今年最大收購係呢單，S&P Global買IHS Markit。到底呢兩間公司做乜架呢？做乜咁值錢？ (Patreon)

煙草特醇—Data is the new oil

標普係做乜的？做普洱？出信貸評級，定出指數？

IHS Markit 又係乜東東？聽都未聽過，做乜值440億美金？

講到尾兩間做乜要結合？除咗咳哥時仲有乜仙甩治？

在「純數據」業務，大阿哥另有其人

行業碎片化，1000億市值嘅公司都冇，會不停整合

1. 結果星期六晚寫唔完，搞到星期日晚先出，但有遲到冇缺席。今日講S&P Global（以下簡稱標普）買 IHS Markit（簡稱Markit）呢單Deal。照舊，除非另有注明，否則金額係美金。

煙草特醇—Data is the new oil

2. 今年乜都受疫情影響，但環球M&A（收購合併）依然相當活躍。倒唔係因為有啲公司股價大跌變得吸引（邊買得切），而係因為近月嘅反彈，啲公司有彈藥。

3. 之但係，今年暫時最大單嘅刁，係邊單？正係埃汾今日寫，標普買起MarkIt呢單，價係440億。留意係係all stock deal—即係標普只係印公仔紙（新股），唔使畀現錢。拿，所以點解要上市呢！（不過有讀者曾經話，咁等於免費，就唔係嘅。如果咁簡單就人人不停印啦，印公仔紙會攤薄，而且對方股東可以唔受你）

4. 呢個440億嘅作價，仲大過Nvidia買ARM（400億），NTT買Docomo（380億），SalesForce買Slack（280億） （頂！真係讚下自己！居然呢三單都有寫！兩單係Patreon一單係FB Page！完全幫到讀者）

5. 關於呢單2020最大刁，細節可以睇下Reuters報導，都寫得不錯，但其實睇我呢度都夠。

6. 一句，可能大家都聽過，Data is the new oil。嫌講呢句嘢好out嘅，換個包裝，data is the lifeblood of finance。數據有好多，唔止係你彭博或統計署搵到嗰啲GDP呀每日成交呀咁。仲有衞星映像，GSP數據，出行數據，社交媒體上面嘅語言，全部都係。

7. 但不如請循其本先，呢兩間公司到底做乜架呢？特別係MarkIt，唔少人聽都未聽過，點解會值440億？

標普係做乜的？做普洱？出信貸評級，定出指數？

8. S&P Global，就係嗰間標普（維基）。諗起呢間公司，正路你諗起兩樣嘢：第一，標普500指數。第二，標普下調乜乜評級。係同一間公司，呢間嘢之前係在McGraw-Hill入面。個名有冇啲熟面口？間嘢係做教科書（主要大學）出版嘅！然後2011將標普拆咗出嚟

9. 標普業務唔少，但最大就係樓上講嘅信貸評級（佔收入一半咁滯），第二唔係指數，而係數據相關嘅嘢。信貸評級幾好做，因為門檻高，新玩家入場難，長期都係佢同埋穆迪（Moody’s）玩晒，頂多多一間Fitch（惠譽）。呢瓣業務今年幾好做，因為好多公司同政府都發債。問題業務本質係有啲周期，唔太穩定，投資者都係鍾意年年坐定定有錢收。

10. 咁第二味業務就啱晒啦。指數有幾好搵有幾有用？睇舊文講「新興市場」就知。加上近年基金經理唔爭氣，人人買被動基金買指數，生意更好到不得了。最重要係，多數係年年硬堀，訂閱制，「好似你睇Patreon咁」。

11. 你睇，5年間股價由100蚊升到340，而家800億市值咁上下。不過，唔好忘記，第二大貢獻，係數據方面嘅業務。

IHS Markit 又係乜東東？聽都未聽過，做乜值440億美金？

12. IHS Markit（維基）知名度就更低，原本係兩間公司組成，當然就係IHS同埋Markit。先講IHS，都係數據，但偏門啲嘅嘢，工程，航天，自然資源，汽車業嘅數據，工業嘢。Markit呢？相當新嘅公司，2003年，都係金融嘢多，例如你成日聽嘅PMI（採購經理指數），Markit就有出。另外，仲有好多係債券方面嘅數據，同埋CDS（Credit Default Swap，唔知係乜有得佢，主要係賭公司或國家債券違約，違約就有錢賠，好似買保險咁）嘅數

13. 睇下公司個是篤曲，INFO，夠晒型。亦都係5年升3倍咁上下，留意市值係標普嘅一半左右。

講到尾兩間做乜要結合？除咗咳哥時仲有乜仙甩治？

14. 固然，M&A梗係有仙甩治Synergy，兩間公司合埋多數都cut到cost—CEO都少件，IT又少好多人，HR又少好多人。仲有，收錢就A+B一次過，全餐bundle畀你。之但係只係咁樣答，你搵件BBA101都得啦，就唔使畀錢睇呢度啦，下話？

15. 留意今次呢單刁，都係要美國歐洲嘅監管當局批。大家都知而家對反競爭都執得幾嚴。但，呢單相信過嘅機會好大。兩個原因，首先兩間公司都唔太大，1000億市值以下嘅嘢。另外，樓上講過兩間公司業務，重叠部份唔多。一般咁情況監管當局都批—而正係畀你見到，兩間公司業務係互補嘅

