘅電商Tokopedia。亦同我地早排講嘅吻合，東南亞，日本，歐洲係值得留意的。

4. 另外，蘋果對下年嘅iPhone銷售好有信心。估產量升30%。除咗自己股價星期二晚升5%外，亦都帶埋一眾手機設備股升。

5. 藍月亮，股價相當難睇，孖展頭槌嘅分鐘要輸錢。講到尾都係太貴，而根本玩孖展有一定風險。

6. 最後，見到呢兩日Tesla股價都係有啲壓力。當然一路去到星期五甚至下星期一都可能有得炒，但真係要睇緊啲，可以set定啲沽出嘅位。

大師冇點你—PayPal又創新高

7. 仲有ASML同BlackRock都差不多又見新高。都係嗰句，下年睇啲二線科技股。

每日一圖—投資者愛嘅係似Netflix嘅迪士尼。歐洲邊國最多低收入勞工？高息股過去十年一路跑贏

8. 投資者愛嘅係似Netflix嘅迪士尼—我相當鍾意嘅一個圖，同埋今年嘅一個主題，有機會細講。Netflix之前已經升到你唔信，今年早前仲係疫情受惠股，市值一度大過迪士尼，好有啟示性—但你見近幾個月都係原地踏步。迪士尼呢？都話三重打擊，戲院唔開，樂園關閉，ESPN冇體育賽事播。但真係有食力，開始做串流後，股價升到新高，拉開返Netflix了

9. 歐洲邊國最多低收入勞工？—當然係計百份比。但都有啲Tricky，因為各國人工爭太遠。所以入面嘅低收入，係「相對」—人工低過該國中位數三份二就係低收入。某程度係度「收入不均」「貧富懸殊」。波羅的海三國最多不太意外，北歐瑞典最低都唔太意外。但意大利萄葡牙原來都好「平等」，德國英國都高，法國反而低。呢度有成份報告

10. 高息股過去十年一路跑贏—亦留意返，呢度嘅高息股，唔係你去襟下股票機睇幾多厘息。Dividend Aristocrats，呢度指連續25年都冇減派息嘅股票。留意，市旺要派到息容乜易。但25年，經過幾個周期了，幾次危機，維持到嘅有真材實料，亦都經得起風浪。留意，開始拉開標普指數係幾時？正係金融海嘯後，長期低息。

Good Read—日本儲分KOL。Netflix冇改變荷里活，係荷里活改變Netflix。Newsletter打救媒體

11. 日本儲分KOL—眾所周知日本人鍾意用現金，抗拒信用卡之類，更不用講電子支付。為咗改變呢個習慣，眾多公司就推出好多好吸引嘅loyalty program，無非係想等你班友習慣唔用現金。習慣未改變到，但就產生一個新產業—就係有KOL教人點樣儲分拎最大著數，好多人睇的

12. Netflix冇改變荷里活，係荷里活改變Netflix—相當有趣嘅觀點，諗起講蒙古人滿人，征服中國都好，反而係被漢化。好多人認為Netflix係disruptor，某程度上係。但結果而家傳統片廠都玩串流，威脅返Netflix（樓上有講）。反而係Netflix要拍戲玩奧斯卡，跟荷里活嘅規矩玩。咁到底邊個改變邊個？

13. Newsletter打救媒體—8月嘅文了。但都係嗰句，傳統媒體，特別係紙媒，極其難做，只會更難。本地嘅固然，就算全世界有讀者嘅都難玩。因為，人人可以做自媒體。我都有諗過呢樣嘢，就係稍為有志氣有能力嘅，都自立門戶啦。我當時諗嘅係Patreon，而呢篇文係講Newsletter．但實不相瞞，最初我嘅模式一路都係想做類似Newsletter，抄Matt Levine嘛。