16. 留意兩間公司都相當好賺。有幾好賺？你睇多次股價圖咪知。另外，送多個圖畀你。所謂呼風喚雨吸血鬼好好搵嘅投資銀行，近十年股價冇乜增長，即使JP摩根亦不過係10年一個開—即係一年7%回報，「你啲網友個個都一年執幾成啦」。而你睇，標普嘅股價係跑贏晒。（題外話一句：從來做投行都係做員工好，做客做股東就仆街，舊文講過）

17. 呢兩間公司，Operating margin（唔知係乜有得佢） 去到40-60%，在標普500指數（又係標普！）排到10-20位，十分堅。

18. 雖然利錢高，但如果同其他行業嘅公司比，呢兩間嘢都唔算點大。標普講緊800億，Markit甚至只係400億左右。咁你諗下，求其一間冇錢賺SnowFlake都成1000億市值喎。明顯個呢個行業仲係好碎片化，大把整合機會—況且，根本標普同Markit在「純數據」業務，market share相當細

在「純數據」業務，大阿哥另有其人

19. 如果只係講「純數據」業務，標普雖然排第三，但同頭兩間公司仲爭好遠。就算加埋Markit落去都仲爭好遠。計Market Share的話，標普加埋Markit先8%。大哥邊個？正係Bloomberg 彭博（佔33%），同埋Refinitiv（佔 21%）。

20. 上面個圖要解清楚，標普舊年收入超過70億，上面個圖只係計數據業務。而標普暫時差不多一半收入係嚟自信貸評級。理解呢點好重要，因為標普市值800億。咁彭博同Refinitiv呢？留意兩間都冇上市，但都可以估值。特別係Refinitiv有人想買（正係倫敦交易所LSE），開價約270美金。同樣地，彭博嘅估值，大約係500億美金—你見，兩間都仲細過標普！

21. 是的，因為彭博同Refinitiv在「純數據」係阿一阿二，但標普都有個第三撈下。掉轉呢？信貨評級市場，邊有位畀彭博同Refinitiv？所以成間公司計，標普值錢過彭博同Refinitiv。

22. 話說回頭，彭博呢種月費模式，係十分受投資者歡迎的。再講一次，信貸評級係好搵，但都係望天打掛，點都係訂閱制無敵，個個月科水（順手講下，一部彭博機，最平嘅，講緊近兩皮嘢講紙一個月）。更重要嘅係，用戶轉嘅成本太大。你啲報告你啲Excel model全部係拎人地啲數字嘅，咁如果公司唔訂，點算？上TVB 或者買份報紙抄股價？

行業碎片化，1000億市值嘅公司都冇，會不停整合

23. 講到尾，資訊有價。唔好再講Data is the new oil啦，送多句比你：“information about money has become almost as important as money itself”.

24. 呢個行業雖然相當重要，但真係冇一間足夠大嘅公司。成堆都係幾百億市值，有啲甚至冇。呢類情況，多數都會見到行業整合，直到誕生一隻巨無霸為止。

25. 先講返Refinitiv，如果非行家，對呢間公司有乜認識？就係之前倫敦交易所（LSE）買Refinitiv，但港交所李小加企圖買LSE，叫人唔好成親，最後食檸檬嗰次。

26. 講返，Refinitiv原本係湯臣路透Thomson Reuters（又係合併出嚟！）旗下嘅數據業務，最後rebrand成為Refinitiv。私募基金黑石（Black Stone，留意唔係BlackRock）渣住55%，Thomson Reuters 渣45%

27. Refinitiv做乜又關交易所事？又係鮮甩治。傳統上交易所只係……負責交易同結算咯，然後抽你手續費。但時代唔同了，Data is the new oil嘛，交易所自己產生咁多data，做乜益人？直頭自己做埋Data公司都仲得啦

28. 所以，成堆呢啲公司，人人都幾好賺，唔係鬥燒錢有人要抬離場（亦因為好多或明或暗都有政府撐腰，例如港交所可以壟斷），但實在成個市場太fragmented，太散，必定會有一堆嘅整合，整到有幾間超級巨企出嚟。

29. 最終嘅玩法，就係去到好似科企咁，有自己嘅生態圈。例如Facebook +Instagram + Whatsapp，Google Search + Gmail + Google Map + Youtbue咁。遲下就係一站式，交易所，Data，指數，信貸評級，一鑊過。

30. 至於監管當局嘅嘢，就睇你兩間啲業務有幾重叠，同埋睇佢心情了。今次標普同Markit，業務冇乜重叠，冇乜問題。但如果係港交所買倫交所（LSE），或者標普買穆迪，就梗係唔得啦。

31. FT嘅標題，係講標普同Markit合併，準備挑戰彭博同埋Refinitv。樓上都講過，Market Share仲係爭好遠，要居安思危嘛，況且你計市值的話，檟普係提過呢堆公司中最大嘅。加埋Markit更不得了。Refinitv就應該會埋倫敦交易所（LSE）堆，唔使擔心佢。但彭博近年冇乜咩收購合併，當時我都估，喂，人地倫交所買Refinitv，港交所不如買彭博啦！500億之嘛，食得起的。

32. 當然，仲有啲其他公司，例如ICE（紐約交易所母公司），穆迪（Moody’s）同埋FactSet（唔知點解釋，你當佢係窮人版Bloomberg 吧），就自求多福了。合併合併再合併，畢竟IHS Markit咪又係兩間公司（IHS同Markit）合併出嚟

33. 最後送個圖畀你，搞清楚邊間打邊間，各自有幾大。